သျှမ်းပြည် အရှေ့ပိုင်း၊ တာချီလိတ်မြို့နယ်တွင် ၅ ရက်ဆက် မိုးသည်းထန်နိုင်သဖြင့် မယ်ဆိုင်ချောင်းရေ တက်လာနိုင်ပြီး ရေကြီးရေလျှံမှုများ ဖြစ်ပွားနိုင်ကြောင်း မိုးလေဝသ ပညာရှင်ဉီးဝင်းနိုင်က ယမန်နေ့ (စက်တင်ဘာလ ၂၈ ရက်) ညပိုင်းတွင် သတိပေးသည်။
လာမည့် စက်တင်ဘာလ ၃၀ ရက်မှ အောက်တိုဘာလ ၄ ရက်နေ့ အထိ တာချီလိတ်မြို့နှင့်အနီးတဝိုက်၊ မယ်ဆိုင်ချောင်းတလျှောက် မိုးများနိုင်ပြီး ၂၄ နာရီအတွင်း မိုးရေချိန် ၂ လက်မခန့်၊ ၂ ရက်မှ ၃ ရက်ခန့်အထိ ဆက်တိုက် ရွာသွန်းနိုင်သဖြင့် အဆိုပါ ရက်များအတွင်း မယ်ဆိုင်ချောင်းရေတက်ပြီး ရေကြီးရေလျှံမှုများ ဖြစ်ပေါ်နိုင်ကြောင်း ဆိုသည်။
ယမန်နေ့ ညပိုင်းက တောင်ကျရေကြောင့် မယ်ဆိုင်ချောင်းနှင့် ပုံလို့ချောင်းရေ ပြန်တက်လာကြောင်း တာချီလိတ် မြို့ခံများက ဆိုသည်။
တာချီလိတ်မြို့တွင် ပြီးခဲ့သည့် စက်တင်ဘာလ ၁၀ ရက်နေ့မှ စက်တင်ဘာလ ၁၂ ရက်နေ့အထိ ရေကြီးခဲ့ရာ စက်တင်ဘာလ ၁၃ ရက်နေ့က စပြီး ရေပြန်လည် ကျသွားသော်လည်း ရွှံ့နွံများကို ယနေ့အထိ ရှင်းလင်းနေရဆဲ ဖြစ်သည်။
လာမည့် အောက်တိုဘာလ ၁ ရက်နေ့မှ ၅ ရက်နေ့ အတွင်း နိုင်ငံတဝှမ်း မိုးရွာပြီး နေရာကွက်၍ မိုးကြီးခြင်း၊ လေပြင်းတိုက်ခတ်ခြင်းများ ဖြစ်ပေါ်နိုင်၍ ရေကြီးမှုနှင့် မြေပြိုမှုများ သတိပြုရန် လိုအပ်ကြောင်း မိုးလေဝသဌာနက ယမန်နေ့ (စက်တင်ဘာလ ၂၈ ရက်) ညပိုင်းတွင် ထုတ်ပြန်ထားသည်။
မိုးသည်းထန်စွာ ရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးကြိုးပစ်ခြင်း၊ မိုးသီးကြွေခြင်း၊ လျှပ်တစ်ပြက် ရေကြီးခြင်းနှင့် မြေပြိုမှုများ ဖြစ်ပေါ်နိုင်ပါသဖြင့် ကုန်းမြင့်ဒေသတွင် နေထိုင်သူများအနေဖြင့် မြေပြိုမှု၊ မြစ်ငယ်၊ ချောင်းငယ်များအနီး နေထိုင်သူများ အနေဖြင့် ရေကြီး၊ ရေလျှံမှုများ ကြိုတင်သတိပြုရန် ထုတ်ပြန်ချက်တွင် ဖော်ပြထားသည်။
စက်တင်ဘာ ဒုတိယပတ်က စတင် ဖြစ်ပွားခဲ့သည့် မိုးသည်းထန်စွာ ရွာသွန်းမှုကြောင့် နေပြည်တော်၊ ပဲခူး၊ ကရင်နီ၊ ကရင်၊ မကွေး၊ မန္တလေး၊ မွန်၊ ရှမ်း အရှေ့ပိုင်းနှင့် တောင်ပိုင်း အပါအဝင် ၅၉ မြို့နယ်ရှိ ခန့်မှန်းခြေ ပြည်သူ ၆၃၁,၀၀၀ ဦးခန့် ရေဘေးသင့်ခဲ့ပြီး ရာနှင့်ချီ၍ သေဆုံးကာ အများအပြား ပျောက်ဆုံးနေကြောင်း ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က စက်တင်ဘာ ၁၆ ရက်တွင် ထုတ်ပြန်ထားသည်။
Leave a Comments