သျှမ်းတောင်၊ ရပ်စောက်မှ သျှမ်းမြောက်သို့ သွားရာလမ်းကို စစ်ကောင်စီတပ်က ရက်အကန့်အသတ်မရှိ ပိတ်လိုက်ကြောင်း ယာဥ်မောင်းများက ယမန်နေ့ (နိုဝင်ဘာလ ၁၂) တွင် ပြောသည်။
သျှမ်းတောင်မှ မြောက်ပိုင်းသွားသည့် ရပ်စောက်-ကျောက်ဂူ လမ်းပိုင်း၊ ရပ်စောက်မြို့ အထွက်ရှိ စစ်ကောင်စီ စစ်ဆေးရေးဂိတ်က ယမန်နေ့ (နိုဝင်ဘာ ၁၂)ရက် နံနက် အစောပိုင်းတွင် ပိတ်ဆို့လိုက်သဖြင့် မြောက်ပိုင်းသွားမည့် ကားများ ပြန်လှည့်လာရသည်ဟု ယာဉ်မောင်း တဦးက ဆိုသည်။
“ရပ်စောက် အထွက် စစ်တပ် စစ်ဆေးရေးဂိတ်က မြောက်ပိုင်းသွားမယ့်ကားတွေ လုံးဝ ပေးမဖြတ်တော့ဘူး။ မြောက်ပိုင်းကလာတဲ့ ကားတွေကတော့ (တောင်ပိုင်း) လာလို့ရတယ်။ မြောက်ပိုင်းဘက် ပေးမသွားတော့တာ။ ဘယ်လောက်ကြာမလဲ ဆိုတာတော့ ဂိတ်က စစ်သားတွေလည်း မသိဘူး ပြောတယ်” ဟ ၎င်းကရှင်းပြသည်။
သျှမ်းတောင်-မြောက်ကို ဆက်သွယ်ထားသည့် ရပ်စောက်-အင်းတော- ကျောက်ဂူ- နမ့်လန်လမ်း သည် ကားအသွားအလာများသည့် လမ်းဖြစ်၍ ယခုကဲ့သို့ ပိတ်ပင်လိုက်သဖြင့် ခရီးသွားများ ပိုမို ဒုက္ခရောက်မည်ဟု တခြား ယာဉ်မောင်း တဦးက သုံးသပ်သည်။
“ဘာကြောင့် ပိတ်လဲတော့ မသိဘူး။ သျှမ်းမြောက်ကို ပေးမပြန်ချင်တဲ့ သဘော ထင်တာပဲ။ အဲလမ်းပိတ်လည်း တခြားလမ်းတွေကတော့ သွားနေကြမှာပဲလေ။ ခရီးသည်တွေ ပိုကုန်မယ် ပိုဒုက္ခခံရမယ်။ တကယ်ဆို ရပ်စောက် အထွက်ဂိတ်ပဲ စစ်တပ်ထိုင်နိုင်တာ၊ စစ်တပ်ဂိတ် အရှေ့နားမှာ သျှမ်းတပ် (SSPP) ထိုင်တယ်” ဟု ၎င်းကမှတ်ချက်ပြုသည်။
စစ်ကောင်စီက ၄င်းတို့ ဆုံးရှုံးထားသည့် သျှမ်းမြောက်ရှိ မြို့များကို ဆက်တိုက်ဗုံးကြဲ တိုက်ခိုက်နေရာက ယခုကဲ့သို့ လမ်းပိတ်ဆို့ခြင်းသည် လားရှိုး ထိုးစစ် အတွက် ဖြစ်နိုင်သည်ဟု ထင်ကြေးပေးမှုများ ရှိနေရာ သျှမ်းသံတော်ဆင့် အနေဖြင့် သီးခြား အတည်ပြုနိုင်ရန် ကြိုးစားနေဆဲ ဖြစ်သည်။
စစ်ကောင်စီသည် သျှမ်းမြောက်မြို့များကို နေ့စဥ် ဗုံးကြဲနေရာ ယမန်နေ့ည မိးကုတ်မြို့ ဗုံးကြဲမှုနှင့် ယမန်နေ့ (နိုဝင်ဘာ ၁၂)ရက် မွန်းလွဲပိုင်း နောင်ချိုမြို့ ဗုံးကြဲမှုများကြောင့် အနည်းဆုံး အရပ်သား ပြည်သူ ၂၀ သေဆုံးပြီး ၂၀ ကျော် ထိခိုက်ဒဏ်ရာ ရရှိထားသည်။
Leave a Comments