သျှမ်းပြည် တောင်ပိုင်းနှင့် အ‌ရှေ့ပိုင်းတွင် စက်သုံးဆီ တင်ဆောင်သည့် ကားများသည် နယ်မြေဖြတ်ကျော်ရန်အတွက် စစ်ကောင်စီ၏ နယ်မြေဗျူဟာမှူး ထောက်ခံစာ အထောက်အထားများ ယူရကြောင်း စုံစမ်းသိရသည်။

ပြီးခဲ့သည့် နိုဝင်ဘာလ နောက်ဆုံးပတ်မှ စတင်၍ သျှမ်းပြည် တောင်ပိုင်း တောင်ကြီးမြို့ရှိ ၄ မိုင် စစ်ဆေးရေးဂိတ်နှင့် သျှမ်းပြည်အရှေ့ပိုင်း ကျိုင်းတုံမြို့ရှိ စစ်ဆေးရေးဂိတ်၊ တာကော်တံတားရှိ စစ်ဆေးရေးဂိတ်တို့တွင် စက်သုံးဆီကားများ နယ်မြေဖြတ်ကျော်ရန် စစ်ကောင်စီတပ်၏ ခွင့်ပြုချက် အထောက်အထားများ ရှိရမည် ဖြစ်ကြောင်း အသက် ၄၀ ဝန်းကျင် ကားသမားတစ်ဦးက သျှမ်းသံတော်ဆင့်ကို‌ ပြောသည်။

“စက်သုံးဆီ တင်ပို့ခွင့် လိုင်စင်တွေ အရမ်းစစ်တာ။ မရှိလို့ မပြနိုင်ရင် သူတို့က ကျိုင်းတုံမြို့ကနေ ပေးကို မထွက်ဘူး။ အစိုးရကနေ လုပ်ပေးလိုက်တာတွေက ဆီဆိုင်ပိုင်ရှင်တွေမှာလည်း ရှိတယ်။ ကားမောင်းတဲ့ လူတွေမှာလည်း ရှိတယ်။ အခုက အသစ်ပြန်လုပ်စေချင်တဲ့ သဘောပေါ့။ စစ်ပြီး သူတို့ ထုတ်ပေးတဲ့ဟာ မှန်ကန်မှ ပေးဖြတ်တာ။ ဆီဘောက်ဆာ ကားဆရာတွေက အစ ထောက်ခံစာ လိုတာပေါ့”ဟု အသက် ၄၀ ဝန်းကျင် ၎င်းကားသမားက ပြောသည်။

စစ်ကောင်စီက စက်သုံးဆီတင်ပို့ခွင့်လိုင်စင်၊ ရောင်းချခွင့်လိုင်စဉ်အပြင် နယ်မြေဖြတ်ကျော်၍ တင်ပို့ရန် ဖြတ်ကျော်မည့် နယ်မြေ၏ လက်အောက်ခံ ဗျူဟာမှူးတို့၏ ထောက်ခံစာ လက်မှတ် အထောက်အထားများကိုလည်း ဂိတ်များတွင် စစ်ဆေးကြောင်း သျှမ်းသံတော်ဆင့်ကို ပြောသည်။

“စက်သုံးဆီနဲ့ ကုန်ပစ္စည်းတချို့ကို တခြားမြို့ ပို့မယ်ဆိုရင်လည်း အဲ့မြို့က ဗျူဟာမှူးရဲ့ ထောက်ခံစာ ရှိရမယ်။ မြို့ထဲမှာ ကိုယ်ဘာဆိုင်ဖွင့်လဲ ဘာအလုပ်လုပ်လဲ ဘယ်ကကုန်ကို ကိုယ်က သယ်ယူမလဲ အဲ့လိုအကုန်ပြောပြီး တောင်းရတာ။ ထောက်ခံစာက ကားသမားကော ဆိုင်ရှင်ကော ရှိထားရတယ်”ဟု အသက် ၄၀ ဝန်းကျင် ကားသမားတစ်ဦးက ပြောသည်။

သျှမ်းပြည်တောင်ပိုင်းနှင့် အရှေ့ပိုင်းရှိ စက်သုံးဆီများနှင့် စားနပ်ရိက္ခာ ကုန်ပစ္စည်းများကို မြောက်ပိုင်းသို့ တင်သွင်းရန် စစ်ကောင်စီ စစ်ဆေးရေးဂိတ်များတွင် ထောက်ခံစာ လက်မှတ်များကို အဓိကထား စစ်ဆေးပြီး တားမြစ်ပိတ်ပင်နေကြောင်း အသက် ၃၀ ဝန်းကျင် ဒေသခံ အမျိုးသားတစ်ဦးက ထပ်လောင်းပြောသည်။

“သူတို့က တောင်ပိုင်း၊ အရှေ့ပိုင်းမှာရှိတဲ့ စစ်ကောင်စီ ဂိတ်တွေကတော့ အကုန်လုံး ထောက်ခံစာတွေ အဓိကထားပြီး စစ်တာပေါ့။ စက်သုံးဆီတင်တဲ့ ကားတွေကတော့ အဓိကပဲ။ တန့်ယန်းမှာတော့ ထောက်ခံစာမရှိရင် ဘာကုန်ပစ္စည်းမှကို ဝင်လို့မရတာ။ သူတို့ ဒီလိုလုပ်နေတာက မြောက်ပိုင်းဘက်ကို ကုန်ပစ္စည်းတွေ စက်သုံးဆီတွေ စားသောက်ကုန်တွေ ဝင်မှာစိုးလို့လေ”ဟု ၎င်းဒေသခံ အမျိုးသားက သျှမ်းသံတော်ဆင့်ကို ပြောသည်။

ထိုသို့ စစ်ကောင်စီမှ စက်သုံးဆီ တင်သွင်းမှုများကို ကန့်သတ်ပိတ်ပင်ထားခြင်းကြောင့် မိုင်းရှူး၊ မိုင်းရယ်မြို့တို့တွင် စက်သုံးဆီများ စတင်ပြတ်လပ်နေကြောင်း ဒေသခံများက သျှမ်းသံတော်ဆင့်ကို ပြောသည်။

သျှမ်းပြည် တောင်ပိုင်း၊ အရှေ့ပိုင်းရှိ မြို့ကြီးများတွင် စစ်ကောင်စီလက်အောက်ခံ ဂိတ်များမှ မြောက်ပိုင်းသို့ တင်သွင်းနေသည့် ကုန်စည်စီးဆင်းမှုများကို ကန့်သတ် တားမြစ် ပိတ်ပင်လိုက်သဖြင့် ဒေသခံပြည်သူများ ပိုဒုက္ခရောက်နေရကြောင်း သိရသည်။