သျှမ်းပြည်အရှေ့ပိုင်း တာချီလိတ်မြို့ရှိ တံတား(၁)တံတားတွင် ရွှေခေါင်းလောင်း ဆရာတော် အမည်ခံ စိုင်းအေးကို စစ်ကောင်စီက ဖမ်းဆီး ခေါ်ဆောင်သွားကြောင်း စုံစမ်းသိရသည်။
ခရစ်ယာန်ဘာသာရေးအစွန်းရောက်သူဟု နာမည်ကြီးနေသည့် ရွှေခေါင်းလောင်းဆရာနော် စိုင်းအေးကို ယမန်နေ့ (စက်တင်ဘာလ ၂ရက်) နေ့တွင် ထိုင်း-မြန်မာနယ်စပ် တာချီလိတ် တံတား (၁)တွင် စရဖ က ဖမ်းဆီးစစ်ဆေးမေးမြန်းပြီး ဖမ်းဆီးခေါ်ဆောင်သွားကြောင်း မြို့နယ်ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
‘’ မနေ့က တံတား(၁)အဝိုင်းဘက်မှာ ကားပေါ်ကနေ ဖမ်းခေါ်လိုက်တယ်။ စစ်ဆေးမေးမြန်းစရာတွေ ရှိတယ်ဆိုပြီး ခေါ်သွားတယ်။ သူက Tiktok နဲ့ လူမှုကွန်းရက်ပေါ်မှာ လူသိများတယ်။ သူပြောလိုက်တဲ့ ဘာသာရေးတွေက အခြားဘာသာရေးတွေနဲ့ ယှဉ်ပြောတာတွေ၊ ရမ်းကားပြောတာတွေကြောင့် ဖမ်းတာ’’ဟု ၎င်းကပြောသည်။
စိုင်းအေးဆိုသူသည် ကချင်ပြည်နယ်၊ ဝဒေသ၊သျှမ်းပြည်နယ်စပ်၊ တရုတ်ဘက်နယ်စပ် တစ်လျှောက်တွင် ဘာသာ သာသနာ ဟောပြောခြင်းတွေ ပြုလုပ်နေသူဖြစ်သည်။
လက်ရှိ ရွှေခေါင်းလောင်းဆရာတော်ကို မည်သည့်အကြောင်းပြချက်ဖြင့် ဖမ်းဆီးခေါ်ဆောင်သွားသည်ကို မသိရှိရသေးပေ။
ထို့အပြင် ၂၀၂၃ ခုနှစ်တွင်လည်း စစ်ကောင်စီစစ်ဌာနက လူကုန်ကူးမှု သံသယရှိသူအနေနှင့် စစ်ဆေးပြုလုပ်ခြင်းရှိခဲ့ပြီး ယခုနှစ်သည်လည်း ထပ်မံ စစ်ဆေးမှုပြုလုပ်နေသည်ဟု သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments