သျှမ်းပြည်တောင်ပိုင်း၊ ရွာငံမြို့နယ် ၊ဘုရားကြီးကုန်းကျေးရွာတွင် စစ်ကောင်စီခန့် အုပ်ချုပ်ရေးမှုး နှင့် အရပ်သားတစ်ဉီး ကို အမည်မသိ လက်နက်ကိုင်က သေနတ်ဖြင့် ပစ်သတ်လိုက်ကြောင်း စုံစမ်းသိရသည်။
ပြီးခဲ့သည့် နိုဝင်ဘာလ (၂၆) ရက် ညနေ ၆ နာရီတွင် အမည်မသိ အမျိုးသားနှစ်ဉီးက စစ်ကောင်စီ အုပ်ချုပ်ရေးမှူး ဦးဇော်မျိုးနိုင်တို့၏ နေအိမ်ကို ရောက်ရှိလာသည်။
ထိုအချိန်တွင် အုပ်ချုပ်ရေးမှူး ဦးဇာ်မျိုးနိုင်နှင့် အရပ်သားဦးဆန်းဉီးတို့သည် ဧည့်ခန်း၌ စကားထိုင်ပြောနေစဉ် အမည်မသိ လက်နက်ကိုင် အမျိုးသားနှစ်ဉီးက ဝင်ရောက်လာပြီး သေနတ်ဖြင့် ပစ်သတ်သွားကြောင်း မျက်မြင်တွေ့ရှိသည့် အမျိုးသားတစ်ဉီးက သျှမ်းသံတော်ဆင့်ကိုပြောသည်။
“ အုပ်ချုပ်ရေးမှူးနဲ့ အရပ်သားတစ်ဉီး စကားပြောနေချိန်မှာ သေနတ်နဲ့ပစ်သတ်သွားတာပဲ။ နှစ်ယောက်စလုံးသေတယ်။ ဒီဘက်ကတော့ ပြောနေကြတာ PDF တွေလာသတ်တယ်လို့ပြောကြတာပဲ” ဟု ၎င်းက ဆိုသည်။
အဆိုပါ အုပ်ချုပ်ရေးမှူးနှင့် ရွာသားတစ်ဦး အသတ်ခံရပြီးနောက် စစ်တပ်မှ ကျေးရွာတွင်းသို့ ဝင်ရောက်စစ်ဆေးမှူများ လုပ်ဆောင်ခဲ့ပြီး စစ်ကောင်စီမှ လာရောက်တပ်စွဲကာ လုံခြုံရေးအခြေအနေ တင်းကြပ်ထားသည်ဟု ဘုန်းကြီးကုန်းကျေးရွာ ဒေသခံများကပြောသည်။
“ခုရက်ပိုင်း ရွာငံမှာ အသတ်ခံရတာတွေ ခဏခဏ ကြားနေရတော့ စိတ်တောင် မလုံခြုံတော့ဘူး။ အခုက ကိုယ်မကျေနပ်ရင် သတ်လို့ရတယ်။ဆိုတဲ့ပုံစံဖြစ်လာတော့ စိတ်ယော လူယော လုံခြုံမှု မပေးနေဘူး။ အခြေနေကပိုဆိုးလာမှာ စိုးရိမ်တယ်။”ဟု ဘုရားကြီးကုန်းဒေသခံ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
အလားတူ ပြီးခဲ့သည် စက်တင်ဘာလ (၂၁)ရက်တွင်လည်း ရွာငံမြို့နယ်၊ သိမ်ကုန်းကျေးရွာမှ အုပ်ချုပ်ရေးမှူး ဇနီးမောင်နှံ အမည်မသိလက်နက်ကိုင် အဖွဲ့မှ သေနတ်ဖြင့် ပစ်ခတ် သတ်ဖြတ်ခဲ့သည်။
ယခုလက်ရှိ ရွာငံတွင် စစ်ရေးအရ ငြိမ်သက်နေသော်လည်း စစ်ဆေးရေးဂိတ်နှင့် ကျေးရွာများတွင် စစ်တပ်မှ တင်းကျပ်စွာ စစ်ဆေးနေသည်ဟု သတင်းရင်းမြစ်များ ထံမှ သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments