သျှမ်းပြည်နယ်မြောက်ပိုင်း လားရှိုးမြို့ မန်နားကျေးရွာတွင် စစ်ကောင်စီမှ လေကြောင်း ဗုံးကြဲ တိုက်ခိုက်သဖြင့် အရပ်သား ၉ ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ယမန်နေ့ (စက်တင်ဘာ ၃၀) ရက် ည ၁၀ နာရီဝန်းကျင်တွင် လားရှိုးမြို့ ရပ်ကွက် ၁၂ ဘက်ရှိ ဟူးမွန် အုပ်စု မန်နားကျေးရွာ ကို စစ်ကောင်စီတပ်က ပေါင် ၅၀၀ ဗုံး ၄ လုံး ကြဲချခဲ့သဖြင့် လူနေအိမ်ပျက်စီးမှုအပြင် အရပ်သား ၉ ဦး ထိခိုက်ဒဏ်ရာရရှိခဲ့ပြီး၊ ၃ ဦး ဒဏ်ရာပြင်းထန်ရကာ အရေးပေါ်ဆေးကုသမှုခံယူနေရကြောင်း လားရှိုးဒေသခံအမျိုးသားတစ်ဉီးက သျှမ်းသံတော်ဆင့်ကိုပြောသည်။
“ မနေ့ညက ဆယ်နာရီမှာ ဗုံးလာကြဲတာ ။ စစ်တပ်က ကိုးကန့်ရှိတဲ့နေရာကို ပိုပြီးလာကြဲတယ်။ စစ်တပ်က ညဆိုရင် ၁၀နာရီ မနက်ဆို ၂နာရီနဲ့ ၃ နာရီမှာလာကြဲ တာ။ လူ ၉ ဦး ထိခိုက်တယ် ။အခုလားရှိုးဖက်က လူတွေအကုန်လုံးမနေရဲတော့ဘူး။”ဟု လားရှိုးဒေသခံအမျိုးသား က ဆိုသည်။
ထို့အပြင် စစ်တပ်မှ အများပြည်သူ အိပ်မောကျချိန်တွင် ဗုံးလာကြဲတာကြောင့် မြို့ခံများ ကြောက်လန့်ကာ မအိပ်ရဲဖြစ်နေကြကြောင်း၊ စစ်ကောင်စီသည် မကြာခဏဗုံးလာကြဲမှုကြောင့် လားရှိုးမြို့ခံများ ဘေးလွတ်ရာ ရှောင်တိမ်းနေကြရပြီး အချို့ ငွေကြေးအခက်ခဲကြောင့် မရှောင်နိုင်သည့် မြို့ခံများလည်း ကျန်ရှိနေသေးကြောင်း သိရသည်။
“နောက်တစ်ခါစစ်ရှောင်ဖို့ စီးပွားရေးတွေလည်း အဆင်မပြေဘူး။ ဘာအလုပ်မှလည်းမရှိဘူး။ လားရှိုးကနေ ကျေးသီးသွားတာ ကားခ ငါးသိန်းကျပ်ကုန်တယ်။ စစ်ရှောင်စခန်းမှာ သွားနေတာ လက်မခံတော့ဘူးတဲ့။ အဲကြောင့်အိမ်ငှားနေရတယ်။ ပိုက်ဆံရှိမှ စစ်ရှောင်တာ အဆင်ပြေတယ်။ ပိုက်ဆံမရှိလို့ မရှောင် ကြတဲ့ သူတွေလဲ မြို့ထဲမှာ ကျန်ခဲ့တယ်။” ဟု စစ်ရှောင်လာသည့် အမျိုးသမီးတစ်ဦး ပြောသည်။
ပြီးခဲ့သည့် စက်တင်ဘာလအတွင်း လားရှိုးမြို့ကို စစ်ကောင်စီမှ ၉ ကြိမ် လေကြောင်းမှ ဗုံးကြဲတိုက်ခိုက်တာကြောင့် ဒေသခံ များထိခိုက်ဒဏ်ရာရကာ နေအိမ် အဆောက်ဦးများလည်း ပျက်စီးခဲ့သည်။
လားရှိုးမြို့ကို ကိုးကန့်တပ် (MNDAA) နှင့် ပူးပေါင်းတပ်များကိ ဇူလိုင်လ ၂၆ ရက်နေ့တွင် သိမ်းပိုက်ရရှိခဲ့ပြီး နောက် စစ်ကောင်စီမှ မကြာခဏ လေကြောင်း ဗုံးကြဲ တိုက်ခိုင်ခြင်းများ လုပ်ဆောင်လာခဲ့သည်။
အလုပ်သင် သတင်းထောက် နန်းလရောင် ရေးသားသည်
Leave a Comments