သျှမ်းပြည်တောင်ပိုင်း၊ တောင်ကြီးမြို့နယ်၊ အေးသာယာမြို့တွင် စက်ရုံလုပ်ငန်းများမှ ထုတ်လွှတ်နေသော ရေဆိုး အနံ့ဆိုးများကြောင့် အနီးအနားတွင်နေထိုင်သည့် ပြည်သူများ အခက်ကြုံနေရကြောင်း သတင်းရရှိသည်။​

အေးသာယာမြို့သည် စက်ရုံများလည်ပတ်ရန်အတွက် စက်မှုဇုန်သီးသန့် အကောင်အထည်ဖော်ထားသော်လည်း လက်ရှိတွင် လူနေအိမ်များတည်ရှိရာ ရပ်ကွက်များအတွင်းလည်ပတ်နေသော စက်ရုံများမှ အနံ့ဆိုးများ၊ ရေဆိုးရေညစ်များအား စနစ်တကျစွန့်ပစ်ခြင်း မရှိသည့်အတွက် အနီးအနားတွင်နေထိုင်သော မြို့ခံများမှာ လေမသန့်ရှင်းခြင်း၊ မူးဝေခြင်းများကို ခံစားလာကြောင်း သိရသည်။

“စက်မှုဇုန်ဆိုပေမယ့် ဘေးမှာလူနေအိမ်တွေ တော်တော်များများရှိတယ်၊ အနံ့ရှူတာကြာလာရင် ရောဂါဖြစ်မှာ ကြောက်ရတယ်၊ အဲ့နားတဝိုက်ရောက်ရင် သီးသန့်ရှာစရာမလိုဘူး၊ အနံ့ဆိုးကြီးရပါလိမ့်မယ်” ဟု ကြက်ဥကဒ်များထုတ်လုပ်သည့် စက်ရုံ အနီးတွင်နေထိုင်သော မြို့ခံအမျိုးသမီးတစ်ဦးက သျှမ်းသံတော်ဆင့်သို့ ပြောသည်။

အလားတူ မုန့်တိုက်စက်ရုံတစ်ခုအနီးတွင်လည်း ရေဆိုးရေညစ်များအား လမ်းဘေးသို့စွန်ပစ်ခြင်း၊ မုန့်ဖုတ်ရာတွင် အသုံးပြုသည့် တာရှည်ခံဆေးများ၏ အနံ့များကြောင့် မူးဝေ၊ အော့အန်ခြင်းများပါ ကြုံတွေနေရခြင်းများရှိနေကြောင်းလည်း သိရသည်။

“အဲ့နားကဖြတ်သွားတာတောင် တော်တော်ဆိုးဆိုးဝါးဝါးနံနေတာ၊ အနီးနားနေတဲ့သူတွေဆို ဘယ်လိုနေမလဲမသိ၊ အစားအသောက်နဲ့ ပတ်သတ်တာမျိုးကို ဒီလို အနံ့ဆိုးတွေထွက်ပြီး ထုတ်လာတဲ့ မုန့်တွေက စားသုံးသူအတွက် စိတ်ချရပါ့မလား စိုးရိမ်တယ်” ဟု အေးသာယာမျိုးခံ တစ်ဦးကပြောသည်။

စစ်အာဏာသိမ်းမှုနောက်ဆက်တွဲ အကျိုးဆက်များကြောင့် မြန်မာနိုင်ငံအတွင် ကုန်ဈေးနှုန်းများမှာလည်း အဆမတန်မြင့်တက်လာခဲ့ပြီးနောက် တနိုင်တပိုင်လုပ်ကိုင်နေသော စီးပွားရေးလုပ်ငန်းငယ်များအပေါ်လည်း ကြီးမားသော သက်ရောက်မှုများဖြစ်လာခဲ့သည်။

ထို့ကြောင့် လုပ်ငန်းဆက်လက်လည်ပတ်ရန် ခက်ခဲလာခြင်း၊ ထုတ်လုပ်သော ကုန်ပစ္စည်းအရည်အသွေးများလည်း နိမ့်ကျလာနိုင်ခြင်း စသည့် ပြဿနာမျိုးစုံကိုလည်း အသေးစားနှင့် အလတ်စားစီးပွားရေးလုပ်ငန်းများတွင် ကြုံတွေ့နေရလျက်ရှိသည်။

ကုန်ထုတ်လုပ်မှု အရည်အသွေးများနိမ့်ကျလာခြင်းသည် စားသုံးသူပြည်သူလူထုအတွက်လည်း ဆိုးဝါးသော သက်ရောက်မှုများစွာကြုံတွေ့လာနိုင်ပြီး ကျန်းမာရေးနောက်ဆက်တွဲဆိုးကျိုးများကို ရင်ဆိုင်လာနေရသည်။

အလုပ်သင် သတင်းထောက် ယူဂျင်း ရေးသားသည်။​