သျှမ်းပြည်တောင်ပိုင်း ရွာငံမြို့နယ် နွားဘန်းကြီးရွာတွင် အမျိုးသမီးတစ်ဦးအသတ်ခံခဲ့ရကြောင်း သိရသည်။
ရွာငံမြို့နယ် နွားဘန်းကြီးရွာတွင်နေထိုင်သည့် အသက် ၄၇နှစ်အရွယ် ဒေါ်မှိုင်းဝေ
ယမန်နေ့ (စက်တင်ဘာလ ၂၁) ရက်တွင် ကျေးရွာ၏ အနောက်တောင်ဘက် တစ်မိုင်ခန့်အကွာရှိ မြင်းကပတ် တောင်ယာစိုက်ခင်း၌ ရှိနေစဉ် အသတ်ခံခဲ့ရပြီး ဓားထိုးဒဏ်ရာ သေနတ်ဒဏ်ရာတို့ဖြင့် သေဆုံးနေသည့်အလောင်းကို ဒေသခံများက တွေ့ရှိခဲ့သည်။
“သူ့ကို ယာတဲထဲမှာ တွေ့ဟာ။ သူကသွေးတွေနဲ့သေနေပြီ။ ဘယ်အဖွဲ့က သတ်လိုက်တာလည်းတော့မသိဘူး။ အခုက ဥပဒေကလည်း စိုးမိုးမှုမရှိတော့ ကိုယ်မကျေနပ်တဲ့သူ ကြည့်မရတဲ့သူဆို သတ်နေကြတာ ။ “ဟု ဒေသခံ တစ်ဦးကပြောသည်။
ဒေါ်မှိုင်းဝေသည် နွားဘန်းကြီးရွာတွင် စားဝတ်နေရေးအတွက် အရက်ရောင်းချနေသူဖြစ်ပြီး ရပ်ရွာထဲတွင် စစ်ကောင်စီနှင့် ရင်းနှီးနေသောကြောင့် အမြင်မကြည်သူများလည်းရှိကြောင်းသိရသည်။
” သူက စစ်ကောင်စီနဲ့လည်း ရင်းနှီးတဲ့သူဆိုတော့ အခု သူ (ဒေါ်မှိုင်းဝေ) အသတ်ခံရပြီးနောက် စစ်ကောင်စီတပ်သားတွေက ပိုများလာတယ်။ သွားရလာရ ပိုပြီးကျပ်လာတယ်” ဟု ဒေသခံအမျိုးသမီးတစ်ဉီးက ပြောသည်။
လက်ရှိနွားဘန်းကြီးရွာတွင် စစ်ကောင်စီတပ်သားများ လုံခြုံရေးပို၍တင်းကျပ်လာပြီး အဝင်အထွက်များ သေချာ စောင့်ကြပ်စစ်ဆေးနေကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments