စစ်ဘေးရှောင် ကလေးငယ်များ၏ ပုံများကို အသုံးချပြီး လူမှုကွန်ရက်စာမျက်နှာ ( Facebook group) များတွင် ငွေလိမ်လည်မှုများရှိနေကြောင်း စုံစမ်းသိရှိရသည်။

ဩဂုတ်လမှစတင်ပြီးတွင် ကရင်နီပြည်(ကယားပြည်နယ်) ဖရူဆိုမြို့နယ်ရှိ စစ်ရှောင်စခန်းများကို လှူတန်းရန်ဟုဆိုကာ စစ်ရှောင်ကလေးများ၏ပုံများကို အသုံးချပြီး Facebook Group များအတွင်း လိမ်လည်မှုများ လိုက်လံပြုလုပ်နေကြောင်းသိရသည်။

ထို့အပြင် မြေပြင်တွင် ကိုယ်တိုင်ပါဝင်ကူညီပေးနေသူ အမျိုးသမီး၏ ပုံများကိုလည်း အသုံးပြုကာ အလှူခံနေသည့်အတွက် ပြည်သူများမှာ အစစ်ဟုထင်မှတ်ပြီး ငွေလွှဲမိသူများပါရှိလာကြောင်းလည်း အမှန်တကယ်ပါဝင်ကူညီပေးနေသူ အမျိုးသမီးတစ်ဦးကပြောသည်။

“ပုံတွေက ဖရူဆိုက ဆရာမတစ်ယောက်ရဲ့ ပုံတွေနဲ့ သုံးနေတာပါ၊ အဖွဲ့လိုက်လည်း ဖြစ်နိုင်ပါတယ်၊ အကောင့်တွေကိုလည်း report လုပ်ပေမယ့် ခဏပိတ်သွားပြီးပြန်တက်လာတယ်၊” ဟု ၎င်းကဆိုသည်။

ပြည်သူများ လှူဒါန်းပေးသော ငွေကြေးများမှာ လိုအပ်နေသော စစ်ဘေးရှောင်များ ထံသို့ မရောက်ရှိဘဲ လူလိမ်များဆီသို့ရောက်နေရသဖြင့် သေချာစစ်ဆေးပြီးမှ လှူဒါန်းပေးကြရန်လည်း တိုက်တွန်းထားသည်။

“သူတို့ကို လှူဖို့ဆိုပြီး ကျွန်မနဲ့ ကျွန်မမိတ်ဆွေတွေဆီလာမေးကြတဲ့သူတွေလည်း များနေပြီ၊ မမေးဘဲ လှူမိသူတွေလည်းရှိတယ်၊ ငွေဘယ်လောက်တောင်ရနေပြီလည်း မသိဘူး ချွေးနည်းစာတွေ လူလိမ်တွေဆီရောက်နေရတာ မတားနိုင်လို့လည်း စိတ်မကောင်းဖြစ်ရတယ်” ဟု​၎င်းက ဆက်ပြောသည်။

ယမန်နေ့ (စက်တင်ဘာလ ၅) ရက် ရက်စွဲဖြင့် ဖရူဆိုမြို့နယ် အနောက်ဘက်ခြမ်း စစ်ရှောင်ကူညီ စောင့်ရှောက်ရေးကော်မတီမှ ထိုသို့ လိမ်လည်မှုများကို ကန့်ကွက်ကြောင်း ထုတ်ပြန်ထားပြီး ပြည်သူများအနေဖြင့် သတိထားကူညီပေးနိုင်ရန်လည်းဖော်ပြထားသည်။

လက်ရှိအချိန်တွင် ထို Kpay ဖုန်းနံပါတ်များဖြင့် အလှူခံနေသည့် သူများမရှိကြောင်း Jobs For Kayah မှ တာဝန်ရှိသူတစ်ဦးကလည်း သျှမ်းသံတော်ဆင့်သို့ပြောသည်။

“စစ်ဘေးရှောင်တွေက ရိက္ခာပြတ်တောက်နေတာတော့ မှန်ပါတယ်၊ ဒါပေမယ့် အဲ့လို‌အလှူခံနေတဲ့သူတော့ မရှိဘူး၊ အလိမ်အညာဖြစ်နိုင်ပါတယ်၊ သူတပါးအခက်အခဲ ဒုက္ခကို ကိုယ်ကျိုးအမြတ်ထုတ်တာမကောင်းပါဘူး” ဟု ၎င်းကပြောသည်။

ကရင်နီပြည် ဖရူဆို၊ ဒီမော့ဆိုဒေသများရှိ စစ်ရှောင်စခန်းများတွင် အကူအညီများစွာလိုအပ်နေပြီး အလှူရှင်များလိုအပ်နေကြောင်းလည်းသိရသည်။

“မြေပြင်မှာကူပေးနေတဲ့သူတွေက လက်ချိုးရေလို့ရပါတယ်၊ စစ်ရေးကလည်း အရေးကြီးနေတယ်၊ အကူအညီလိုအပ်နေတဲ့ ကန့်တွေလည်းများနေတယ်” ဟု ၎င်းကဆက်ပြောသည်။

မြေပြင်တွင် အမှန်တကယ်ကူညီပေးလျက်ရှိသော အဖွဲ့များမှာ Jobs for Kayah၊ Clean Yangon၊ ကမ်းလက်၊ လင်းလက်၊ ထွန်းမြန်မာ၊ ပြည်ကံ့ကော် စသည့် အဖွဲ့အစည်းများသို့ ဆက်သွယ်လှူတန်းနိုင်ကြောင်း ကိုလည်း သူကဆက်ပြောသည်။

လက်ရှိတွင် လွိုင်ကော်မှ တဆင့် ဒမဆ (၁၀၂) တပ်အတွင်းသို့လည်း စစ်ကောင်စီမှ စစ်အင်အားဖြည့်တင်းထားပြီး လက်နက်ကြီး၊ ဒရုန်း ပစ်ခတ်မှုများရှိနေသောကြောင့် ဒီမော့ဆို အရှေ့၊ အနောက်ခြမ်းရှိ စစ်ဘေးရှောင်ပြည်သူများ အထူးဂရုပြုကြရန်လည်း Jobs For Kayah မှဖော်ပြထားသည်။

စက်တင်ဘာ ၅ ရက် နံနက် ၉ နာရီခွဲခန့်တွင်လည်း ဒီမော့ဆိုမြို့နယ်၊ နန်းမယ်ခုံကျေးရွာအား စစ်ကောင်စီမှ ဂျက်လေယာဉ်ဖြင့် ဗုံးကြဲသွားခဲ့ပြီး ပြည်သူထိခိုက်မှုများရှိခဲ့ကြောင်း သိရသည်။

အလုပ်သင် သတင်းထောက် ယူဂျင်း ရေးသားသည်။