သျှမ်းပြည်မြောက်ပိုင်း ညီနောင်မဟာမိတ် ထိန်းချုပ်ထားနိုင်သည့် ဒေသတွေကို စစ်ကောင်စီ ဗုံးမကြဲဖို့အတွက် ကိုးကန့်တပ်ဖွဲ့ MNDAA က တရုတ်ကို ကြားဝင်စေ့စပ်ညှိနှိုင်းဖို့အတွက် အကူအညီတောင်းဆိုသော်လည်း လက်တွေ့တွင် မဖြစ်လာကြောင်း စုံစမ်းသိရသည်။

MNDAA သည် တရုတ်ထံ အကူညီတောင်းခံစာကို စက်တင်ဘာ ၄ ရက်နေ့ ရက်စွဲဖြင့် ၁၉ ရက်တွင် MNDAA ၏ လူမှုကွန်ရက်စာမျက်နှာတွင် ထုတ်ပြန်လာသည်။

ထို ထုတ်ပြန်ချက်ကိုကြေညာပြီးနောက် ၂ ရက်အကြာ စက်တင်ဘာ ၂၁ ရက်တွင် MNDAA ထိန်းချုပ်ထားနိုင်သည့် လားရှိုးမြို့ကို စစ်ကောင်စီက လေကြောင်း နှင့် ဗုံးကြဲတိုက်ခိုက်ခဲ့သည်။

အလားတူ TNLA ထိန်းချုပ်နိုင်သည့် နောင်ချိုမြို့ထဲကိုလည်း စစ်ကောင်စီက လေကြောင်းဖြင့် ဗုံးကြဲခဲ့သည်။

MNDAA တပ်ဖွဲ့သည် တရုတ်အာဏာပိုင်ကို အကူအညီတောင်းသော်လည်း ထိရောက်မှုမရှိကြောင်း နှင့် တရုတ်က စစ်ကောင်စီဘက်ကို အားပေးနေသည့်သဘောမျိုးရှိနိုင်ကြောင်း သျှမ်းနိုင်ငံရေး သုတေသီ စိုင်းဝမ်းစိုင် ပြောဆိုလိုက်သည်။

“ MNDAA က တရုတ်ကို အကူညီတောင်းတာ အရာမရောက်ဘူးလို့ပြောလို့ရတယ်။ အခုလောလောလတ်လတ်ဖြစ်သွားတဲ့ လားရှိုး နဲ့ နောင်ချိုကိုကြည့်ရင်သိပါတယ်။ တစ်နည်းအားဖြင့် တရုတ်က စစ်ကောင်စီကို ပါဝင်ထောက်ခံပြီ မြောက်ပိုင်းမဟာမိတ်ဘက် ကိုဖိအားပေးချင်တဲ့ သဘောလည်းထားလို့ရတယ်။ ဒါမှမဟုတ် စစ်ကောင်စီရဲ့ ပြည်တွင်းစစ်ကို စိတ်တိုင်းကျတိုက်နေတာကို ဘာမှတားမြစ်ဖို့မရှိဘူးလို့ သဘောလည်းထားနိုင်တယ်” ဟု စိုင်းဝမ်းစိုင်က ဆိုသည်။

ကိုးကန့်တပ်ဖွဲ့ MNDAA သည် ကိုယ်ပိုင်အုပ်ချုပ်ခွင့်ရရှိဖို့အရေး ၊ နိုင်ငံတော်အာဏာကိုလုယူမည်မဟုတ်ကြောင်း ၊ နိုင်ငံတော်မှ ခွဲထွက်မည်မဟုတ်ကြောင်း နှင့် တရုတ် နှင့် မြန်မာကို ဆန့်ကျင်သော နိုင်ငံခြားအဖွဲ့စည်း NUG နှင့် စစ်ရေး နိုင်ငံရေးကို ပူးပေါင်းသွားမည်မဟုတ်ကြောင်း ထုတ်ပြန်ထားသည်။

၁၀၂၇ စစ်ဆင်ရေးကာလအတွင်း ညီနောင်မဟာမိတ်နှင့်အတူ NUG လက်အောက်ရှိ PDF တပ်ဖွဲ့ နှင့် NUG လက်အောက်မဟုတ်သော PDF တပ်ဖွဲ့တွေကလည်း ပါဝင်တိုက်ခိုက်ခဲ့ကြသည်။

MNDAA ၏ ထုတ်ပြန်ချက်အပေါ်တွင် NUG လက်အောက်ရှိသည့် မန္တလေး PDF ကတော့ ယခုလတ်သလောအချိန်တွင် မှတ်ချပေးစရာမရှိသေးကြောင်း သျှမ်းသံတော်ဆင့်ကို ပြောသည်။

“ အဲဒီကိစ္စနဲ့ ပတ်သက်ပြီးတော့ ကျနော်တို့အခုတော့ ဘာမှ မှတ်ချက်ပေးစရာမရှိသေးပါဘူး။ သျှမ်းပြည် မြောက်ပိုင်းမှာတော့ စစ်ရေးထပ်ဖော်ဆောင်သွားဖို့ရှိပါတယ်” ဟု မန္တလေး PDF မှ ပြောရေးဆိုခွင့်ရှိသူ အော်စမွန်က သျှမ်းသံတော်ဆင့်ကို ပြောသည်။

ကိုယ်ပိုင်အုပ်ချုပ်ခွင့်ရရှိရေးအတွက် စစ်ကောင်စီကို တိုက်ခိုက်ပြီ ထိန်းချုပ်ထားနိုင်သည့်မြို့များတွင် လုံခြုံမှုရှိနိုင်မည် မဟုတ်ကြောင်း စစ်ကောင်စီကလည်း ထုတ်ပြန်ထားသည်။

စစ်ကောင်စီက ညီနောင်မဟာမိတ်တွေထိန်းချုပ်ထားနိုင်သည့် ဒေသများကို လိုအပ်ပါက တန်ပြန် ထိုးစစ်ဆင်သွားမည် ဖြစ်ကြောင်း နှင့် ညီနောင်မဟာမိတ် ၊ PDF များရှိသည့် နေရာတွင် နေထိုင်သော ပြည်သူများအနေဖြင့် ထွက်ခွာရန် စစ်ကောင်စီက ၎င်း၏ ဝါဒဖြန့်ချိသည့် သတင်းစာတွင် ကြေညာထားသည်။

ထိုကြောင့် စစ်ကောင်စီက ညီနောင်မဟာမိတ်များ အုပ်ချုပ်ရေး ယန္တရား မလည်ပတ်နိုင်အောင် အရပ်သားရှိသည့် နေရာများကို ဆက်တိုက်ဗုံးကြဲမှုဖြစ်နေမည်ဖြစ်ကြောင်း သျှမ်းနိုင်ငံရေး သုတေသီစိုင်းဝမ်းစိုင်က ထောက်ပြ ပြောဆိုလိုက်သည်။

“ပြည်သူလူထုနဲ့ အဆောက်အအုံတွေကို ပစ်မှတ်ထားဗုံးကြဲတာဟာ ရုရှားက ယူကရိန်းကို လူနေရပ်ကွက်တွေကို ဗုံးကြဲသလိုပါပဲ။ ဒါဟာ ဖိအားပေးမှု တစ်ခုလိုမြင်ရမှာပါ။ တစ်နည်းအားဖြင့် မဟာမိတ်တွေ လုံးဝအုပ်ချုပ်လို့မရအောင် အုပ်ချုပ်ရေး ယန္တာရားမလည်ပတ်နိုင်အောင်လုပ်တာပါ။ စစ်ဘီလူးတွေရဲ့ လုပ်ထုံးအတိုင်းတိုင်းသူပြည်သားတွေကို ညာသာထောက်ထားမှုဆိုတာမရှိပါဘူး”ဟု စိုင်းဝမ်းစိုင်က ဆိုပြန်သည်။

‌သို့သော် ပြည်သူများသည် စစ်ဘေးထွက်ပြေးတိမ်းရှောင်ရန်အတွက် နေရာမရှိသကဲ့သို့ အလုပ်အကိုင်မရှိသောကြောင့် အန္တရာယ်ကြားထဲ အသက်ကို ရင်းပြီးနေထိုင်ကြရကြောင်း လားရှိုးမြို့ ဒေသခံအမျိုးသမီးတစ်ဦးက ပြောသည်။

“ ထွက်ပြေးဖို့အတွက်ကလည်း ပိုက်ဆံမရှိဘူး။ အလုပ်မရှိတော့ ပိုက်ဆံမရှိဘူး။ ပြီးတော့ ဘယ်နားကို ထွက်ပြေးရမလဲဆိုတာမသိဘူး။ ထွက်ပြေးမယ်ဆိုရင်လည်း ပိုက်ဆံလိုတယ်။ ဒါကြောင့် ဒီတိုင်းပဲနေလိုက်တော့တယ်။ လေယာဉ်သံကြားရင်လည်း အိမ်သာထဲပြေးပုန်းနေလိုက်တယ်” ဟု ဒေသခံအမျိုးသမီးက ပြောသည်။

ညီနောင်မဟာမိတ်ထိန်းချုပ်ထားနိုင်သည့်ဒေသတွင်း နေထိုင်နေသည့် ပြည်သူများသည် စစ်ဘေးအပြင် အငတ်ဘေးပါ ရင်ဆိုင်လာနိုင်ကြောင်း ဒေသခံအချို့က စိုးရိမ်နေကြသည်။