ဆုံးရှုံးနယ်မြေဒေသများကို တန်ပြန်ထိုးစစ်ဆင်မည်ဟု ကြုံးဝါးနေသည့် စစ်ခေါင်းဆောင် မင်းအောင်လှိုင်က ဂျီနီဗာကွန်ဗင်းရှင်းနှင့်အညီ ဆောင်ရွက်နေကြောင်း အပြည်ပြည်ဆိုင်ရာ ကြက်ခြေနီကော်မတီ (ICRC) ဥက္ကဋ္ဌကို ဆွေးနွေးပြောဆိုခဲ့ကြောင်း သတင်းသိရသည်။

ယမန်နေ့ (စက်တင်ဘာလ ၉ ရက်) နေပြည်တော်တွင် စစ်ခေါင်းဆောင် မင်းအောင်လှိုင်နှင့် အပြည်ပြည်ဆိုင်ရာ ကြက်ခြေနီကော်မတီ (ICRC) ဥက္ကဋ္ဌ Ms. Mirjana Spoljaric Egger တို့ တွေ့ဆုံခဲ့စဉ် စစ်ကောင်စီတပ်အနေဖြင့် ဂျီနီဗာကွန်ဗင်းရှင်းနှင့်အညီ ဆောင်ရွက်နေသည့် အခြေအနေများကို အမြင်ချင်းဖလှယ် ဆွေးနွေးခဲ့ကြောင်း စစ်ကောင်စီထုတ် မြန်မာ့အလင်းသတင်းစာတွင် ဖော်ပြသည်။

ထို့အပြင် အပြည်ပြည်ဆိုင်ရာ ကြက်ခြေနီကော်မတီ အနေဖြင့် မြန်မာနိုင်ငံ၌ လူသားချင်း စာနာထောက်ထားမှုဆိုင်ရာ အကူအညီများ ပေးအပ်ရာတွင် ပြည်သူများ လက်ထဲသို့ လိုအပ်သည့် ကူညီထောက်ပံ့မှုများ အမှန်တကယ် ရောက်ရှိရေးနှင့် မသက်ဆိုင်သည့် အဖွဲ့အစည်းများထံ မရောက်ရှိရေး ကိစ္စများ ဆွေးနွေးခဲ့ကြောင်း စစ်ကောင်စီက ထုတ်ပြန်သည်။

စစ်ခေါင်းဆောင် မင်းအောင်လှိုင်သည် ယင်းကဲ့သို့ ပြောဆိုနေသော်လည်း ပြီးခဲ့သည့် စက်တင်ဘာလ ၃ ရက် သျှမ်းပြည်တောင်ပိုင်း တောင်ကြီးမြို့သို့ ရောက်ရှိလာစဉ် ဆုံးရှုံးလိုက်ရသည့် နယ်မြေဒေသများကို တန်ပြန်ထိုးစစ်ဆင်မှု ပြုလုပ်မည်ဟု ပြောဆိုခဲ့သည်။

၎င်းနောက် “၁၀၂၇ စစ်ဆင်ရေး”အတွင်း ညီနောင်မဟာမိတ်တပ်များ သိမ်းပိုက်ထိန်းချုပ်ထားသည့် နယ်မြေများမှ စာသင်ကျောင်း၊ ဈေး အစရှိသည့် နေရာများအပြင် စစ်ဘေးရှောင်များ ခိုလှုံနေသည့် နေရာများအထိ အများပြည်သူကို ပစ်မှတ်ထားပြီး စစ်ကောင်စီတပ်မှ လေကြောင်းထိုးစစ်ဆင် တိုက်ခိုက်မှု ဆက်တိုက်ပြုလုပ်လာသည်။

ယင်းကဲ့သို့ အရပ်သားများ နေထိုင်ရာ၊ စစ်ဘေးရှောင်စခန်းများ ရှိရာသို့ တိုက်ပွဲဖြစ်ပွားခြင်း၊ စစ်သားများ ဝင်ရောက်နေရာယူခြင်းနှင့် တိုက်ခိုက်မှု ပြုလုပ်ခြင်းတို့သည် စစ်ရာဇဝတ်မှု (War Crimes) ပြစ်မှုမြောက်သကဲ့သို့ မြန်မာနိုင်ငံမှ ပါဝင်လက်မှတ်ရေးထိုးထားသည့် ဂျီနီဗာ ကွန်ဗင်းရှင်း စာချုပ်ပါ စစ်ပွဲအတွင်း အရပ်သားများ ထိခိုက်ကာကွယ်မှုကို အကာအကွယ်ပေးရမည့် စာချုပ်ကိုလည်း ကျူးလွန်ရာ ဖြစ်နေသည်။

စက်တင်ဘာလ ပထမပတ်အတွင်း စစ်ကောင်စီတပ်၏ လေကြောင်းဗုံးကြဲ တိုက်ခိုက်မှုကြောင့် မန်တုံ၊ နမ့်ခမ်း၊ နောင်ချို၊ သီပေါနှင့် လားရှိုးမြို့များတွင် အရပ်သား ဆယ်နှင့်ချီ သေဆုံးမှု ဖြစ်ခဲ့သည်အထိ ဂျီနီဗာကွန်ဗင်းရှင်းစာချုပ်ကို ဆက်တိုက်ကျူးလွန်နေသည်။