သျှမ်းပြည်တောင်ပိုင်း ဖယ်ခုံမြို့နယ်တွင် တောင်ကျချောင်းရေကြောင့် ကလေးနှင့် သက်ကြီးရွယ်အို ပြည်သူ ၃ ဦးသေဆုံးသွားခဲ့ကြောင်း စုံစမ်းသိရသည်။
ယမန်နေ့ စက်တင်ဘာလ ၁၁ ရက်နေ့ မွန်းလွဲပိုင်းတွင် ဖယ်ခုံမြို့နယ် သိကျိတ်ရွာထဲသို့ ရုတ်တရက် တောင်ကျချောင်းရေ စီးဆင်းလာမှုကြောင့် ကလေးနှင့် သက်ကြီးရွယ်အို ပြည်သူ ၃ ဦး မျောပါသွားပြီး သေဆုံးသွားခဲ့သည်ဟု ကရင်နီလူ့အခွင့်အရေးအဖွဲ့ တည်ထောင်သူ ကိုဗညားက သျှမ်းသံတော်ဆင့်ကို ပြောသည်။
“ကျနော်ကြားသလောက်တော့ တောင်ကျရေကြောင့် သက်ကြီးရွယ်အိုနဲ့ ကလေးတွေ ၃ ယောက်ပါသွားတယ်” ဟု ကိုဗညားက ပြောသည်။
ထို့အပြင် ဒီမော့ဆိုအရှေ့ဘက်ခြမ်း ချောင်းရေမြင့်တက်မှုကြောင့် စခန်း ၅ ခု ရေနစ်မြုပ်သွားပြီး နေအိမ်နှင့် စားနပ်ရိက္ခာများ ပျက်စီးသွားကြောင်း၊ ဖရူဆို အနောက်ဘက်ခြမ်းတွင်လည်း မြေပြိုမှုကြောင့် ကားလမ်းများ အသုံးပြု၍မရကြောင်း ဆိုသည်။
“ဒီမော့ဆိုအနောက်ဘက်ခြမ်း လမ်းပိုင်းမှာတော့ မြေပြို၊ ရေကြီးတာကြောင့် တချို့ထိခိုက်တာတွေရှိပါတယ်။ လမ်းပိတ်တာတွေလည်းရှိတယ်။ နောက်ပြီး ဖရူဆိုအနောက်ဘက်ခြမ်း ကျေးရွာအချို့လည်း ရွာလုံးကျွတ် ပြောင်းရွှေ့ရမဲ့အခြေအနေရှိတယ်။ နေလို့မရတဲ့အခြေအနေတွေရှိပါတယ်။ စစ်ဘေးရှောင်စခန်းလည်း ရေဝင်တယ်။ လောလောဆယ်ကျနော်တို့သိရသလောက်တော့ အရပ်သားပြည်သူတွေ ၅ ယောက်၊ ၆ ယောက် အထိ သေဆုံးသွားတယ်ဆိုတဲ့ အချက်အလက်တော့ရရှိထားပါတယ်” ဟု ကိုဗညားက ပြောသည်။
အလားတူ တောင်ကျချောင်းရေကြောင့် ကရင်နီတော်လှန်ရေးတပ်ဖွဲ့ဝင်မှ ရဲဘော်များလည်း ထိခိုက်သေဆုံးမှုရှိသည်ဟု သိရှိရသည်။
ထိုသတင်းနှင့်ပတ်သက်၍ လက်ရှိအချိန်ထိ ကရင်နီအမျိုးသားကာကွယ်ရေးတပ်ဖွဲ့ KNDF မှ ထုတ်ပြန်ထားခြင်းမရှိသေးပေ။
Leave a Comments