သျှမ်းပြည် ကျောက်မဲမြို့ကို စစ်ကောင်စီတပ် လေကြောင်းဖြင့် အပြင်းအထန်ဗုံးကြဲတိုက်ခိုက်ခဲ့သောကြောင့် လူအများအပြားထိခိုက်သေဆုံးမှုရှိ ကြောင်း စုံစမ်းသိရသည်။
ယမန်နေ့ (နိုဝင်ဘာလ ၃၀ )ရက် ည ၇ နာရီဝန်းကျင်တွင် ကျောက်မဲမြို့ရှိ အင်ကြင်းတောင် ရပ်ကွက်တွင် စစ်ကောင်စီတပ်က လေကြောင်းဖြင့် အပြင်းအထန် ဗုံးကြဲတိုက်ခိုက်ခဲ့ကြောင်း ကျောက်မဲမြို့ဒေသခံတစ်ဦးက ပြောသည်။
“ည ၇ လောက်လာကြဲသွားတာ။ သီလရှင်ကျောင်းကိုထိတယ်။ သီလရှင်တစ်ပါးနဲ့ ပြည်သူ ၁၀ ယောက်လောက်တော့ထိတယ်။ ဒဏ်ရာရတဲ့သူလည်းများတယ်။ အတိအကျတော့ မသိရသေးဘူး” ဟု ၎င်းကပြောသည်။
အဆိုပါ လူထိခိုက်သေဆုံးမှုနှင့် ပတ်သက်၍ သျှမ်းသံတော်ဆင့်မှ ဆက်လက်စုံစမ်းမေးမြန်းနေခြင်း ဖြစ်သည်။
လက်ရှိ စစ်ကောင်စီ ဗုံးကြဲတိုက်ခိုက်ခဲ့သည့် နေရာတွင် မီးလောင်ကျွမ်းနေပြီး ထိခိုက်ဒဏ်ရာရရှိနေသည့် ပြည်သူများကို ကယ်ဆယ်ရေးလုပ်နေကြောင်း သိရသည်။
ယင်းကဲ့သို့ သျှမ်းပြည်သူများအလေးအမြတ်ပြုသည့်ညတွင် ရက်စက်ယုတ်မာစွာ လေကြောင်းဗုံးကြဲချသော စစ်ကောင်စီတပ်အား သျှမ်းကျောင်းသားသမဂ္ဂမှ ပြင်းထန်စွာကန့်ကွက်ရှုံ့ချကြောင်း ထုတ်ပြန်ထားသည်။
Leave a Comments