သျှမ်းပြည်တောင်ပိုင်း၊ ဖယ်ခုံမြို့တွင် လူမရှိတော့သည့် ပြည်သူနေအိမ်များကို စစ်ကောင်စီမှ မီးရှို့ဖျက်ဆီးခဲ့ကြောင်း ဒေသခံ များထံမှ စုံစမ်းသိရသည်။
ဖယ်ခုံမြို့သည် သျှမ်း- ကရင်နီပြည် နယ်စပ်တွင်တည်ရှိပြီး ပြီးခဲ့သည့် နိုဝင်ဘာ လ ၁၁ ရက်မှစပြီး တော်လှန်ရေးအင်အားစုအဖွဲ့ PDF တပ်ပေါင်းစုနှင့် စစ်ကောင်စီတို့ တိုက်ပွဲစတင်ခဲ့သည်။
ထိုသို့ တိုက်ပွဲဖြစ်ပွားပြီးနောက် ဖယ်ခုံမြို့ခံများသည် ဘေးလွတ်ရာသို့ တိမ်းရှောင်ခဲ့ရပြီး ဖယ်ခုံမြို့ဒေသခံများ နေအိမ်၌မရှိသည်မှာ တစ်နှစ်နီးပါးရှိလာကာ စစ်ကောင်စီက ဖယ်ခုံမြို့ပေါ်တွင် တပ်စွဲ ထိန်းချုပ်ထားသည်။
ထိုစစ်ကောင်စီ တပ်စွဲထိန်းချုပ်သည့် ဖယ်ခုံမြို့ နန်းဟူးရပ်ကွက် ဆေးရုံကုန်းအနီးတဝှိက်ကို စစ်ကောင်စီက ပြီးခဲ့သည့် အောက်တိုဘာ ၂၄ရက်တွင် မီးရှို့ဖျက်ဆီးခဲ့ကြောင်း မျက်မြင်တွေ့ရှိသည့် ဒေသခံအမျိုးသားက သျှမ်းသံတော်ဆင့်ကိုပြောသည်။
“ မီးခိုးငွေ့တွေကို အရှေ့ဖက်ကမ်းထိတောင် မြင်နေရတယ်။ မီးအကြီးလောင်တဲ့ပုံပဲ။ မြို့ခံမရှိတာလည်း တစ်နှစ်ရှိပြီ။ သူတို့က မကြာခဏ ဆိုသလို မီးတွေ ရှို့နေတာ။ စစ်တပ်က မြို့ပေါ်မှာ တပ်စွဲထားတော့ မီးဝင်ငြိမ်းဖို့လည်း မဖြစ်နိုင်ခဲ့ဘူး။ ဒီတိုင်းပဲ ကြည့်နေတာပဲ တတ်နိုင်တော့တယ်။” ဟု မီးလောင်နေသည်ကို မြင်တွေ့ခဲ့ရသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီမှ မြို့တွင်းမှာ တပ်စွဲထားတာကြောင့် ပျက်စီးမှုနေအိမ်များကို အတိကျမသိရဘဲ ညောင်ကုန်း ရပ်ကွက်(၅) တွင် နေအိမ်များ အကုန်နီးပါးမီးလောင်ပျက်စီးသွားခဲ့ကြောင်း အဆိုပါအမျိုးသားက ပြောသည်။
ထို့အပြင် စစ်ကောင်စီမှ နေအိမ်များကို မီးရှို့လိုက်တာကြောင့် ပြန်စရာနေအိမ်များနှင့်အတူ အနာဂတ်မျှော်လင့်ချက်များလည်း ပျက်စီးသွားကြောင်း ဒေသခံ အမျိုးသားတစ်ဦးက ပြောသည်။
“ နှစ်တွေအကြာကြီးနေခဲ့တဲ့ နေရာလေ၊ ပြီးအိမ်တစ်လုံးဖြစ်လာဖို့ဆိုတာကလွယ်တာမဟုတ်ဘူး၊၊ ဒီလိုမျိုးမီးရှို့ပစ်တာတော့ မဖြစ်သင့်ဘူး၊၊ အကယ်၍ ဖယ်ခုံပြန်နေလို့ရပြီဆိုရင်တောင် နေစရာအိမ်မှ မရှိတော့ဘူးလေ၊၊ အနာဂတ်တွေပါ ပျက်စီးသွားသလိုပဲ။ လူမဆန်တဲ့လုပ်ရပ်တွေကို အမြန်ဆုံးရပ် ပေးကြဖို့ ပြောချင်ပါတယ်။” ဟု အဆိုပါ အမျိုးသားက ထပ်လောင်းပြောသည်။
လက်ရှိ ဖယ်ခုံမြို့နှင့် ပင်လောင်းကြားတွင် စစ်ကောင်စီ လက်အောက်ခံ PNO ပြည်သူ့စစ်နှင့် တော်လှန်ရေးအင်အားတပ်ပေါင်းစုတို့ တိုက်ပွဲပြင်းထန်နေပြီး ဒေသခံ အများစု ပင်လောင်းမြို့ပေါ်သို့ စစ်ရှောင်လာကြကြောင်း သိရသည်။
ဖယ်ခုံနှင့် ပင်လောင်းမြို့နယ်ကြား ဆောင်လန်ရှိ စက်လှေဂိတ်ကို စစ်ကောင်စီမှ လေယာဥ်နှင့်လာရောက်ဗုံးကြဲသဖြင့် စက်လှေထွက်မရသောကြောင့် စစ်ဘေးရှောင်များ ပိတ်မိနေကြောင်း သတင်းအရင်းမြစ်များက ပြောသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments