အာဏာသိမ်း စစ်ကောင်စီဦးဆောင်ပြီး သန်းခေါင်စာရင်းကောက်ယူမှုပြုလုပ်ရာတွင် မိသားစု ပိုင်ဆိုင်မှုကိစ္စကို အလွန်အကျွံမေးမြန်းမှုကြောင့် လူထုများက စိုးရိမ်နေကြကြောင်း စုံစမ်းသိရသည်။
စစ်အာဏာသိမ်းပြီး ၃နှစ်ကျော်ကာလအတွင်း ၂၀၂၄ ခုနစ် အောက်တိုဘာလတွင် သန်းခေါင်စာရင်းကို ကောက်ယူရန် စစ်ကောင်စီက ကြေညာခဲ့သော်လည်း လက်ရှိမှာ မြန်မာပြည်တဝှမ်း စစ်ရေးပဋိပက္ခ မတည်ငြိမ်ချိန် သန်းခေါင်စာရင်းကို ကောက်ယူနေပြီး စစ်မှန်သည့် သန်းခေါင်စာရင် ထွက်ပေါ်လာမည် မဟုတ်ကြောင်းလည်း ပြောဆိုမှုများလည်း ရှိနေသည်။
ယခုလ အောက်တိုဘာ ၇ ရက်တွင် သျှမ်းပြည်တောင်ပိုင်း ရပ်စောက်မြို့နယ်ကောင်းဘို့ကျေးရွာအုပ်စုအတွင်း သန်းခေါင်စာရင်းကို ကောက်ယူရာ နေအိမ်ပိုင်ဆိုင်မှု၊ ဝင်ငွေစာရင်းနှင့် ကိုယ်ရေးကိုယ်တာကိစ္စနှင့် ပုဂ္ဂိုလ်ရေးဆန်သည့်မေးခွန်းများမေးမြန်းသည့်အတွက် ဒေသခံများ စိုးရိမ် ကြောက်ရွံ့နေကြောင်း ဒေသခံအမျိုးသမီးတစ်ဉီးက သျှမ်းသံတော်ဆင့်ကိုပြောသည်။
“ အိမ်ထောင်စုဝင်စာရင်းထဲက လူတွေ အယောက်စီတိုင်းကိုမေးတယ်။ ဘယ်သွားလဲ။ လစာဘယ်လောက်ရလဲ။ တစ်နှစ်ဝင်ငွေဘယ်လောက်ရှိလဲ။ လူငယ်ဆိုရင် နေရာအတိအကျမေးတာ။ ပိုင်ဆိုင်မှုတွေကပါပြောရတော့ လန့်နေ ကြောက်နေကြတယ်” ဟု ၎င်းအမျိုးသမီးက ဆိုသည်။
သန်းခေါင်စာရင်းကောက်ပြီးနောက်တွင် ကျေးရွာထဲ အခွန်ကောက်ခြင်းနှင့် စစ်မှုထမ်း ခေါ်မည်ကို နေ့စဉ် ကြောက်ရွံ့နေကြသည့်အပြင် မဲတွေအတင်းအဓမ္မထည့်ခိုင်းမည်ကိုလည်း စိုးရိမ်နေရကြောင်း အသက် ၄၀အရွယ်ရှိ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“သန်းခေါင်စာရင်းကောက်ပြီးရင် အခွန်ကောက်မလား၊ထောက်ပံကြေးကောက်မှာလား၊ စစ်တမ်းကောက်မှာတွေကို အကြောက်ဆုံးပဲ မဲအတင်းအဓမ္မထည့်ခိုင်းမှာကိုလည်း ကြောက်နေကြတယ်”ဟု ၎င်းကပြောသည်။
၂၀၁၄ခုနစ်တွင် ကောက်ယူခဲ့သည့် သန်းခေါင်စာရင်း၌ မေးခွန်း (၄၁)ခုသာရှိပြီး လက်ရှိ ၂၀၂၄ ခုနစ်တွင် မေးခွန်းပေါင်း ၆၈ခု အထိရှိလာကြောင်း သိရသည်။
ထိုထပ်တိုးသည့်မေးခွန်းများထဲတွင် နိုင်ငံခြားရောက်မိသားစုဝင်များအကြောင်း၊ ကိုယ်ရေးကိုယ်တာ၊ ကိုးကွယ်သည့်ဘာသာ၊ ပြောဆိုသည့် ဘာသာစကားအပြင် ပြည်ပရွှေ့ပြောင်းသွားလာသူရှိ၊မရှိ၊ လျှပ်စစ်မီးတာသုံးစွဲမှု၊ သောက်သုံးရေရရှိမှု စသည့်အချက်အလက်များလည်း ပါဝင်ကြောင်းသိရသည်။
ထိုမေးခွန်းများကို ထပ်တိုးမေးရသည့်အကြောင်းရင်းသည် လူနေမှုစနစ်ကို သိရှိနိုင်ရန် မေးမြန်းခြင်းဖြစ်ကြောင်း စစ်ကောင်စီ၏ လဝက ဝန်ကြီး ဦးမြင့်ကြိုက်က ပြောဆိုထားသည်။
သျှမ်းပြည်နယ် တကြောတွင်စစ်ရေးပဋိပက္ခကြောင့် ရွှေ့ပြောင်းနေထိုင်ရသည့် ပြည်သူအများအပြားရှိသကဲ့သို့ အချို့ လူငယ်များသည် တော်လှန်ရေး အဖွဲ့ဝင်များ၊ CDM များပါဝင်သည့်အတွက် သန်းခေါင်စာရင်း ကောက်ယူရာတွင် စိုးရိမ်မှု ရှိနေကြောင်း လားရှိုးစစ်ပွဲကြောင့် တောင်ကြီးရောက်နေသည့် ဒေသခံ အမျိုးသမီး တစ်ဉီးက ပြောသည်။
“ အခုကျမတို့က စစ်ဘေးနေရတာ။ ဘာဆိုဘာမှ မသိသလို၊ သန်းခေါင်စာရင်းလည်း လာကောက်တာ မရှိသေးဘူး။ လူငယ်တွေအတွက်လည်း စိုးရိမ်ရတယ်။ တချို့လူငယ်တွေက တော်လှန်ရေးအဖွဲ့ထဲပါသွားတယ်လေ။ တချို့နယ်ဆိုရင် ကိုးကန့်တပ်၊ ပလောင်(တအာင်း)တပ်တို့က ထိန်းထားတော့ ဘယ်လိုတွေကောက်မှာလဲ။ အမှန်တော့မရနိုင်ဘူးထင်တယ်” ဟု ၎င်းအမျိုးသမီးက ဆိုသည်။
စစ်ရေးပဋိပက္ခကြောင့် သျှမ်းပြည်မြောက်ပိုင်း၊ ကယား(ကရင်နီ) ၊ ရခိုင်၊ ကရင်၊ ကချင်၊ချင်းနှင့် စစ်ကိုင်းတိုင်း စသည့် တော်လှန်ရေး အင်အားစုများက ထိန်းချုပ်ထားသည်။
လက်ရှိ သျှမ်းပြည်အချို့တွင် စစ်ကောင်စီလက်အောက်ခံအဖွဲ့မှ အုပ်ချုပ်ရေးမှူးများ သန်းခေါင်စာရင်းကောက်ယူရာတွင် အရပ်သားပြည်သူများကို လုံခြုံရေးယူပေးရန် ခေါ်ဆောင်မှုများလည်း လုပ်ဆောင်နေသည်။
အမျိုးသားညီညွတ်ရေးအစိုးရ (NUG) သည် စစ်အာဏာသိမ်းပြီးကတည်းက ၂၀၀၈ ဖွဲ့စည်းပုံအခြေခံ ဉပဒေသည် ပျက်ပြယ်ခဲ့ပြီး၊ ထိုဥပဒေကို အသုံးပြုပြီး ရွေးကောက်ပွဲ အပါအဝင် စစ်ကောင်စီဖော်ဆောင်မည့် နိုင်ငံရေးလမ်းကြောင်းကို လက်မခံနိုင်ကြောင်း အောက်တိုဘာ ၁ရက်တွင် ထုတ်ပြန်ခဲ့သည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments