ယနေ့ (အောက်တိုဘာလ ၂၃ ရက်) နံနက် ၈ နာရီခွဲကျော်မှ စတင်ပြီး လားရှိုးမြို့အဝင် မယ်ဟန်ကျေးရွာအုပ်စု နမ့်ခိုက်ရှိ “ရိုးရာ” ဆန်အရက်ချက်စက်ရုံကို စစ်ကောင်စီတပ်က (၂) ကြိမ် လေကြောင်းဗုံးကြဲတိုက်ခိုက်ခဲ့ရာ မီးလောင်ပျက်စီးခဲ့ကြောင်း ဒေသခံများက ပြောသည်။
ဒုတိယအကြိမ်အဖြစ် လားရှိုးမြို့ ရပ်ကွက်(၁၂) ရှိ ဟက်ကာကျေးရွာတွင် နံနက် (၁၀) နာရီကျော် အချိန်က လေကြောင်းဖြင့် ထပ်မံဗုံးကြဲခံခဲ့ရသည်။
ယနေ့ညနေပိုင်း (၃:၀၁)နာရီတွင် တတိယအကြိမ်အဖြစ် လားရှိုးမြို့ အမှတ်(၂) မြို့မ ရဲစခန်းကို စစ်ကောင်စီတပ်က လေကြောင်းဗုံးကြဲ တိုက်ခိုက်ခဲ့ပြီး (၃:၁၀) မိနစ်တွင် (၄) ကြိမ်မြောက်အဖြစ် လားရှိုးအကျဉ်းထောင် ဗုံးကြဲခံရပြီး လူထိခိုက်မှုရှိကြောင်း ကနဦး သိရသော်လည်း အသေးစိတ်ကို သျှမ်းသံတော်ဆင့်မှ ဆက်လက်စုံစမ်းနေသည်။
လားရှိုးမြို့ပေါ်တွင် တိုက်လေယာဉ်များ ပျံဝဲလျက်ရှိစဉ် ကိုးကန့်တပ်ဖွဲ့ MNDAA မှ ပြန်လည်ပစ်ခတ်နေသည့် လက်နက်သံများလည်း ကြားနေရကြောင်း လားရှိုးဒေသခံများ၏ လူမှုကွန်ယက်စာမျက်နှာများတွင် ရေးသားထားသည်။
ဩဂုတ်လဆန်းပိုင်းတွင် လားရှိုးမြို့အခြေစိုက် အရှေ့မြောက်ပိုင်း တိုင်းစစ်ဌာနချုပ်ကို ကိုးကန့်တပ်ဖွဲ့ MNDAA ထိန်းချုပ်နိုင်ပြီးနောက် သုံးလအတွင်း စစ်ကောင်စီတပ်၏ လေကြောင်းတိုက်ခိုက်မှု အကြိမ်ရေမှာ (၂၀) ကျော်အထိ ရှိလာပြီဖြစ်ကြောင်း လားရှိုးမြို့ ပြန်လည်ထူထောင်ရေး ဖေ့စ်ဘုတ်စာမျက်နှာ ထုတ်ပြန်ချက်အရ သိရသည်။
Leave a Comments