သျှမ်းပြည် နောင်ချိုမြို့ပေါ် လူနေရပ်ကွက်အတွင်းသို့ စစ်ကောင်စီတပ်မှ ဂျက်ဖိုက်တာဖြင့် (၂) ကြိမ် လေကြောင်းဗုံးကြဲတိုက်ခိုက်ခဲ့ရာ ဖခင်နှင့် သမီး စုစုပေါင်း (၃) ဦး သေဆုံးပြီး (၅) ဦးထက်မနည်း ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ယနေ့ (အောက်တိုဘာလ ၁၉) ရက် နံနက် ၅ နာရီကျော်မှ စတင်ပြီး နောင်ချိုမြို့ပေါ် တောင်ရပ်ကွက်အတွင်း စစ်ကောင်စီတပ်မှ ပေါင် (၅၀၀) ဗုံးဖြင့် နှစ်ကြိမ်ထက်မနည်း လေကြောင်းဗုံးကြဲခဲ့ရာ ဖခင်ဖြစ်သူနှင့် သမီးနှစ်ဦး စုစုပေါင်း (၃) ဦး သေဆုံးပြီး (၅) ဦး ထိခိုက်ဒဏ်ရာရရှိခဲ့ကြောင်း နောင်ချိုဒေသခံများက ပြောသည်။
“လေယာဉ်က နှစ်စီး၊ သုံးစီး အဲ့လိုလာတာ။ တောင်ရပ်ကွက်ထဲ ကြဲချတာ ပေါင်(၅၀၀) ဗုံးက၊ အိမ် (၂၀) လောက် ပျက်စီးတာ ရှိမယ်။ ဦးကျော်တို့ သားအဖဆုံးတယ်၊ နောက်တစ်အိမ်လည်း လူထိတာရှိတယ်”ဟု နောင်ချိုမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
နောင်ချိုမြို့ တောင်ရပ်ကွက်အတွင်း လေကြောင်းဖြင့် (၂) ကြိမ် ဗုံးကြဲခံရမှုကြောင့် ကလေး (၂) ဦး အပါအဝင် (၃) ဦး သေဆုံးပြီး (၃) ဦး ဒဏ်ရာပြင်းထန်ကာ နေအိမ် (၁၇) လုံး ထိခိုက်ပျက်စီးခဲ့ကြောင်း TNLA သတင်းနှင့် ပြန်ကြားရေးဌာနမှ ယနေ့နံနက်ပိုင်းတွင် ထုတ်ပြန်သည်။
အလားတူ နောင်ချိုမြို့နယ်အတွင်း ဆမ္မဆယ်ကျေးရွာဘက်သို့လည်း ယနေ့နံနက် (၃) နာရီခန့်တွင် စစ်ကောင်စီတပ်မှ လေကြောင်းဖြင့် ဗုံး(၃) လုံး ကြဲချတိုက်ခိုက်ခဲ့ကြောင်း ဒေသခံများထံမှ သိရသည်။
ယမန်နေ့ (အောက်တိုဘာလ ၁၈ ရက်) နံနက် ၅ နာရီခန့်မှ စတင်၍ ည ၁၀ နာရီကျော်အထိ နောင်ချိုမြို့နှင့် ၁၄ မိုင်ခန့်သာ ကွာဝေးသည့် သဲခေါ်ရွာတွင် စစ်ကောင်စီတပ်နှင့် TNLA ပူးပေါင်းတပ်ဖွဲ့တို့ တစ်နေကုန် တိုက်ပွဲပြင်းထန်ခဲ့ပြီး စစ်ကောင်စီတပ်မှ လက်နက်ကြီးကျည် (၁၀၀) ကျော် ပစ်ခတ်ခဲ့ကြောင်း ဒေသခံများက ပြောဆိုသည်။
“ဆမ္မဆယ်မှာလည်း ဒီမနက် လေယာဉ်နဲ့ ဗုံး ၃ လုံး လာကြဲသွားတယ်၊ လူထိခိုက်တာတော့ မသိရသေးဘူး။ အဲ့ချိန် ကျနော်တို့ ထကြည့်သေးတယ်။ မနေ့က သဲခေါ်မှာ တနေကုန် တိုက်ပွဲဖြစ်တယ်၊ လက်နက်ကြီးက ငါးလုံးတွဲ အဲ့လိုပစ်တာ အခါ ၂၀ ကျော် ရှိတယ်။ နှစ်ဘက်လုံးက စစ်အင်အား ဖြည့်လာတော့ ထပ်ကြာဦးမှာ”ဟု ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ထို့အပြင် နောင်ချိုမြို့နယ် တောင်းခမ်းဒေသတွင် TNLA ပူးပေါင်းတပ်များ သိမ်းပိုက်ထားသည့် စစ်ကောင်စီလက်အောက်ခံ အမြောက်တပ်ရင်းများတွင် စစ်ရေး အထူးတင်းမာနေပြီး နောက်ဆုံးတိုက်ပွဲ ပြင်းထန်စွာ ဖြစ်ပွားနိုင်သဖြင့် ပြည်သူများ ထပ်မံထွက်ပြေး တိမ်းရှောင်နေရကြောင်း ဒေသခံများထံမှ သိရသည်။
သီတင်းကျွတ် လပြည့်ညကလည်း နောင်ချိုမြို့ပေါ် တောင်ရပ်ကွက်၊ ထွေအုပ်ရုံး၊ စာရင်းစစ်ရုံး၊ မြို့မရဲစခန်း၊ မြို့ဝင်စစ်ဆေးရေးဂိတ်နှင့် သဖန်းကိုင်း ကျေးရွာဘက်သို့ စစ်ကောင်စီတပ်မှ အပြင်းအထန် လေကြောင်းဗုံးကြဲ တိုက်ခိုက်ခဲ့ရာ ပြည်သူ (၄) ဦးထက်မနည်း ထိခိုက်ဒဏ်ရာ ရရှိခဲ့သည်။
Leave a Comments