သျှမ်းပြည် တောင်ကြီးမြို့နယ် အေးသာယာမြို့ရှိ ဝိုင်ခြံအနီးတွင် မန္တလေးမှပြန်လာသည့်အိမ်စီးကား ၁ စီးမောင်းနှင်နေစဉ်အပူလွန်ကဲပြီး မီးလောင်မှုဖြစ်ပွားခဲ့ကြောင်း စုံစမ်းသိရသည်။

ယမန်နေ့ ဧပြီလ ၂၃ ရက် ညပိုင်း ၈ နာရီဝန်းကျင်တွင် ဖြစ်ပွားခဲ့ပြီး ထိခိုက်ဒဏ်ရာရသူမရှိကြောင်း၊ မြို့နယ်မီးသတ်တပ်ဖွဲ့ဝင်များနှင့် အေးသာယာကြက်ခြေနီးတပ်ဖွဲ့ဝင်များက သွားရောက်ကူညီ ဆောင်ရွက်ပေးခဲ့သည်ဟု မြို့နယ်မီးသတ်တပ်ဖွဲ့ဝင် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကားမောင်းနေရင်းကနေ မီးလောင်လို့ဆင်းပြေးတယ် ပြောတယ်ဗျ။ လိုင်းကားတော့ မဟုတ်ဘူး၊ အိမ်စီးကားပါ။ ဖြစ်သွားတာတော့ အေးယာသာဝိုင်ခြံအကျော်လေးနားက ထိခိုက်ဒဏ်ရာသူတော့ မရှိဘူး” ဟု ၎င်းကပြောသည်။

အဆိုပါကားပေါ်တွင်ပါလာသူ အမျိုးသား ၂ ဦးနှင့် အမျိုးသမီး ၃ ဦးတို့ဖြစ်ပြီး မန္တလေးမှပြန်လာသူများဖြစ်ကာ တောင်ကြီးမြို့၊ ရေအေးကွင်းရပ်ကွက်တွင် နေထိုင်သူများဖြစ်ကြောင်းသိရသည်။

ပြီးခဲ့သည့် ဧပြီလ ၂၁ ရက်တွင်လည်း တောင်ကြီးမြို့ရှိ မြစိမ်းတောင်တွင် တောမီးလောင်မှုဖြစ်ပွားခဲ့သည်။

လက်ရှိ နွေရာသီကာလတွင် နေအပူချိန်လွန်ကဲသောကြောင့် တောမီးလောင်ခြင်းများအပြင် အပူဒဏ်ကြောင့် ကြွက်တက်ခြင်း၊ အပူကြောင့် နွမ်းနယ်ခြင်း၊ လေဖြတ်ခြင်း၊ အပူလွန်ကဲခြင်း စသည့် နာမကျန်းမှုများကို ခံစားနေရကြကြောင်း သိရသည်။