သျှမ်းပြည်တောင်ပိုင်း ပင်လောင်း-ဖယ်ခုံအစပ်ရှိ ဗန်းမောက်ရွာတွင် စစ်ကောင်စီ၏ ဒရုန်းဗုံးကြဲချခြင်းကြောင့် မိန်းကလေးတစ်ဦး အပါအဝင် စစ်ဘေးရှောင် နှစ်ဦး သေဆုံးပြီး (၇) ဦး ဒဏ်ရာရရှိခဲ့ကြောင်း စုံစမ်းသိရှိရသည်။
ယမန်နေ့ (အောက်တိုဘာလ ၃၁ ရက်)တွင် ပင်လောင်းနှင့် ဖယ်ခုံမြို့နယ်အစပ်ရှိ ဗန်းမောက်ရွာနှင့် အနီးတစ်ဝိုက်တွင် စစ်ကောင်စီတပ်၊ ပအိုဝ်းပြည်သူ့စစ် (PNO) ပူးပေါင်းတပ်ဖွဲ့နှင့် ကရင်နီအမျိုးသားများ ကာကွယ်ရေးတပ်ဖွဲ့ (KNDF)၊ တော်လှန်ရေးအင်အားစု PDF တို့ တိုက်ပွဲ ပြင်းထန်စွာ ဖြစ်ပွားခဲ့သည်။
ထိုတိုက်ပွဲဖြစ်ပွားပြီးနောက်ပိုင်း ဗန်းမောက်ရွာရှိ ပြည်သူများ ထော်လာဂျီ၊ နှင့်စစ်ဘေးရှောင်ရန် ပြင်ဆင်နေစဉ် စစ်ကောင်စီတပ်မှ ဒရုန်းဗုံးဖြင့် ကြဲချတိုက်ခိုက်ခဲ့ခြင်းကြောင့် မိန်းကလေးငယ်တစ်ဦး အပါအဝင် စစ်ဘေးရှောင် နှစ်ဦး သေဆုံးသွားပြီး (၇)ဦး ဒဏ်ရာရ ရှိခဲ့ကြောင်း သတင်းရင်းမြစ်ထံမှ သိရသည်။
“မနေ့က တိုက်ပွဲ ပြန်ဖြစ်တော့ စစ်ကောင်စီက ရွာထဲကနေ ထွက်ခိုင်းတာ။ စစ်ရှောင်က ၁၀၀ လောက်ရှိတယ်။ စာသင်ကျောင်းမှာ စုပြီးစစ်ရှောင်ရတာ၊ အဲကနေထွက်ဖို့ ထော်လာဂျီတွေ ကားတွေနဲ့ ပြင်တာပေါ့လေ၊ ကားက မြန်တော့ မထိလိုက်ဘူး။ ဒရုန်းဗုံးက ထော်လာဂျီကိုထိပြီး ၂ ဦးသေ၊ ၇ ဦးလောက် ဒဏ်ရာရသွားတယ်” ဟု ဖြစ်စဉ်သိရှိသူ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတိုက်ပွဲ ဆက်လက်ပြင်းထန်နေသည့် ပင်လောင်းမြို့နယ် ဗန်းမောက်၊ နောင်ဝိုးနှင့် ကျေးရွာများမှာ ဖုန်းလိုင်း အင်တာနက်လိုင်းများ ဖြတ်တောက်ထားကြောင်း ၎င်းအမျိုးသားက ထပ်လောင်း ပြောသည်။
ထိုကဲ့သို့ ဒရုန်းဖြင့် တိုက်ခိုက်ခံရခြင်းမှာ ဗန်းမောက်ရွာမှ စစ်ဘေးရှောင်များကို ထွက်ခွာခိုင်းသည့် စစ်ကောင်စီ၊ PNO ပူးပေါင်းတပ်နှင့် နောင်ဝိုးရွာတွင် တပ်စွဲထားသည့် စစ်ကောင်စီပူးပေါင်းတပ်တို့အကြား အချင်းချင်း ညှိနှိုင်းဆောင်ရွက်မှု မရှိခြင်းကြောင့် ဒရုန်းဖြင့် မှားယွင်းပစ်ခံရကြောင်း ဒေသခံများက ပြောသည်။
“တကယ်တော့ စစ်ကောင်စီတို့ ပြည်သူ့စစ်တို့ ကြားမှာ အချင်းချင်း မညှိထားကြတာဖြစ်မယ်။ စစ်ကောင်စီတို့ PNO တို့က နောင်ဝိုးဘက်၊ နမ့်ဖာမူဘက်မှာ တပ်စွဲထားတယ်လေ။ ဗန်းမောက်ဘက်က ထွက်လာတဲ့သူအကုန် ပစ်မိန့်ချထားတော့ သူတို့က ပစ်ချလိုက်တဲ့သဘောပေါ့။ ကြားထဲက ပြည်သူပဲ နစ်နာသွားတာပေါ့” ဟု စစ်ဘေးရှောင်တစ်ဦးက ပြောသည်။
ယခုဒရုန်းဗုံးကြဲခံရသည့် ဗန်းမောက်ရွာသည် ပင်လောင်းမြို့နှင့် (၂၅) မိုင်ခန့် ကွာဝေးပြီး စစ်ဘေးရှောင်အများအပြား ပင်လောင်းမြို့ပေါ်သို့ ထပ်မံတိမ်းရှောင်လာကြသည်။
ပင်လောင်းမြို့နှင့် နောင်တရားမြို့ဘက်တွင် စစ်ဘေးရှောင်ဦးရေများလာတာကြောင့် နေရာထိုင်ခင်းနှင့် စားနပ်ရိက္ခာများ အရေးပေါ် လိုအပ်နေကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်၊၊
Leave a Comments