သျှမ်းပြည် ကျောက်မဲမြို့တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA မှ ပြန်လည်ထူထောင်ရေးအတွက်ဟု ဆိုကာ လူဦးရေစာရင်းနှင့် အိမ်အကြောင်းအရာကို တစ်အိမ်တက်ဆင်း ကောက်ယူနေကြောင်း စုံစမ်းသိရသည်။

ဩဂုတ်လ နောက်ဆုံးပတ်မှ စတင်ပြီး ကျောက်မဲမြို့ပေါ် ရပ်ကွက်နှင့် ကျေးရွာများတွင် TNLA တပ်ဖွဲ့မှ ပြန်လည်ထူထောင်ရေးအတွက်ဟု ဆိုကာ တိုက်ပွဲအတွင်း ထိခိုက်ပျက်စီးခဲ့ရသည့် နေအိမ်များအပြင် ရပ်ကွက်အတွင်းရှိ လူဦးရေစာရင်းနှင့် အိမ်အကြောင်းအရာကို တစ်အိမ်တက်ဆင်း လိုက်လံကောက်ယူနေကြောင်း ဒေသခံများက ပြောသည်။

“ပလောင်စစ်သားက တစ်အိမ်တက် တစ်အိမ်ဆင်း လူစာရင်းလိုက်ကောက်တာ။ ပြောတာတော့ တိုက်ပွဲထဲ အိမ်ထိခိုက်တာ ပြန်လည်ထူထောင်ရေးလုပ်ဖို့ ဆိုပြီးတော့ ကောက်တာ။ တချို့ရပ်ကွက် စစ်သားကောက်ဖို့ အိမ်ထောင်စုစာရင်း လာမေးတယ်လို့ ကြားတော့ ပြည်သူတွေ စိတ်ပူနေကြတာ”ဟု ကျောက်မဲမြို့မှ အသက် (၄၀) အရွယ်ခန့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

လက်ရှိ ကျောက်မဲမြို့တွင် တိုက်ပွဲငြိမ်သက်နေခြင်းကြောင့် ဒေသခံအချို့ နေရပ်ပြန်လာကြသော်လည်း တိုက်ပွဲပြင်းထန်စဉ်က နေအိမ်ထိခိုက်ပျက်စီးခဲ့ခြင်းကြောင့် ဆွေမျိုးအိမ်နှင့် ဘုန်းကြီးကျောင်းတွင် နေထိုင်နေရကြောင်း ဒေသခံများထံမှ သိရသည်။

ကျောက်မဲမြို့ပေါ်နှင့် ကျေးရွာများတွင် TNLA ခန့် အုပ်ချုပ်ရေးမှူးများမှ အုပ်ချုပ်ရေးယန္တရား လည်ပတ်နိုင်ရန်နှင့် ပြန်လည်ထူထောင်ရေး လုပ်ဆောင်ရန်ဟုဆိုကာ လူဦးရေနှင့် အိမ်အကြောင်းအရာများကို လာရောက်မေးမြန်းသွားသော်လည်း လက်ရှိအချိန်ထိ ပျက်စီးဆုံးရှုံးခဲ့ရသည့် နေအိမ်များအတွက် မည်သို့မျှ အကြောင်းပြန်ကြားခြင်း မရှိသေးကြောင်း ဒေသခံများက ပြောဆိုသည်။

“အခုထိတော့ ကူညီဖို့ ဘယ်သူမှ ပြန်မဆက်သွယ်သေးဘူး။ တပ်နဲ့နီးတဲ့ ရပ်ကွက် (၇၊ ၈) တွေက ပိုများတယ် ထိခိုက်တာ။ ဈေးကြီးလည်း ပြန်ဖွင့်တယ်၊ ပစ္စည်းတွေလည်း ဈေးတက်တော့ အိမ်ပြင်ဖို့ ဘာမှကို မဝယ်နိုင်ဘူး။ အဓိက ကားလမ်းပိတ်ထားတာ‌။ အခုက ညသန်းခေါင် လေယာဉ်နဲ့ ဗုံးလာကြဲတာလည်း ကြောက်နေရသေးတယ်”ဟု ကျောက်မဲမြို့ခံတစ်ဦးက သျှမ်းသံတော်ဆင့်ကို ပြောသည်။

ထို့အတူ ဩဂုတ်လ စတုတ္ထပတ်အတွင်းက ကျောက်မဲမြို့ မင်္ဂလာဈေးတွင် ကားလမ်းမပေါ် ဈေးဆိုင်ခင်းပြီး ရောင်းချနေသည့် ပျံကျဈေးသည်များကို TNLA နှင့် PDF တာဝန်ရှိသူများမှ သေနတ်ပစ်ဖောက်ကာ မောင်းထုတ်ခဲ့ကြောင်း ကျောက်မဲဒေသခံများထံမှ သိရသည်။

ပြီးခဲ့သည့် ဩဂုတ်လ (၂၇) ရက်တွင် ကျောက်မဲမြို့ ရပ်ကွက်(၉) တိလင်ရပ်ရှိ အထက-(၂) စာသင်ကျောင်းသို့ စစ်ကောင်စီတပ်မှ ဂျက်ဖိုက်တာဖြင့် ပေါင် (၅၀၀) ဗုံးနှစ်လုံး ကြဲချတိုက်ခိုက်ခဲ့ရာ စာသင်ဆောင်များ ထိခိုက်ပျက်စီးခဲ့ပြီး အနီးရှိ နေအိမ်အတွင်းမှ ဒေသခံ (၁) ဦး သေဆုံးပြီး (၂) ဦးထက်မနည်း ထိခိုက်ဒဏ်ရာ ရရှိခဲ့သည်။

ကျောက်မဲမြို့အခြေစိုက် စစ်ကောင်စီလက်အောက်ခံ စကခ-(၁)၊ ခြေမြန်တပ်ရင်း ခမရ-(၅၀၁၊ ၅၀၂) တို့ကို TNLA နှင့် ကျောက်မဲခရိုင် PDF ပူးပေါင်းတပ်ဖွဲ့တို့က ဩဂုတ်လ (၆) ရက်နေ့တွင် အပြီးသတ် သိမ်းပိုက်နိုင်ခဲ့သည်။

TNLA ပူးပေါင်းတပ်ဖွဲ့၏ ကျောက်မဲမြို့သိမ်း တိုက်ပွဲနှစ်လနီးပါးအတွင်း လက်နက်ကြီး၊ လက်နက်ငယ်နှင့် စစ်ကောင်စီတပ်၏ လေကြောင်းဗုံးကြဲ တိုက်ခိုက်မှုကြောင့် သျှမ်းသံတော်ဆင့် လက်လှမ်းမီသလောက် ကောက်ယူထားသည့် စာရင်းအရ အရပ်သားသေဆုံးမှု (၈၀) ဦးထက်မနည်း ရှိခဲ့ပြီး ပြည်သူနေအိမ် (၃၀၀) ကျော် ပျက်စီးဆုံးရှုံးခဲ့ကြောင်း သိရသည်။