သျှမ်း-မန္တလေးနယ်စပ် ပြင်ဦးလွင်မြို့တွင် စစ်ကောင်စီတပ်မှ စစ်အင်အား အလုံးအရင်း ဖြည့်တင်းပြီး စစ်ဆေးမှုများ ပိုမိုတင်းကြပ်နေကြောင်း စုံစမ်းသိရသည်။
ဒီဇင်ဘာလပိုင်းတွင် ပြုလုပ်လေ့သည့် စစ်တက္ကသိုလ် (DSA) နှင့် စစ်နည်းပညာ တက္ကသိုလ် (DSTA ) ကျောင်းဆင်းပွဲများအတွက် စစ်ကောင်စီတပ်မှ စစ်အင်အား အများအပြား ဖြည့်တင်းလာပြီး မြို့အတွင်းနှင့် မြို့ပတ်လည်တွင် စစ်ဆေးမှုတင်းကြပ်နေကြောင်း မြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်သင်တန်းဆင်းပွဲသည် နှစ်စဉ်နှစ်တိုင်း ပြုလုပ်သည့် ပွဲဖြစ်ပြီး ယခုနှစ်သည် စစ်အင်အား အများအပြား တွေ့ရှိရသည်ဟု ၎င်းအမျိုးသမီးက ဆက်ပြောသည်။
“နှစ်တိုင်းတော့ ဒီဇင်ဘာလ ရောက်ရင် စစ်သင်တန်းဆင်းပွဲ ရှိတယ်။ ဒါမဲ့ ဒီနှစ်က စစ်တပ်ဘက်က အင်အားတွေ တော်တော်ဖြည့်လာတာ တွေ့ရတယ်။ နေရာတိုင်း သူတို့ပဲ နေရာအပြည့် ယူထားတာ၊ လမ်းမကြီးတွေ ရပ်ကွက်တွေ ဂိတ်တွေမှာ အင်အားများတာ တွေ့ရတယ်။ ဆိုင်ကယ်နဲ့ ကားဆို တားပြီး စစ်တာ ပိုတင်းကြပ်လာတာ”ဟု ၎င်းဒေသခံ အမျိုးသမီးက ပြောသည်။
လက်ရှိ ပြင်ဉီးလွင်မြို့အတွင်း စစ်ဆေးမှု တင်းကြပ်သဖြင့် ပြည်သူများ သွားလာမှု အဆင်မပြေကြောင်း၊ စစ်တက္ကသိုလ် ကျောင်းဆင်းပွဲတွင် စစ်ခေါင်းဆောင် တက်ရောက်မည် ဖြစ်သဖြင့် လုံခြုံရေးကို အဆင့်ဆင့် တင်းကြပ်ရခြင်း ဖြစ်ကြောင်းလည်း ဒေသခံများက ပြောသည်။
ထို့ပြင် စစ်မှုထမ်းများ အတင်းအဓမ္မ ထပ်မံကောက်ယူမည်ကိုလည်း စိုးရိမ်နေကြကြောင်း ပြောဆိုသည်။
“ဘယ်နေရာပဲ သွားသွား စစ်တပ်အဖွဲ့တွေပဲ တွေ့ရတော့ ကြောက်တာပေါ့။ မသိရင် တိုက်ပွဲဖြစ်တော့မယ့် အတိုင်းပဲ၊ ဖြစ်မှာလည်း ကြောက်ရသေးတယ်။ စစ်ခေါင်းဆောင် အတွက် လုံခြုံရေးယူတာလည်း ဖြစ်နိုင်တယ်”ဟု ၎င်းက ပြောသည်။
ပြီးခဲ့သည့် အောက်တိုဘာလ နောက်ဆုံးပတ်တွင်လည်း ပြင်ဦးလွင်မြို့ရှိ ရပ်ကွက်ကြီး (၁၈) ဒိုးကွင်းရွာမှ စစ်ကောင်စီတပ်ခန့် အုပ်ချုပ်ရေးမှူးသည် ရပ်ကွက်အတွင်း တစ်လလျှင် လူငယ် (၂) ဦးကို တပ်သားသစ်အဖြစ် စစ်မှုထမ်းသင်တန်းသို့ မဖြစ်မနေ ပို့ဆောင်ရမည်ဟု ပြောဆိုကြောင်း သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments