စစ်ကောင်စီတပ်၏ လေကြောင်းတိုက်ခိုက်မှုကြောင့် လားရှိုးမြို့တွင် ထိခိုက်ဒဏ်ရာရသူ အရပ်သား ၁၂ ဦးနှင့် သေဆုံးသူ အရပ်သားများရှိသည်ဟု ကိုးကန့်တပ်ဖွဲ့ MNDAA က ယနေ့ စက်တင်ဘာလ ၉ ရက်တွင် ထုတ်ပြန်ထားသည်။

ယနေ့ (စက်တင်ဘာလ ၉ ရက်) နံနက်ပိုင်း ၁၀ နာရီကျော်အချိန်တွင် လားရှိုးမြို့ ရပ်ကွက် ၁ ဗျူဟာလမ်းနှင့် ထွေအုပ်ရုံးကို စစ်ကောင်စီတပ်က လေကြောင်းဖြင့် ဗုံး ၂ ကြဲချပြီး ပေါက်ကွဲမှုကြောင့် အရပ်သား ၁၂ ဦး ဒဏ်ရာရရှိခဲ့သည်ဟု ထုတ်ပြန်ချက်တွင် ဖော်ပြထားသည်။

ထို့အပြင် ထိခိုက်ဒဏ်ရာများကို ဆေးရုံသို့ပို့ဆောင်ထားပြီး သေဆုံးမှုနှင့် အသေအပျောက်အလောင်းများကိုမှု ထပ်မံရှာဖွေနေသည်ဟု ဆိုသည်။

“အခုမြို့ထဲမှာ နေရတာမလုံခြုံဘူး။ ဘယ်အချိန် ဗုံးလာကြဲမှာ မသိတော့ဘူး။ စိုးရိမ်စိတ်ကတော့ တစ်ရိပ်ရိပ်ပဲ။ အခုကမြို့ကို ထွက်ခွာသွားဖို့ဆိုလည်း အဆင်မပြေဘူးလေ။ မြို့ကိုထွက်သွားရင် နေဖို့စားဖို့က စဉ်းစားရပြန်ရရော” ဟု လားရှိုးမြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ယမန်နေ့ စက်တင်ဘာလ ၈ ရက်နေ့တွင်လည်း လားရှိုးမြို့ လေကြောင်းတိုက်ခိုက်မှု ဖြစ်စဉ်အတွင်း ရပ်ကွက် ၁၂ အားကစားကွင်းနှင့် Silver Sky ဟိုတယ်မှ အဆောက်အဦးများ ထိခိုက်ပျက်စီးခဲ့သည်ဟု ဒေသခံများကပြောသည်။

“ဖြစ်နိုင်ရင်တော့ လက်နက်ကိုင်အဖွဲ့အစည်းအနေနဲ့ မြို့ထဲမှာမနေဘဲ သူတို့သိမ်းထားတဲ့ တပ်တွေမှာနေရင် ပြည်သူတွေအတွက် အန္တရာယ်ပိုကင်းနိုင်မယ်ထင်တယ်။ ပြည်သူနဲ့ ရောထွေးနေတော့ သိပ်အဆင်မပြေဘူး။ လုပ်ချင်တာကသူတို့၊ ထိတာက ပြည်သူတွေပဲ ဖြစ်နေတယ်။ စစ်တပ်ကတော့ အပေါ်ကနေ သူတို့ရှိတယ်လို့ ထင်ရင် ထင်သလိုကြဲချမှာပဲ။ အခုကလေ လေယာဉ်လာရင် မဲဖောက်နေရသလိုပဲ။ ဒီနေ့ ဘယ်သူ့အိမ်ပေါ်ကျ မလဲဆိုပြီး တွေးပူနေတယ်” လားရှိုးမြို့ခံ အမျိုးသမီးတစ်ဦးက ပြောသည်။

လားရှိုးမြို့ကို ကိုးကန့်တပ် MNDAA ထိန်းချုပ်ပြီးနောက် ၁ လကျော်ကာလအတွင်းမှာ လားရှိုးမြို့ကို စစ်ကောင်စီတပ်က လေကြောင်းဖြင့် သုံးကြိမ်တိုင်တိုင် ဗုံးကြဲတိုက်ခိုက်ခဲ့ပြီးဖြစ်ကြောင်း သိရှိရသည်။