သျှမ်းပြည်တောင်ပိုင်း၊ ဖယ်ခုံမြို့နယ် လအိကျေးရွာရှိ ဘန်ကောက်စစ်ရှောင် စခန်းကို စစ်ကောင်စီမှ ဒုတိယအကြိမ် ဗုံးကြဲတိုက်ခိုက်ခဲ့ကြောင်း ဒေသတွင်း သတင်းအရင်းမြစ်များထံ စုံစမ်းသိရသည်။

ယနေ့ (နိုဝင်ဘာလ ၁၈ ရက်) နံနက် ၁၁ နာရီ အချိန်တွင် စစ်ကောင်စီမှ ဘန်ကောက်စစ်ရှောင် စခန်းကို လေကြောင်းဖြင့် (၆ ) ကြိမ် ဗုံးကြဲတိုက်ခိုက်ခဲ့သည်ဟု စစ်ရှောင် ကူညီနေသူ တစ်ဦးထံမှ သိရသည်။

“ လအိရွာနားဘက်က ဘန်ကောက်စစ်ရှောင်စခန်းကို ကြဲသွားတာ။ လေယာဉ်နဲ့ ၆ ကြိမ်လာပစ်တယ်။ အရင်က ဗုံးကြဲခဲ့တဲ့ စစ်ရှောင်စခ န်းပဲ။ သူတို့က စစ်ရှောင်တွေကို အဓိက တိုက်ခိုက်နေတာ။ သတိနဲ့ နေကြရင်တော့ အကောင်းဆုံးပေါ့။” ဟု စစ်ရှောင်ကူညီနေသူ တစ်ဦးက သျှမ်းသံတော်ဆင့်ကို ပြောသည်။

ယခုလက်ရှိတွင် သေဆုံးသူနှင့် ထိခိုက်ဒဏ်ရာရသူများကို အသေးစိတ်အခြေနေကို ၎င်း စစ်ရှောင် ကူညီနေသူမှ စုံစမ်းနေဆဲဖြစ်ကြောင်း ပြောသည်။

အဆိုပါ ဘန်ကောက်စစ်ရှောင်စခန်းသည် ဖယ်ခုံဖက်မှ စစ်ရှောင်လာသူနှင့် မိုးဗြဲဖက်မှ လက်နက်ကြီးကျသောကြောင့် စစ်ရှောင်များ လာရောက် တိမ်းရှောင်နေကြသည့် နေရာဖြစ်ပြီး လေကြောင်း တိုက်ခိုက်မှုကြောင့် အိပ်မပျော်သည်အထိ ရှိနေကြောင်း စစ်ရှောင်များထံမှ သိရသည်။

“ဒီစစ်ရှောင် စခန်းမှာတော့ မိုးဗြဲ နဲ့ ဖယ်ခုံဖက်က လူတွေ ပိုများတယ်။ ကြောက်လန့်မှုတွေကတော့ရှိတယ်။ စစ်တပ်ကိုလည်း ကြောက်ရတယ်။ လေကြောင်းကိုပိုကြောက်နေရတယ်။ ကားတစ်စီးက လေအရှိန်ဟုန်နဲ့ ဖြတ်သွားတာ တောင် လေယာဉ် လာလား ဘာလားနဲ့ ညအိပ်တာတောင် ကောင်းကောင်းမအိပ်ရဲကြဘူး။” ဟု ဘန်ကောက်စစ်ရှောင်စခန်း အနီး စစ်ရှောင်နေသူတစ်ဦးက ပြောသည်။

လက်ရှိလေကြောင်းဗုံးကြဲမှုကြောင့် သေဆုံးမှုနှင့် ဒဏ်ရာရရှိသည့် သတင်းအချက်အလက်ကို သျှမ်းသံတော်ဆင့်မှ ဆက်လက်စုံစမ်းနေဆဲ။

ထို့အပြင် ရေကြီးမှုကြောင့် စစ်ရှောင်များ အဓိက အားထားရသည့် စပါးခင်းများ ပျက်စီသွားမှုကြောင့် စားဝတ်နေရေးအတွက် ခက်ခဲနေပြီး စစ်ကောင်စီဖက်မှလည်း ဆေးဝါးနှင့် စားသောက်ကုန်များ တင်သွင်းခွင့် ပိတ်ဆို့ထားကြောင်း ၎င်း စစ်ရှောင်နေသူက ထပ်လောင်း ပြောသည်။

ပြီးခဲ့သည့် စက်တင်ဘာလ (၅) ရက်တွင်လည်း ဘန်ကောက်စစ်ရှောင်စခန်းကို စစ်ကောင်စီမှ ဗုံးကြဲခံရမှုကြောင့် ကလေးငယ်နှင့် အမျိုးသမီးအပါဝင် (၁၀)ဦးထက်မနည်း သေဆုံးသွားခဲ့သည်။

ယခုလက်ရှိတွင် စစ်ကောင်စီမှ ဖယ်ခုံ၊ လွိုင်ကော်နှင့် မိုးဗြဲဘက်ကို စစ်အင်အားအလုံးရင်းဖြင့် အင်အားဖြည့်နေပြီး ပွင့်လင်းရာသီဖြစ်သဖြင့် တန်ပြန်ထိုးစစ်ဆင်နိုင်ကြောင်း နိုင်ငံရေး သိကျွမ်းသူများက မှတ်ချက်ပြုထားသည်။

အလုပ်သင် သတင်းထောက် နန်းလရောင် ရေးသားသည်။