နိုင်ငံကို ၂၂ နှစ်ကြာ အုပ်စိုးခဲ့သည့် စစ်အာဏာရှင်ဟောင်း ဗိုလ်ချုပ်မှူးကြီးသန်းရွှေ၏ သမက်ဖြစ်သူ ဒေါက်တာနေစိုးမောင် ကို မန္တလေးတိုင်း၊ ပြည်ကြီးတံခွန်မြို့မရဲစခန်းတွင် ဖမ်းဆီး အမှုဖွင့်ထားကြောင်း စစ်ကောင်စီက ယမန်နေ့ (အောက်တိုဘာလ ၂၄ ရက်) ညပိုင်းတွင် ထုတ်ပြန်သည်။

လူမှုကွန်ရက်တွင် ရေးသားမှုများနှင့် ပတ်သက်၍ နိုင်ငံတော် တည်ငြိမ်အေးချမ်းမှုကို ထိခိုက်စေသည်ဟု ဆိုကာ အောက်တိုဘာလ ၂၃ ရက်၊ ည ၆ နာရီခွဲတွင် ပြည်ကြီးတံခွန်မြို့မရဲစခန်း၌ ဖမ်းဆီး အမှုဖွင့် အရေးယူထားသည်ဟု ထုတ်ပြန်ချက်တွင် ဖေါ်ပြထားသည်။

ဖမ်းဆီးအကျဉ်းချ ခံနေရသည့် မန္တလေး ဝန်ကြီးချုပ် ဒေါက်တာ ဇော်မြင့်မောင် ကွယ်လွန်သည့် အောက်တိုဘာလ ၇ ရက်နေ့တွင် ဒေါက်တာနေစိုးမောင်က “ယောကျ်ားတန်မဲ့ မျက်ရည်ကျမိပါတယ်။ ကိုယ့်ပြည်သူအတွက် ကိုယ်တာဝန်ယူတဲ့ ဒေသ တိုးတက်အောင် အားကြိုးမာန်တက် တောင်ရွက်ပေးခဲ့ပေမဲ့ ဆရာ နေမကောင်းတဲ့ ကာလမှာ ကျန်းမာရေး စောင့်ရှောက်မှု မပေးနိုင်ခဲ့လို့ စိတ်မကောင်းဖြစ်ရပါတယ် ဆရာ။ မြင့်မြတ်တဲ့ဘုံမှာ အေးချမ်းစွာ လဲလျောင်းလို့ အိပ်စက်အနားယူပါတော့ ဆရာ။ နောင်ဘဝမှာ လူဖြစ်ခဲ့လျှင် လွတ်လပ် တရားမျှတပြီး လူကိုလူလိုဆက်ဆံတဲ့နိုင်ငံမှာ လူပြန်ဖြစ်ပြီး လူသားတွေရဲ့အကျိုးကို ဆက်လက်သယ်ပိုးပေးနိုင်ပါစေ ဆရာ”ဟု ဒေါက်တာ နေစိုးမောင်က ၎င်း၏လူမှုကွန်ရက်တွင် ရေးသားခဲ့သည်ကို တွေ့ရသည်။

အောက်တိုဘာလ ၉ ရက်နေ့တွင် “We Free” စာတန်းပါ အင်္ကျီကို ဝတ်ဆင်ပြီး မန္တလေးကျုံးရှေ့တွင် ရိုက်ထားသည့် ပုံများနှင့်အတူ “လေးစားသမှုနဲ့ ဂါဝရပြုအပ်ပါတယ်။ ဆရာ့လက်ထက်မှာ ပြည်သူတွေကို ပျော်ရွှင်အောင် ထားနိုင်ခဲ့သလို မန္တလေးသူ မန္တလေးသားတွေကိုလည်း စိတ်အားတက်ကြွစေခဲ့တဲ့ မန္တလေးမြို့ကြီးကို Smart City ဖြစ်စေဖို့ ကြိုးစားခဲ့တဲ့ ဆရာ့ကို လေးစားပါတယ်။ မန္တလေးရောက်ရင် မနက်ပိုင်းနဲ့ ညနေပိုင်းတွေမှာ ကျုံးပတ်လမ်းမှာ လမ်းလျှောက် စက်ဘီးစီးတိုင်း ဆရာနဲ့ မြို့တော်ဝန်တို့ရဲ့ လက်ရာတွေကို ရင်သတ်ရှုမောတွေ့ရပါတယ် ဆရာ။ ပြည်သူတွေအတွက် စွမ်းဆောင်ချက်တွေကို အမှတ်ရပြီး ဂါဝရပြုလိုက်ပါတယ်။ ဆရာ မြင့်မြတ်သောဘုံမှာ ခံစားနိုင်ပါစေ” ဟု လူမှုကွန်ရက်တွင် ထပ်မံ ရေးသားခဲ့ပြီးနောက် အောက်တိုဘာလ ၁၃ ရက်နေ့တွင် ဒေါက်တာနေစိုးမောင် ဖမ်းဆီးခံရသည် ဆိုသည့် သတင်းများ ထွက်ပေါ်ခဲ့သည်။

ဒေါက်တာနေစိုးမောင် သည် အာဏာရှင်ဟောင်း ဗိုလ်ချုပ်မှူးကြီးသန်းရွှေ ၏ သမီး ဒေါ်ကြည်ကြည်ရွှေ ၏ ခင်ပွန်းဖြစ်ပြီး ဦးသန်းရွှေ၏ အချစ်ဆုံး မြေးဖြစ်သူ ကိုနေရွှေသွေးအောင်၏ ဖခင်လည်း ဖြစ်သည်။

ဒေါက်တာနေစိုးမောင်၏ ဖခင်မှာ ဗိုလ်ချုပ်တင်စိန် ဖြစ်ပြီး အာဏာရှင် ဦးနေဝင်း လက်ထက် မွေးမြူရေးနှင့် ရေလုပ်ငန်းဝန်ကြီးဌာန ဝန်ကြီးနှင့် ဒုကာကွယ်ရေးဝန်ကြီးအဖြစ် တာဝန်ထမ်းဆောင်ခဲ့ပြီးနောက် ဗိုလ်ချုပ် ရာထူးဖြင့် အငြိမ်းစားယူကာ ဗီယက်နမ်နိုင်ငံဆိုင်ရာ မြန်မာသံအမတ်ကြီးအဖြစ် တာဝန်ထမ်းဆောင်ခဲ့သူ ဖြစ်သည်။

ဒေါက်တာနေစိုးမောင်သည်လည်း တပ်မတော်ဆေးတပ်တွင် ဗိုလ်မှူးကြီး အဆင့်ဖြင့် တာဝန်ထမ်းဆောင် အငြိမ်းစားယူခဲ့ပြီး ပြည်သူ့ကျန်းမာရေးတက္ကသိုလ်တွင် ပါမောက္ခချုပ် အဖြစ် တာဝန်ထမ်းဆောင်ခဲ့သူ ဖြစ်သည်။

ဒေါက်တာနေစိုးမောင်သည် လူမှုကူညီရေး လုပ်ငန်းများ လုပ်ဆောင်နေသူဖြစ်ပြီး စစ်အာဏာရှင် မင်းအောင်လှိုင် ၏ လုပ်ရပ်များကို မကြာခဏ စောင်းပါးရိပ်ခြေ ဝေဖန်လေ့ရှိသဖြင့် ၎င်းအား ဖမ်းဆီးရန် စစ်တပ်လော်ဘီများက မကြာခဏ လှုံ့ဆော်လေ့ရှိသည်။

လူမှုကွန်ရက်တွင် ဝေဖန် ရေးသားမှုဖြင့် ယခင် ကြံ့ခိုင်ရေး အစိုးရ ပြန်ကြားရေးဝန်ကြီးဟောင်း ဦးရဲထွဋ် သည်လည်း ၂၀၂၃ ခုနှစ်၊ အောက်တိုဘာလ ၂၈ ရက်နေ့က ဖမ်းဆီးခံရကာ ထောင်ဒဏ် ၁၀ နှစ် ချမှတ်ခံထားရပြီး လက်ရှိ အင်းစိန်ထောင်တွင် ထောင်ကျခံနေရသည်။