သျှမ်းပြည်နယ်တောင်ပိုင်း၊ ရွာငံမြို့ မြောက်ဘက်ရှိ ကျေးရွာများတွင် စစ်ကောင်စီမှ သန်းခေါင်စာရင်းကောက်ယူနေပြီး စစ်မှုထမ်းရန်ခြိမ်းခြောက်မှုများပါ ရှိနေကြောင်း သတင်းရရှိသည်။

စစ်ကောင်စီမှ သန်းခေါင်စာရင်းကို အောက်တိုဘာလ ၁ ရက်နေ့မှ ၁၅ ရက်အထိ သန်းခါင်စာရင်းကောက်မည်ဟု စစ်ကောင်စီက ကြေညာခဲ့ပြီးနောက် ရွာငံမြို့နယ်အပါဝင် တခြားသော ဒေသများတွင်လည်း စစ်ကောင်စီက သန်းခေါင်စာရင်း စတင်ကောက်ခံနေကြောင်း ဒေသခံများ ပြောပြချက်အရသိရသည်။

ထိုကဲ့သို့ ရွာငံ မြောက်ဘက်ဒေသ တကြော မှာ စစ်ကောင်စီက သန်းခေါင် စာရင်း စတင်ကောက်ခံရာတွင် စစ်သား ဆယ်ဦးခန့်နှင့် ရပ်ကွက်အုပ်ချုပ်ရေးမှူးတို့က ဦးဆောင်ကောက်ခံနေစဉ် ပြည်တွင်း အခြားမြို့သို့ ပြောင်းရွှေ့အလုပ်လုပ်နေသူနှင့် ပြင်ပသင်တန်းတက်နေသည့် မိသားစုဝင်များကို စစ်မှု့ထမ်းရန်အတွက် ပြန်ခေါ်ထားရန် ခြိမ်းခြောက်ပြောဆိုသွားကြောင်း ကိုယ်တိုင်ကြုံတွေ့ခဲ့သည့် အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

“ သန်းခေါင်စာရင်းက မနေ့က လာကောက်တယ်။ အိမ်မှာ မိသားစုဘယ်နှယောက်ရှိလဲ ။ဘယ်သွားတာလဲ အကုန်မေးတာ။ ကျမကလေးက ကွန်ပျူတာသင်တန်း သွားတက်နေတာ။အဲဒါကို ပြန်ခေါ်ခိုင်းတာ။စစ်မှု့ထမ်းရမယ် ဘာညာပြောဆိုသွားတယ်။ “ ဟု ၎င်းက ပြောသည်။

သန်းခေါင်စာရင်းကောက်ယူရာတွင် မှတ်ပုံတင် နံပါတ်၊ အမည်၊အသက်၊နေရပ်လိပ်စာနှင့် လူဦးရေ မည်မျှရှိသည်ကို မေးမြန်းကောက်ခံနေပြီး အမှတ်စဉ် (၆) စစ်မှုထမ်းရန်အတွက် သတ်မှတ်ထားသည့် အသက်ရွယ် အပိုင်းခြားအကျုံးဝင်သူများကိုပါ စာရင်းကောက်ခံသွားကြောင်း သိရသည်။

သန်းခေါင်စာရင်းကောက်ယူနေစဉ် စစ်မှု့ထမ်းရန် ခြိမ်းခြောက်ပြောဆိုမှုကြောင့် သန်းခေါင်စာရင်းလာမကောက်သေးသည့် ကျေးရွာအချို့တွင် စိုးရိမ်ကြောက်ရွံ့နေကြရသည်။

“ အဒေါ်တို့ဆီတော့ လာမကောက်သေးဘူး။ ဒါပေမဲ့ လာကောက်မှာကြောက်တယ်။ စစ်သားမြင်ရင်ကို ကြောက်နေတာ သူတို့ က မထင်ရင်မထင်သလို ရိုက်နှက်ခဲ့မှာ ခြိမ်းခြောက်ခံရမှာတွေ ကြောက်တယ်။” ဟု အသက် ၅၀အရွယ်ရှိ အမျိုးသမီးတစ်ဦးက ပြောသည်။

သန်းခေါင်စာရင်းလာကောက်မည့် စစ်ကောင်စီတပ်သားများကို နွေးထွေးကြိုဆိုရန်နှင့် စားသောက်ဖွယ်ရာများပါ ပြင်ဆင်ထားရန် အုပ်ချုပ်ရေးမှူးက မှာကြားထားကြောင် ၎င်းက ထပ်လောင်းပြောသည်။

လက်ရှိရွာငံမြို့နယ်ကျေးရွာအချို့တွင် ရေကြီးရေလျှံမှုများကြုံတွေနေရပြီး လူမှုကယ်ဆယ်ရေးနှင့် စားနပ်ရိက္ခာအတွက် အကူညီများစွာလိုအပ်နေသကဲ့သို့ ရေကြီးမှုကြောင့် ပြောင်းရွှေ့နေထိုင်နေရချိန် သန်းခေါင်စာရင်း ကောက်ယူမှုသည် အလွန်ပင် စိုးရိမ်စရာဖြစ်ကြောင်း ရွာငံဒေသခံများက ဆိုပြန်သည်။

အလုပ်သင် သတင်းထောက် နန်းလရောင် ရေးသားသည်။