သျှမ်းပြည်အရှေ့ပိုင်း မိုင်းဆတ်မြို့ရှိ ဆိုက်ခေါင်တံတား ရေတိုက်စားမှုကြောင့် ယာယီတံတား ထပ်မံကျိုးကျ သွားကြောင်း စုံစမ်းသိရသည်။

ပြီးခဲ့သည့် စက်တင်ဘာလအတွင်း မိုးရွာသွန်းမှုကြောင့် မိုင်းဆတ်-တာချီလိတ်သွားသည့် ဆိုက်ခေါင်တံတားကျိုးကျသွားပြီး ယာယီတံတားဖြင့် ပြည်လည်တည်ဆောက်ခဲ့သည်။

ထိုယာယီတံတားသည် (အောက်တိုဘာလ ၁၇ ရက်) တွင် ထပ်မံကျိုးကျသွားကြောင်း မြို့နယ်ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

“အောက်တိုဘာလ ၁၇ ရက်နေ့လည်မှာ ထပ်ကျိုးသွားတယ်။ လုပ်ထားတာလည်း ယာယီတံတား ဆိုင်ကယ်နဲ့ ကားအသေးသွားလို့ရအောင်လောက်ပဲ လုပ်ထားတာ။ ရေကရုတ်တရက်ထပ်ကြီးလာတော့ တံတားက မခံနိုင်တော့ ပြန်ကျိုးသွားတယ်” ဟု ၎င်းက ပြောသည်။

(အောက်တိုဘာလ ၁၇ ရက်) တံတားပြင်နေသည့် အလုပ်သမားတစ်ဦးသည် နေလည်ထမင်းစားနာချိန် ဆိုက်ခေါင်တံတားပေါ်တွင် လမ်းလျှောက်ရင်း ၎င်းတံတားကျိုးကျသည်ကို သိသိချင်း တံတားပေါ်ကနေ ခုန်ချလိုက်ပြီး ဦးခေါင်းဒဏ်ရာရကာ ယခင် မိုင်းဆတ်ဆေးရုံတွင် ဆေးကုသမှု ခံယူနေကြောင်း ဒေသခံတစ်ဦးက ပြောသည်။

“အောက်တိုဘာလ ၁၇ ရက်နေ့က တံတားပြင်သွားကြတာ အလုပ်သမားတွေနဲ့ နေ့လည်ထမင်းစားနားနေချိန် အမျိုးသားတစ်ယောက်က တံတားပေါ်ကို လမ်းလျှောက်ရင်း ကျိုးကျသွားတာ သူသိသိချင်း ခုန်းချလိုက်တာ ခေါင်းနဲ့ကျောက်ခဲတိုက်မိတာ ၃ ချက်တောင် ချုပ်ရတယ်။ အခု‌တော့ မိုင်းဆတ်ဆေးရုံမှာပဲ။ တံတားကို ကောင်းကောင်းပြန်လုပ်ရင် တစ်လလောက်ကြာမယ်” ဟု ၎င်းက ပြောသည်။

မိုင်းဆတ်မြို့နှင့် တာချီလိတ်မြို့ကြားတွင် လမ်းတံတားများ ပျက်စီးမှုကြောင့် ကားများသည် ယခုအချိန် သွားလာ၍ မရသည့်အတွက် ကုန်ပစ္စည်းများကို ဆိုက်ခေါင်တံတားအနီးတွင် ဖောင်များဖြင့်ပစ္စည်းများကို သယ်ယူနေရကြောင်း မိုင်းဆတ်မြို့ ဒေသခံ အမျိုးသမီးတစ်ဦးက ပြောသည်။

ဆိုက်ခေါင်တံတား စတင်ပြတ်တောက်သွားပြီးနောက် အခြေခံစားသောက်ကုန်များ ဈေးနှုန်းပိုမိုမြင့်တက်လာပြီး ကုန်ပစ္စည်းများနှင့် ကူးသန်းရောင်းဝယ်မှုလုပ်ငန်းကို ထိုင်း-မြန်မာနယ်စပ်ဖြစ်သည့် တာချီမြို့ကိုသာ အဓိက အားကိုးနေထိုင်ရသည်ဟု ဒေသခံအမျိုးသမီးက ပြောသည်။

“တံတားပြန်ပျက်တော့ စားသောက်ဖို့ ပစ္စည်းတွေသယ်ဖို့တွေ ခက်ခဲတယ်။ စားသောက်ကုန်နဲ့ စီးပွားရေးလုပ်ငန်းတွေဆို တာချီလိတ်မြို့ကိုပဲ အားကိုးပြီး နေထိုင်ရတယ်။ ရုတ်တရက်ပြန်ကျိုးလိုက်တော့ ကုန်တွေကို ဖောင်နဲ့သယ်ရတယ် သယ်ခလည်း ဈေးများတယ်။ တစ်နေ့ထက်တစ်နေ့ ပိုခက်ခဲလာတယ်”ဟု ၎င်းက ပြောသည်။

သျှမ်းပြည်အရှေ့ပိုင်းတွင် သစ်တောများ အလွန်အကျွံ ခုတ်ယူခြင်း၊ သတ္တုများ အလွန်အကျွံ တူးဖော်ခြင်းနှင့် တောတောင်တွင် သစ်ပင်များမရှိတော့သဖြင့် မိုးရွာသွန်းသည်အခါ မြေကြီးမှ ရေစုပ်ယူမှု မရှိတော့သဖြင့် ယခုကဲ့သို့ ရေကြီးရေလျှံမှု ဖြစ်ပွားလာရခြင်းဖြစ်ကြောင်း သဘာဝပတ်ဝန်းကျင်စောင့်ကြည့်လေ့လာသူများက ဆိုသည်။

အလုပ်သင် သတင်းထောက် နန်းဆိုင်ခမ်း ရေးသားသည်။