စစ်ဘေး၊ ရေဘေးနှင့် ကြုံတွေ့နေရသည့် သျှမ်းပြည်တွင် ရွေးကောက်ပွဲ ပြန်လည်ကျင်းပနိုင်ရန်အတွက် စစ်ကောင်စီက သန်းခေါင်စာရင်းစတင်ကောက်ခံနေပြီ ဖြစ်ကြောင်း စုံစမ်းသိရသည်။

အောက်တိုဘာလ ၁ ရက်နေ့မှ ၁၅ ရက်အထိ သန်းခေါင်စာရင်းကောက်မည်ဟု စစ်ကောင်စီက ကြေညာခဲ့ပြီးနောက် တန့်ယန်းမြို့အပါအဝင် မိုင်းတုံ၊ မိုင်းဆတ်နှင့် ဟိုပုံးမြို့တွင် စစ်ကောင်စီက သန်းခေါင်းစာရင်းကောက်ခံနေသည်ဟု ဒေသခံများထံမှသိရသည်။

တိုက်ပွဲများနှင့် လေကြောင်းတိုက်ခိုက်မှုများ ကြုံတွေ့နေရသော သျှမ်းပြည်မြောက်ပိုင်း မြို့နယ် အတော်များများတွင် အလုံးစုံ သန်းခေါင်စာရင်းကောက်နိုင်ရန်အတွက် ခဲယဉ်းနေသော်လည်း တန့်ယန်းမြို့တွင်မှု စစ်ကောင်စီက တစ်ရက်ကြိုပြီး ကောက်ခံခဲ့သည်ဟု တန့်ယန်းမြို့ဒေသခံတစ်ဦးက ပြောသည်။

“မနေ့က လာကောက်တယ်လို့တော့ကြားတယ်။ ဒါပေမဲ့ ကျနော်ဆီမှာတော့ မရောက်သေးဘူး” ဟု တန့်ယန်းမြို့ ဒေသခံ အမျိုးသားတစ်ဦးက ပြောသည်။

ထို့အပြင် ရေကြီးရေလျှံမှုဖြစ်ပွားခဲ့သော မိုင်းတုံ၊ မိုင်းဆတ်မြို့တွင်လည်း စစ်ကောင်စီ၏ သန်းခေါင်စာရင်းကောက်ခံမှုကို လူဝင်မှုကြီးကြပ်ရေးဌာနဝန်ထမ်းများက တာဝန်ယူပြီးကောက်ခံပေးနေသည်ဟု မိုင်းတုံမြို့ဒေသခံတစ်ဦးက ပြောသည်။

“ဟုတ်တယ်။ ဒီနေ့ သန်းခေါင်စာရင်း စကောက်နေပြီ။ အလုပ်တွေတော့ အရမ်းရှုပ်နေတယ်” ဟု မိုင်းတုံမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။

စာရင်းကောက်ခံသူများက အမည်၊ အသက်၊ နေရပ်လိပ်စာ၊ မှတ်ပုံတင် အပန်းရောက်ကတ် ကိုင်ဆောင်ခြင်း ဟုတ်၊ မဟုတ် စစ်ဆေးမေးမြန်းပြီး ကောက်ခံနေသည်ဟုဆိုသည်။

အောက်တိုဘာ ၁ရက်နေ့မှ ၁၅ရက်နေ့ထိကောက်ယူသွားမည်ဖြစ်ပြီး လိုအပ်ပါက ရက်တိုးကောက်ခံသွားမည်ဖြစ်ကြောင်း စစ်ကောင်စီဝါဒဖြန့်သတင်းစာများတွင် ဖော်ပြထားသည်။

အလားတူ ဟိုပုံးမြို့တွင် လူဦးရေနှင့် အိမ်အကြောင်းအရာ သန်းခေါင်စာရင်း ကောက်ယူမည်ဖြစ်ကြောင်း ယနေ့ အောက်တိုဘာလ ၁ ရက်က အကြောင်းကြားခဲ့သည်ဟု ဟိုပုံးမြို့ဒေသခံတစ်ဦးက ပြောသည်။

“မနက်ဖြန်ကျရင် အိမ်ထဲဝင်ပြီးလာကောက်မယ်လို့တော့ ပြောတယ်။ ဒီနေ့တော့ အကြောင်းကြားစာတွေ လာပို့ထားတယ်” ဟိုပုံးမြို့ဒေသခံတစ်ဦးက ပြောသည်။

ပြီးခဲ့သည့် ၂၀၂၀ ခုနှစ် ရွေးကောက်ပွဲတွင် မဲမသမှုအကြောင်းပြချက်ဖြင့် စစ်တပ်က ၂၀၂၁ ခုနစ် ဖေဖော်ဝါရီမှာ အာဏာသိမ်းပြီး သုံးနှစ်ကျော်ကာလအတွင်းမှာ စစ်ရေး၊ နိုင်ငံရေး၊ စီးပွားရေး ကြပ်တည်းမှုများ ရင်ဆိုင်နေရသည့် စစ်ကောင်စီသည် နိုင်ငံရေးနည်းလမ်းဖြင့် ထွက်ပေါက်ရှာနိုင်ရန်အတွက် ရွှေးကောက်ပွဲကို ပြန်လည်ကျင်းပခြင်း ဖြစ်သည်။

ထိုသို့ ရွေးကောက်ပွဲ ပြန်လည်ကျင်းပနိုင်ရန်အတွက် အကြမ်းဖက်အဖွဲ့များ၊ သောင်းကျန်းသူများဟု စစ်ကောင်စီက သုံးနှုန်းထားသော တော်လှန်ရေးအင်းအားစုများ လက်နက်စွန့်၍ ရွေးကောက်ပွဲဝင်ရန် စစ်ကောင်စီက ကမ်းလှမ်းထားသည်။

သို့သော် စစ်ကောင်စီ၏ ရွေးကောက်ပွဲကမ်းလှမ်းချက်ကို လက်မခံနိုင်ဟု တော်လှန်ရေး အင်းအားစုများက တုံ့ပြန်ထားသည်။

“စစ်တပ်က ဖွဲ့စည်းပုံအခြေခံဥပဒေ ၂၀၀၈ ကို ကိုင်ဆွဲပြီး တိုင်းပြည်ငြိမ်းချမ်းအောင်လုပ်မယ်ဆိုတာက မဖြစ်နိုင်တာပါ။ တိုင်းရင်းသားအားလုံးအတွက် တန်းတူညီမျှမှုမရှိသေးသ၍တော့ စစ်မှန်တဲ့ ငြိမ်းချမ်းရေးဆိုတာ မဖြစ်နိုင်ဘူး။ ဖွဲ့စည်းပုံအခြေခံဥပဒေ မပြင်သေးသ၍၊ တိုင်းရင်းသာ တန်းတူညီမျှမရှိရေးအတွက် မလုပ်နိုင်သေးသ၍ ဒီနိုင်ငံမှာ တော်လှန်မှုတွေ၊ စစ်ပွဲ၊ တိုက်ပွဲ ပဋိပက္ခတွေ ပေါ်ပေါက်ဦးမှာပဲ” ဟု တန့်ယန်းမြို့ ဒေသခံအမျိုးသားတစ်ဦးက ပြောသည်။

သန်းခေါင်စာရင်းကောက်ယူခြင်းသည် နိုင်ငံတော်အတွက် လိုအပ်သော အချက်လက်များကို ကောက်ယူခြင်းဖြစ်ပြီး ပုဂ္ဂိုလ်ရေးလုံခြုံမှုနှင့် အချက်လက်အလွဲသုံးမှုတို့ မဖြစ်ပေါ်စေရန် ဥပဒေဖြင့် ကာကွယ်ပေးထားသည်ဟု စစ်ကောင်စီက ဆိုသော်လည်း အာဏာသိမ်းမှု ဆန့်ကျင်သူ အများအပြားက ၎င်းတို့၏ လုံခြုံရေးအတွက် စိုးရိမ်နေကြသည်။

“ သန်းခေါင်စာရင်းလာကောက်တာ အိမ်တွေဆို ဂရန်လား၊ ၁၀၅ လား၊ အရပ်စာချုပ်လား။ ကားဆိုရင်လည်း လိုင်စင်လား၊ အလွတ်လား။ မိသားစုဘယ်နှစ်ယောက်၊ ပညာအရည်အချင်း၊ အလုပ်အကိုင်လား လာမေးသွားဖူးတယ်။ အခုလည်း ရွေးကောက်ပွဲပြန်လုပ်မယ်ဆိုတော့ ကိုယ်တွေကတော့ ပူးပေါင်းမှာမဟုတ်ဘူး” ဟု တောင်းကြီးမြို့ဒေသခံအမျိုးသား တစ်ဦးက ပြောသည်။

ချင်းလက်နက်ကိုင် ၆ ဖွဲ့ ပါဝင်သည့် ချင်းညီနောင်အဖွဲ့က ၎င်းတို့ဒေသအတွင်း သန်းခေါင်စာရင်း ကောက်ယူမှုကို တားမြစ်ပြီး ပူးပေါင်းပါဝင်သူတို့ကို အရေးယူမည်ဟု စက်တင်ဘာ ၃၀ တွင် ကြေညာချက် ထုတ်သည်။