မြန်မာနိုင်ငံတွင် စစ်အာဏာသိမ်းပြီးနောက်ပိုင်း နိုင်ငံရေးနှင့် ဆက်စပ်ပြီး သေဆုံးသူ (၆) ထောင်နီးပါး ရှိလာကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က အောက်တိုဘာလ (၃၀) ရက်နေ့တွင် ထုတ်ပြန်လိုက်သည်။
ပြီးခဲ့သည့် ၂၀၂၁ ခုနှစ် ဖေဖော်ဝါရီလ ၁ ရက် စစ်အာဏာသိမ်းမှု ဖြစ်စဉ် စတင်ချိန်မှ ယမန်နေ့ (အောက်တိုဘာ ၃၀ ရက်) အထိ နိုင်ငံရေးနှင့် ဆက်စပ်ပြီး စစ်ကောင်စီတပ်၏ ဖမ်းဆီးထိန်းသိမ်းခံရပြီးနောက် သတ်ဖြတ်ခံခဲ့ရခြင်းကြောင့် ပြည်သူစုစုပေါင်း (၅၉၀၁) ဦး သေဆုံးခဲ့ရကြောင်း AAPP ထုတ်ပြန်ချက်အရ သိရသည်။
၎င်းတို့အထဲတွင် ကလေး (၆၅၅) ဦးနှင့် အမျိုးသမီး (၁၃၀၀) နီးပါးအထိ သေဆုံးခဲ့ရပြီး အတည်ပြုရန် လိုအပ်နေဆဲ သေဆုံးမှု အရေအတွက်မှာ (၂၅၀၀) ခန့်အထိ ရှိနေကြောင်း ထုတ်ပြန်ချက်တွင် ဖော်ပြထားသည်။
ထို့အပြင် ထောင်တွင်းသေဒဏ် ချမှတ်ခံရသူ (၁၂၅) ဦးနှင့် မျက်ကွယ်သေဒဏ် ချမှတ်ခံရသူ (၄၄) ဦးရှိပြီး စစ်ကောင်စီ၏ သေဒဏ်ချမှတ်ခံရသူ စုစုပေါင်း (၁၆၉) ဦးအထိ ရှိနေကြောင်း ထုတ်ပြန်ချက်တွင် ဆိုထားသည်။
စစ်အာဏာသိမ်းပြီးနောက်ပိုင်း သုံးနှစ်ကျော်ကာလအတွင်း မြန်မာနိုင်ငံတစ်ဝန်းတွင် ဒီမိုကရေစီ အရေး လှုပ်ရှားသူနှင့် အရပ်သားများ ဖမ်းဆီးခံရသူ စုစုပေါင်း ( ၂၇၆၁၀) ဦးရှိခဲ့ပြီး ၎င်းတို့အထဲမှ (၂၁၀၀၀) ကျော်မှာ ဆက်လက်ထိန်းသိမ်းခံနေရဆဲ ဖြစ်သည်။
အဆိုပါ ဖမ်းဆီးခံရသူများထဲတွင် ကလေးငယ်များ စုစုပေါင်း (၅၇၃) ဦးနှင့် အမျိုးသမီး (၅၇၂၈) ဦးတို့ ပါဝင်ကြောင်း သိရသည်။
အခြားတဘက်တွင် “၁၀၂၇ စစ်ဆင်ရေး” ဒုတိယပိုင်းအတွင်း လားရှိုးမြို့ အကျဉ်းထောင်တွင် ဇူလိုင်လ နောက်ဆုံးပတ်က လက်နက်ကြီးကျရောက်ပေါက်ကွဲခဲ့ရာ အကျဉ်းသားအချို့ ထွက်ပြေးလွတ်မြောက်သွားခဲ့ပြီး ပြည်သူ့လွှတ်တော် ဒုဥက္ကဋ္ဌ ဦးထွန်းထွန်းဟိန် အပါအဝင် နိုင်ငံရေးအကျဉ်းသားများကို ကိုးကန့်တပ်ဖွဲ့ MNDAA မှ သက်ဆိုင်ရာအဖွဲ့အစည်းများထံ လွှဲအပ်ပေးခဲ့ကြောင်း စစ်ရေးသတင်းရင်းမြစ်ထံမှ သိရသည်။
အလားတူ သီပေါမြို့ကို TNLA ပူးပေါင်းတပ်ဖွဲ့ ထိုးစစ်ဆင်တိုက်ခိုက်နေစဉ်အတွင်း ဩဂုတ်လ (၁၀) ရက်နေ့တွင် သီပေါအကျဉ်းထောင်ကို TNLA နှင့် PDF များဘက်မှ ဖွင့်ပေးခဲ့ရာ နိုင်ငံရေးအကျဉ်းသားများကို ဆန်တစ်အိတ်စီ ပေး၍ ပြန်လွှတ်ပေးခဲ့ကြောင်း သီပေါဒေသခံများက ပြောသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments