သျှမ်းပြည်တောင်ပိုင်း၊ရွာငံမြို့နယ် ၊နွားဘန်းကြီးကျေးရွာတွင် စစ်ကောင်စီတပ်များ တပ်စွဲထားပြီး ရွာခံများကို ဖုန်းအသုံးပြုခွင့် ပိတ်ပင်ထားကြောင်း သတင်းရင်းမြစ်များမှ သိရသည်။

ပြီးခဲ့သည့် နိုဝင်ဘာလ ဒုတိယပတ်မှ စပြီး နွားဘန်းကြီးရွာအတွင်း စစ်ကောင်စီတပ်မှ တပ်သား အများအပြား အင်အားဖြည့်တင်းကာ တပ်စွဲထားပြီး ကျေးရွာအတွင်း ဒေသခံများကို တောင်ယာသွားလာခြင်း၊ တခြားသော ကျေးရွာနှင့် လုပ်ငန်းခွင် သွားလာခြင်းကို ကန့်သတ်ထားပြီး ဖုန်းအသုံးပြုခြင်းကိုပါ ပိတ်ပင်လိုက်ကြောင်း နွားဘန်းကြီး ဒေသခံ အမျိုးသားတစ်ဉီးက ပြောသည်။

“ စစ်သားတွေက မျက်ခြေမပြတ်စောင့်ကြည့်နေကြတာ။ ဖုန်းသုံးလို့လည်း မရဘူး။ ဖုန်းသုံးတာ မြင်ရင် ဖုန်းယူပြီး စစ်ဆေးတယ်။ ဖုန်းသိမ်းတယ်။ တောင်ယာလည်း ပေးမသွားဘူး။ ဟိုနေ့ကတောင်ယာသွားတာ သူတို့မြင်တော့ အလုပ်မလုပ်ရဘဲ တစ်နေ့ကုန် တောင်ယာမှာ ဒူးထောက်ထိုင်ခိုင်းထားတာ။ညနေလောက်မှ ပေးးပြန်တာ။”ဟု ဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။

ထို့သို့ တောင်ယာ မသွားရသည့်အတွက်ကြောင့် ဒေသခံများ၏ စပါးများ ပျက်စီးကုန်ပြီး မိုးရွာလျှင် ပို၍ ပျက်စီးဆုံးရှုံးသွားမည်ကို စိုးရိမ်ကြောင်း ၎င်း အမျိုးသားတစ်ဦးက ထပ်လောင်းပြောသည်။

ထို့အပြင် ယမန့်နေ့ နိုဝင်ဘာလ (၂၅) ရက် နွားဘန်းကြီးရွာတွင် စစ်ကောင်စီတပ်မှ တော်လှန်ရေး အင်အားစု တစ်ခန်း တစ်ခုကို ဝင်ရောက်သိမ်းပိုက်နိုင်ခဲ့သည်ဟု စစ်ကောင်စီမှ သတင်းထုတ်ပြန်ထားသည်။

“ မနေ့က နွားဘန်းကြီးရွာနဲ့ သိပ်မဝေးတဲ့ တောင်ပေါ်မှာ သိမ်းမိတယ်လို့ကြားတယ်။ ကျနော်တို့လည်း သွားမကြည့်ရဲဘူး။ လူတွေတော့ မဖမ်းမိဘူးတဲ့ ။လက်နက်တွေ ဝတ်စုံတွေပဲ သိမ်းမိတာတဲ့။ ဘယ်အဖွဲ့ လို့တော့ တိကျမသိရသေးဘူး။ခုက တော်လှန်ရေးတပ်ဖွဲ့တွေက အများကြီးဆိုတော့ ခန့်မှန်းရခက်တယ်။ ရွာအတွင်းမှာလဲ ဘာမှ မလှုပ်သာဘူး။အခြေနေအရမ်းဆိုးနေတာ။” ဟု ဖြစ်စဉ်ကို သိရှိသူတစ်ဦးက ပြောသည်။

ထို့အပြင် စစ်မှုထမ်းရန်အတွက် ယခင်ကလို မဲနှိပ်ရွေးချယ်သွားမည် မဟုတ်ကြောင်းနှင့် ညဘက် အပြင်ထွက်သည့် လူများကို ဖမ်းဆီးပြီး စစ်မှုထမ်းရန်အတွက် အသုံးချမည်ဟု ကျေးရွာတွင်း စစ်တပ်ဘက်မှ ပြောကြားထားကြောင်း ၎င်းအမျိုးသားက ထပ်လောင်းပြောသည်။

နွားဘန်းကြီးကျေးရွာတွင် အိမ်ခြေ ၅၀၀ ကျော်ရှိပြီး လူဦးရေအားဖြင့် ၂ထောင်ကျော်ရှိသည်ဟု သိရပြီး အများအားဖြင့် တောင်ယာစိုက်ပျိုးပြီး အသက်မွေးဝမ်းကြောင်း ပြုနေရသူများ ဖြစ်သည်။

နွားဘန်းကြီး ရွာအတွင်း ၂၀၂၁ ခုနှစ် အာဏာသိမ်းချိန်မှ စပြီး တော်လှန်ရေးအင်အားစုများ ဝင်ရောက်နေသည်ဟု၍ စစ်တပ်များက အင်အား တစ်ရာခန့် တပ်စွဲထားခဲ့ပြီး ယနေ့အချိန်တွင် အင်အား (၁၀၀)နီးပါး ဝင်ရောက်တပ်စွဲထားကြောင်း သတင်းရင်းမြစ်များထံမှ သိရသည်။

အလုပ်သင် သတင်းထောက် နန်းလရောင် ရေးသားသည်။