သျှမ်းပြည်တောင်ပိုင်း၊ ဖယ်ခုံမြို့နယ် လအိ ကျေးရွာဖက်ရှိ ဘန်ကောက်စစ်ရှောင်စခန်းတွင် စစ်ရှောင်အများစု အအေးမိခြင်းကြောင်း ဖျားနာမှုရှိနေကြောင်း စစ်ရှောင်ကူညီနေသူ ထံမှ သိရသည်။
လက်ရှိအချိန်သည် ရာသီအကူးပြောင်းကာလဖြစ်သဖြင့် အအေးမိဖျားနာခြင်း၊ ငှက်ဖျားရောဂါနှင့် အရေပြားရောဂါများ အဖြစ်များနေပြီး စစ်ကောင်စီဘက်မှ ဆေးဝါးများနှင့် စားသောက်ကုန် တင်သွင်းခွင့် ပိတ်ထားတာကြောင့် ဆေးကုသရန်ခက်ခဲနေကြောင်း စစ်ရှောင် ကူညီနေသည့် အမျိုးသားတစ်ဉီးက သျှမ်းသံတော်ဆင့်ကိုပြောသည်။
“ရာသီအကူးပြောင်းဆိုတော့ အရမ်းအေးတယ်။ စောင်တွေ အဓိကလိုအပ်တယ်။ နေရာထိုင်ခင်းကတော့ မိုးကာတွေနဲ့ တဲတွေဆောက်ပြီးနေကြရတော့ လေမလုံတော့ အအေးမိတာတွေ ဖြစ်တယ်။ငှက်ဖျားတွေ ဖြစ်ကြတယ်။ စစ်ကောင်စီကလည်း ဆေးဝါးတွေ စားသောက်ကုန်တွေကို ပေးမသယ်ပဲ ဖြတ်ထားတော့ ဆေးဝါးလည်း အရေးပေါ်လိုအပ်နေတယ်။”ဟု စစ်ရှောင်ကူညီနေသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီသည် စစ်ဘေးရှောင်စခန်းကို ပစ်မှတ်ထားပြီး တိုက်ခိုက်နေသည့်အတွက် စစ်ရှောင်များကို လေကြောင်းအန္တရာယ် အသိပညာပေးခြင်းနှင့်ပတ်သက်ပြီး လိုအပ်နေကြောင်း၊ ထို့ပြင် လေကြောင်းဖြင့် နေ့စဉ်တိုက်ခိုက်မှုကြောင့် ကလေးများလည်း စိတ်ပိုင်းဆိုင်ရာ ထိခိုက်မှုများရှိနေကြောင်း ၎င်းအမျိုးသားက ဆိုသည်။
စစ်ရှောင်အများစုသည် မိုးဗြဲ ၊ဖယ်ခုံဘက်မှ လာရောက်ရှောင်တိမ်းနေသူများ ဖြစ်ပြီး စစ်ရှောင်ဦးရေ နှစ် ထောင်ဝန်းကျင်ရှိသည်။
စစ်ကောင်စီမှ လေကြောင်း တိုက်ခိုက်မှုကြောင့် အခြားနေရာသို့ ထပ်မံရှောင်တိမ်းသွားကြသူများလည်း ရှိသည်ဟု သိရသည်။
“စစ်ရှောင်တွေတော့ ဖယ်ခုံတို့ မိုးဗြဲတို့ဘက် ပိုများတယ်။ စစ်ရှောင်က နှစ်ထောင် လောက်ရှိမယ်။ ဟိုနေ့က ဗုံးကြဲခံရတော့ နေရာထပ်ရွှေ့ကုန်တယ်။ တချို့ကြတော့လဲ ကျန်နေသေးတယ်။ အများစုက အမျိုးတွေရှိတဲ့ဖက် သွားရှောင်ကြတာ။ အခြေနေကတော့ တော်တော်မလွယ်ဘူး။” ဟု အသက် ၃၀ ဝန်းကျင် အမျိုးသားတစ်ဦးက ပြောသည်။
စားသောက်ကုန်များကို စစ်ကောင်စီက သယ်ဆောင်ခွင့် မပေးသောကြောင့် စားနပ်ရိက္ခာမျာလည်း အကူညီလိုအပ်နေကြောင်း အဆိုပါ အမျိုးသားက ဆိုသည်။
ပြီးခဲ့သည့် နိုဝင်ဘာလ( ၁)ရက်တွင် စစ်ကောင်စီမှ ဘန်ကောက်စစ်ရှောင်စခန်းကို လေကြောင်းဖြင့် ဗုံးကြဲတိုက်ခိုက်ခဲ့သောကြောင့် အသက်( ၅၆ )နှစ်အရွယ် အမျိုးသမီးတစ်ဦး သေဆုံးသွား ပြီး အဆောက်ဦးများလည်း ပျက်စီးခဲ့ကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments