သျှမ်းပြည် မူဆယ်မြို့နယ် ပန်ဆိုင်းမြို့တွင်း တပ်စွဲထားသည့် ကိုးကန့်တပ်ဖွဲ့ (MNDAA)တပ်သားသည် အသက် (၂)နှစ်အရွယ်ရှိ ကလေးငယ်ကို မုဒိမ်းကျင့်ခဲ့ကြောင်း စုံစမ်းသိရသည်။
ဒီဇင်ဘာလ (၁) ရက်နေ့တွင် ကိုးကန့်တပ်ဖွဲ့ MNDAA ထိန်းချုပ်ထားသည့် ပန်ဆိုင်းမြို့ရှိ လောင်းကစားဝင်းတစ်ခုထဲ နေထိုင်သည့် MNDAA တပ်ရင်း (၅၁၀) မှ အသက် (၄၀) ကျော် အရွယ်ရှိ ကိုးကန့်တပ်သား သည် ၎င်းခြံဝင်းအနီး နေထိုင်သော မိသားစုမှ (၂) နှစ်ခွဲအရွယ် ကလေးငယ်ကို မုဒိမ်းမှု ကျူးလွန်ခဲ့ကြောင်း ပန်ဆိုင်းမြို့ ဒေသခံများက ပြောသည်။
“ကလေးမှာ ကျန်ခဲ့တဲ့ သုတ်ပိုးနဲ့ ဆံပင်ကို တရုတ်ဘက် CID ကို ပို့ပြီး စစ်ခိုင်းထားတယ်။ ဆေးစစ်လို့ ပေါ်ရင်တော့ သေဒဏ် ဖြစ်မှာ၊ ကလေးပဲ ရှိသေးတာလေ။ အခု အမှုဖြစ်နေတာ ကိုးကန့်တပ် အရာရှိလို့ပြောတယ်။ အမှုက ပန်ဆိုင်းမှာတင် ပြတ်လား မပြတ်လား မပြောတတ်သေးဘူး”ဟု ပန်ဆိုင်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် မုဒိမ်းမှု ကျူးလွန်ခဲ့သည့် ကိုးကန့်တပ်သားကို MNDAA မှ ဖမ်းဆီးစစ်ဆေးနေပြီး တရုတ်နိုင်ငံမှ ဆေးစစ်ချက်အဖြေကို စောင့်ဆိုင်းနေပြီး ၎င်းရလဒ် သိရှိမှသာ ဆုံးဖြတ်နိုင်မည်ဟု ၎င်းဒေသခံအမျိုးသားက ဆက်ပြောသည်။
အဆိုပါ ကိစ္စနှင့်ပတ်သက်ပြီး MNDAA ကို သျှမ်းသံတော်ဆင့်မှ ဆက်သွယ်မေးမြန်းခဲ့သော်လည်း မရရှိခဲ့ပေ။
အလားတူ ပြီးခဲ့သည့် နိုဝင်ဘာလအတွင်း ပန်ဆိုင်း(ကြူကုတ်)မြို့တွင် မိဘမဲ့ဂေဟာ ဖွင့်လှစ်ထားပြီး အင်္ဂလိပ်စာ သင်ကြားပေးနေသည့် ကျောင်းဆရာတစ်ဦးသည် အသက် မပြည့်သေးသည့် ကလေးငယ် (၂၀) ကျော်ကို လိင်ပိုင်းဆိုင်ရာ နှောင့်ယှက်စော်ကားမှု ကျူးလွန်ခဲ့ရာ MNDAA မှ မုံးကိုးမြို့ဘက်သို့ ဖမ်းဆီးစစ်ဆေးခဲ့ပြီး လောက်ကိုင်မြို့တွင် သေဒဏ်ချမှတ်ခဲ့ကြောင်း ဒေသခံများထံမှ သိရသည်။
ဒီဇင်ဘာလ ၅ ရက်နေ့တွင် ကိုးကန့်တပ်ဖွဲ့ MNDAA ထိန်းချုပ်ထားသည့် လောက်ကိုင်မြို့ရှိ မြန်မာ-တရုတ် နယ်ခြားမှတ်တိုင် BP-(၁၂၅) အနီးတွင် ပြန်ပေးဆွဲမှု၊ ငွေညှစ်မှု၊ လူသတ်မှုနှင့် မုဒိမ်းမှုတို့ဖြင့် သံသယရှိသူ မိန်းကလေး နှစ်ဦး အပါအဝင် စုစုပေါင်း (၂၁) ဦးတို့ကို လူအများ ရှေ့မှောက်တွင် သေဒဏ်အပါအဝင် ပြစ်ဒဏ်စီရင်ခဲ့ကြောင်း MNDAA က သတင်းထုတ်ပြန်ခဲ့သည်။
Leave a Comments