သျှမ်းပြည် မိုင်းရယ်မြို့နယ်တွင် စစ်ကောင်စီ လေကြောင်းဗုံးကြဲတိုက်ခိုက်မှုကြောင့် အရပ်သား ၁ ဦးသေဆုံး၊ ၈ ဦးထက်မနည်း ဒဏ်ရာရပြီးပြည်သူများ အထိတ်တလန့်ဖြစ်နေသည်ဟု စုံစမ်းသိရသည်။

ယနေ့ (အောက်တိုဘာလ ၉ ရက်) နံနက် ၂ နာရီခွဲအချိန်တွင် မိုင်းရယ်မြို့အနီးရှိ သကြားစက်ရုံ ဧည်ရိပ်သာနှင့် အလုပ်သမားနေအိမ်အဆောင်များကို စစ်ကောင်စီ လေကြောင့်ဖြင့် ဗုံး ၄ လုံး ကြဲချခဲ့သဖြင့် အသက် (၂၀) အရွယ်ရှိ အမျိုးသမီး တစ်ဦး သေဆုံး၊ ၈ဦးထက်မနည်း ဒဏ်ရာရရှိပြီး ၎င်းထဲကအမျိုးသမီး ၂ ဦး ခြေတဖက်စီပြတ်သွားကြောင်း မြို့နယ်ဒေသခံတစ်ဦးက သျှမ်းသံတော်ဆင့်ကို ပြောသည်။

“ဒီနေ့မနက် ၂ နာရီခွဲမှာ စစ်တပ်က သကြားစက်ရုံရဲ့ ဧည်ရိပ်သာနဲ့ အလုပ်သမားနေတဲ့အဆောင်များကို လေယာဉ် ၂ စီးနဲ့ ဗုံး ၄ လုံးလာကြဲသွားတယ်။ မိန်းကလေး အသက် ၂၀ တစ်ဦးသေသွားတယ်၊ ၈ယောက်မကဘူး ဒဏ်ရာရတယ် အဲထဲက မိန်းကလေး ၂ ဦးက ခြေတဖက်စီပြတ်သွားတယ်။ ‌နောက်မိန်းကလေး ၁ဦးက လက်တဖက်ပြတ်သွားတယ်။ စက်ရုံပိုင်ရှင်းလည်း ဒဏ်ရာပြင်းထန်ရတယ်” ဟု ၎င်းကပြောသည်။

လက်ရှိ ဒဏ်ရာရရှိသူများကို မိုင်းရယ်ဆေးရုံနှင့် ကျေးသီးဆေးရုံတွင် ဆေးကုသမှုခံယူနေပြီး စစ်ကောင်စီ ဗုံးကြဲတိုက်ခိုက်သည့်နေရာသည်သကြားစက်ရုံ ဧည်ရိပ်သာနှင့် အလုပ်သမားနေအိမ် အားလုံးပျက်စီးပြီး သကြားစက်ရုံပိုင်ရှင်နေအိမ်လည်း တစ်အိမ်လုံးပျက်သွားသည်ဟု သိရသည်။

မိုင်းရယ်မြို့အတွင်းရှိ ပြည်သူများနှင် မြို့အနီးရှိဒေသံများသည် စစ်ကောင်စီတပ်၏ တိုက်ခိုက် မှုကြောင့် အထိတ်တလန့်ဖြစ်ပြီး တိုက်ပွဲဖြစ်မည်ကို စိုးရိမ်နေကြသည်ဟု ဒေသခံအမျိုးသားတစ်ဦးက ပြောသည်။

“သကြားစက်ရုံ အလုပ်သမားနေအိမ်နဲ့ သူဌေးအိမ်တော့ အကုန်ပျက်ကုန်ပြီး။ ဒဏ်ရာရတဲသူတွေတော့ ဆေးရုံးမှာ ဆေးကုသနေတယ်။ သူဌေးလည်းက တရုတ်လူမျိုးဖြစ်တော့ ကိုးကန့်တပ် (MNDAA) ရောက်တယ်ထင်ပြီး ဗုံးလာကြဲသွားတယ်။ အဲနေကို ဦးတည်ပြီးကို လာကြဲတာ။ ပြည်သူတွေ တော်တော်ကြောက်ကြတယ် တိုက်ပွဲဖြစ်မှာကို စိုးရိမ်နေကြတယ်” ဟု ၎င်းက ပြောသည်။

မိုင်းရယ်မြို့နယ် ဟိုယကျေးရွာတွင် ပြီးခဲ့သည့် စက်တင်ဘာလ နောက်ဆုံးပတ်မှ စပြီး အင်အားဖြည့်တင်းလာတာကြောင့် ကိုးကန့်တပ်ဖွဲ့ (MNDAA) တို့ စစ်ရေးတင်းမာမှုများဖြစ်ပေါ်နေပြီး စစ်ကောင်စီမှ လေကြောင်းတိုက်ခိုက်မှုများပြုလုပ်သဖြင့် ဒေသခံပြည်သူများ တောင်ယာကြံစိုက်ခင်းသို့ မသွားရဲ ဖြစ်နေကြသည်။

ဇူလိုင်လ လယ်ပိုင်း မှစတင်ပြီး မိုင်းရယ်မြို့ပေါ်သို့ SSPP ဌာနချုပ် ဝမ်ဟိုင်းမှ တပ်အင်အား အများအပြား ဝင်ရောက်နေရာယူထားပြီး မြို့ပတ်လည်တွင် လုံခြုံရေးယူထားသော်လည်း လက်ရှိတွင် ကိုးကန့်တပ်ဖွဲ့ (MNDAA) နှင့် စစ်ကောင်စီတို့ စစ်ရေးတင်းမာနေသည့် နေသည်။

ပြီးခဲ့သည့် စက်တင်ဘာလ ၂၉ ရက်နေ့ည ၈ နာရီအချိန်တွင် စစ်တပ်က ကောင်းမွန်ရွာကို ဗုံးလာကြဲကြောင့် ထိခိုက်ဒဏ်ရာရသူများမှာ ၄ ယောက်ရှိပြီး နေအိမ်ပျက်စီးမှုများလည်း ရှိကြောင်း သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။