သျှမ်းပြည်တောင်ပိုင်း ရွာငံမြို့ နှင့် အနီးတဝိုက်ကျေးရွာများသို့ ဖြန့်ဝေနေသည့် “ပိတုန်းကိုင်း” ရေပိုက်လိုင်းပြတ်တောက်မှုကြောင့် သောက်သုံးရေ ပြတ်လတ်မှုကြုံနေပြီး၊ မိုးရေကို ခံသောက်နေရကြောင်း စုံစမ်းသိရသည်။

ပြီးခဲ့သည့် ဩဂုတ်လဆန်းပိုင်းတွင် မိုးသည်းထန်ရွာသွန်းမှုကြောင့် တောင်ကျချောင်းရေများကြောင့် တောင်ပြိုမှု၊ မြေပြိုမှုကြောင့် လူသေဆုံးမှု၊နေအိမ်ပျက်စီးဆုံးရှုံးမှုများ ဖြစ်ပေါ်ခဲ့သည်။

ထို့နောက် အောက်တိုဘာ ၁ ရက်တွင် ရွာငံမြို့နှင့် ကျေးရွာအချို့တွင် အဓိကအသုံးပြုနေသည့် “ပိတုန်းကိုင်း” ရေပိုက်လိုင်းသည် မိုးရေတိုက်စားမှုကြောင့် ပေ ၇၀ ခန့် ပျက်စီးသွားခဲ့သဖြင့် သောက်သုံးရေပြတ်လပ်မှု ကြုံနေရကာ မိုးရေကိုခံပြီး သောက်သုံးနေရသည်။

“အခုက ရေသွယ်ထားတဲ့ပိုက်က အကုန်ပြတ်နေတာ။ သွားပြင်ရင်တော့ ၄ ရက်လောက်ကြာအုံးမှာ။ ရေကပြတ်ကုန်ပြီ။ အဲဒီ “ပိတုန်းကိုင်း” ရေတံခွန်ဖက်ကပဲ အဓိကအားထားပြီး အသုံးပြုနေရတော့ အဆင်မပြေဖြစ်နေတယ်။” ဟု ရွာငံမြို့တွင်း စည်ပင်သာယာရေးဌာနတွင် အလုပ်လုပ်နေသည့် ကိုထွန်းက သျှမ်းသံတော်ဆင့်ကိုပြောသည်။

လက်ရှိတွင် ရေပိုက်လိုင်းများပြန်လည် ပြုပြင်ဆောင်ရွက်ပေးနေပြီး မြို့တွင်း ရေပြန်လည်ရရှိအောင် စီမံဆောင်ရွက်ပေး နေကြောင် ၎င်းအမျိုးသားတစ်ဦးက ပြောသည်။

ထို့အပြင် ကျေးရွာများတွင်လည်း ရေပြတ်လပ်နေတာကြောင့် မိုးရေကိုခံသုံးနေရပြီး ကိုယ်ထူကိုယ်ထဖြင့် ရေပိုက်လိုင်း ပြုပြင်ဆောင်ရွက်နေကြောင်း၊ ရေရှည် သောက်သုံးရေ ပြတ်လပ်ပါက ဒေသခံများအတွက် မလွယ်ကူကြောင်းလည်း ရေပြတ်မှုကို ကြုံတွေ့နေရသည့် ရေဉီး ဒေသခံတစ်ဉီးက သျှမ်းသံတော်ဆင့်ကို ပြောသည်။

“ ရွာဆိုတော့ ရွာသားတွေကပဲ အချင်းချင်းတိုင်ပင်ပြီး ရေပိုက်လိုင်း ပြင်သွားနေရတယ်။ တစ်အိမ်တစ်ယောက်ခေါ်ပြီး ရေပိုက်လိုင်းလိုက်ပြင်နေတယ်။ မိုးကရွာနေတော့ မိုးရေခံပြီး ရေသုံးနေရတယ်။ ရေရှည်ပြတ်ရင်မလွယ်ဘူး။ အမြန်အဆင်ပြေအောင် ဆောင်ရွက်နေတယ်။” ဟု ရေဦးကျေးရွာဒေသခံတစ်ဦးက ပြောသည်။

ပိတုန်းကိုင်း ရေပိုက်လိုင်းသည် ရွာငံမြို့ အရှေ့တောင်ဘက်တွင် တည်ရှိပြီး မြို့နှင့် မိုင်(၁၀၀) ကျော်ကွာဝေးပြီး ဆိုင်ကယ်ဖြင့် လမ်းတစ်ဝက်သာမောင်းနှင်လို့ရကာ ကျန်တစ်ဝက်ကို ခြေကျင်ဖြင့် တောင်ကုန်း နှင့် ချိုင့်ဝှမ်းကို ခက်ခဲ ဖြတ်သန်းသွားလာရကြောင်း ၎င်းကပြောသည်။

လက်ရှိရွာငံမြို့နယ်တွင် မိုးအဆက်မပြတ်ရွာသွန်းနေပြီး ရွာငံဖက်သို့ ကုန်သွယ်သွားလာနေသည့် အောင်ပန်း-မန္တလေး လမ်းနှင့် ကလော- အောင်ပန်းလမ်းတွင် ရေတိုက်စား မြေပြိုမှုကြောင့်လမ်းပျက်နေပြီး ကုန်ပစ္စည်း များပြတ်လပ်နေကြောင်း သိရသည်။

ယခုလက်ရှိ ရွာငံတွင်ဆန်တစ်အိတ်လျှင် မြန်မာကျပ်ငွ ၁သိန်းခွဲမျှဈေးရှိနေပြီး အခြားသောစားသောက်ကုန်များမှာလည်း ကုန်ဈေးနှုန်းအဆမတန်မြင့်တက်လာသည်။

ဆန်အဓိကထွက်သည့် သျှမ်းတောင် ပုံးအင်းဒေသတွင် စပါးဧက ထောင်ပေါင်းများစွာနှစ်မြှုပ်သွားတာကြောင့် ဆန်စပါးပို၍ရှားပါးခက်ခဲလာနိုင်ပြီး၊ လာမည့်နှစ်အတွက်လည်း ပြည်သူများအတွက် ဆန် ပြဿနာကြုံရနိုင်ကြောင်းလည်း ဆန်ကုန်သည်များက ပြောသည်။ 

အလုပ်သင် သတင်းထောက် နန်းလရောင် ရေးသားသည်။