သျှမ်းပြည်မြောက်ပိုင်း ကိုးကန့်တပ်-MNDAA သိမ်းပိုက်ထားသည့် လားရှိးမြို့တွင် စစ်ကောင်စီ ထပ်မံဗုံးကြဲ တိုက်ခိုက်ခံရသည်ဟု စုံစမ်းသိရသည်။
ယမန်နေ့ (အောက်တိုဘာလ ၂၁ရက်)နေ့ ညသန်းခေါင်ရံချိန် ၁၂ နာရီဝန်းကျင်တွင် လူအိပ်ရေးမောကျချိန် လားရှိုးမြို့ (၁၂) ရပ်ကွက် ရှမ်းတောင်တန်းလမ်းကြား မန်ဆူဘုရားမရောက်ခင် စစ်ကောင်စီ ဗုံးဖြင့် လာရောက်ဗုံးကြဲတိုက်ခိုက်ပြီး အဆောက်အအုံများ ပျက်စီးသွားသည်ဟု မြို့နယ်ဒေသခံအမျိုးသားတစ်ဦး သျှမ်းသံတော်ဆင့်ကို ပြောသည်။
“မနေ့ည ၁၂ ဝန်းကျင် အိပ်ရေးမောကျတဲ့အချိန်ကို စစ်တပ်က ဗုံးထပ်လာကြဲတယ်။ ရပ်ကွက် (၁၂) ရှမ်းတောင်တန်းလမ်း မန်ဆူဘုရားမရောက်ခင်မှာ ဖြစ်သွားတယ်။ လူထိခိုက်တာတော့ မသိသေးဘူး နေအိမ်တွေ တော်တော်ပျက်စီးသွားတယ်။ အိမ်ကြီးတွေပဲ အဲနေရာကို တည့်တည့်ပစ်ချတာ”ဟု ၎င်းက ပြောသည်။
လားရှိုမြို့နေ့လည်အချိန်တွင် ကိုးကန့်တပ်ဖွဲ့ (MNDAA)က ၎င်းတို့နေအိမ်ကို လာရောက်အနားယူ ရေချိုး၊ ထမင်းစားခြင်း ပြုလုပ်ပြီး ညအချိန် အခြားနေရာကို သွားရောက်နေပြီး ထို့နေအိမ်များကို စစ်ကောင်စီပစ်မှတ်ချပြီး ဗုံးလာကြဲသည်ဟု မြေပြင်အခြေအနေသိရှိသူတစ်ဦးက ပြောသည်။
“ကိုးကန့်တပ်ဖွဲ့တွေက နေ့လည်ဆို မြို့ထဲက နေအိမ်တွေထဲလာပြီး ရေချိုးတာတွေလုပ်ပြီး ညဆိုပြန်ထွက်သွားတယ်။ သတင်းပေးသူရှိတော့ အဲနေရာကို စစ်တပ်က ပစ်မှတ်ချပြီး ဗုံးလာကြဲသွားတယ်။တစ်ခုခုဆိုလည်း ပြည်သူတွေပဲ ခံနေရတယ်” ဟု ၎င်းကပြောသည်။
စစ်ကောင်စီသည့် အဓိက ပြည်သူများအိပ်မောကျချိန်တွင် လေကြောင်းဗုံးကြဲတိုက်ခိုက်နေပြီး အရပ်သား သေဆုံးမှု နေ့စဉ်နှင့်အမျှ ရှိသကဲ့သို့ ဒဏ်ရာရရှိသူများလည်း ရှိသည်။
လက်ရှိအချိန်သည် ကိုးကန့်တပ်က လားရှိုးမြို့ကို သိမ်းယူနိုင်ခဲ့သော်လည်း ပြည်သူများသည် အလုပ်လက်မဲ့ ဖြစ်နေပြီး၊ ဝင်ငွေမရှိသးကြောင်းအခြားနေရာသို့ ပြောင်းရွှေ့လျှင်လည်း အရင်းအနှီးမရှိကြောင်း ၎င်းက ပြောသည်။
ပြီးခဲ့သည့် စက်တင်ဘာလအတွင်းနှင့် အောက်တိုဘာလတွင် လားရှိုးမြို့ကို စစ်ကောင်စီမှ ၁၁ ကြိမ် လေကြောင်းမှ ဗုံးကြဲတိုက်ခိုက်တာကြောင့် ဒေသခံ များထိခိုက်ဒဏ်ရာရကာ နေအိမ် အဆောက်ဦးများလည်း ပျက်စီးခဲ့သည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments