‘ဝ’ပြည်သွေးစည်းညီညွတ်ရေးတပ်မတော် UWSA ၏ တပ်မ(၃၁၈) တပ်မဟာမှူးဖြစ်သူ ပေါက်ရန်လုံ ၏ ဈာပန အခမ်းအနားသို့ ညီနောင်မဟာမိတ်တပ်မှ ခေါင်းဆောင်များ တက်ရောက်ခဲ့ကြောင်း သတင်းသိရသည်။

ယမန်နေ့ (စက်တင်ဘာလ ၁ ရက်)တွင် ‘ဝ’တပ်ဖွဲ့ UWSA ထိန်းချုပ်ဒေသ မိုင်းမောမြို့နယ်ရှိ တပ်မ (၃၁၈) တပ်မဟာမှူးဖြစ်သူ ပေါက်ရန်လုံ၏ နေအိမ်တွင် ပြုလုပ်ခဲ့သည့် ၎င်း၏ ဈာပန အခမ်းအနားသို့ တအာင်း(ပလောင်) အမျိုးသားလွတ်မြောက်ရေးတပ်မတော် TNLA ဉက္က္ဋ္ဌဖြစ်သူ ဒုဗိုလ်ချုပ်ကြီး တားအိုက်ဘုန်းနှင့် အာရက္ခတပ်တော် AA မှ ဒုစစ်ဦးစီးချုပ် ဒေါက်တာ ညိုထွန်းအောင်တို့ တက်ရောက်ခဲ့သည်။

‘ဝ’ပြည်သွေးစည်းညီညွတ်ရေးပါတီ (UWSP/UWSA) မှ ဗဟိုကော်မတီဝင်နှင့် တာဝန်ရှိသူများလည်း ဈာပန အခမ်းအနားသို့ တက်ရောက်ခဲ့ပြီး ဒုတိယ အထွေထွေအတွင်းရေးမှူးနှင့် လက်ရှိ UWSA ဉက္ကဋ္ဌ ပေါက်ယူချန်း၏ သားဖြစ်သူ ပေါက်အိုက်ခမ်း ကိုလည်း ညီနောင်မဟာမိတ် ခေါင်းဆောင်များနှင့်အတူ တွေ့ရသည်။

ထို့အပြင် ပြည်ထောင်စုနိုင်ငံရေး ဆွေးနွေးမှုညှိနှိုင်းရေးကော်မတီ (FPNCC) အဖွဲ့ဝင်များလည်း ၎င်းဈာပနအခမ်းအနားသို့ တက်ရောက်ခဲ့ကြောင်း စစ်ရေးသတင်းရင်းမြစ်ထံမှ သိရသည်။

ဩဂုတ်လ ၂၈ ရက်တွင် ကွယ်လွန်သွားခဲ့သည့် ‘ဝ’တပ်ဖွဲ့၏ တပ်မ (၃၁၈) တပ်မဟာမှူးဖြစ်သူ အသက် (၅၇) နှစ် အရွယ်ရှိ ပေါက်ရန်လုံသည် UWSA ဗဟိုကော်မတီဝင်တစ်ဦး ဖြစ်ကာ ယခင်က တပ်မ (၄၆၈) ဒုတပ်မဟာမှူး၊ ဆောက်လုပ်ရေးနှင့် စိုက်ပျိုးရေး ကဏ္ဍများတွင် တာဝန်ယူခဲ့ဖူးပြီး ဇွန်လတွင် အနားယူခဲ့ကြောင်း UWSA ဘက်မှ ယမန်နေ့ (စက်တင်ဘာလ ၁ ရက်) တွင် ထုတ်ပြန်သည်။

ပြီးခဲ့သည့် ဇူလိုင်လ ၂၇ ရက် ညပိုင်းမှ စတင်ပြီး အရှေ့မြောက်တိုင်း စစ်ဌာနချုပ် ရမခ အခြေစိုက်ရာ လားရှိုးမြို့ရှိ ‘ဝ’ပြင်ပဆက်ဆံရေးရုံးနှင့် ပိုင်ဆိုင်မှုများကို ကာကွယ်ရန်ဟုဆိုကာ ‘ဝ’တပ်ဖွဲ့ UWSA ၏ မိုင်းမောမြို့ဘက်မှလာသည့် တပ်မ (၃၁၈) လုံခြုံရေးတပ်ဖွဲ့ဝင်များသည် လားရှိုးမြို့နယ် မိုင်းကျက်၊ မိုင်းယော်ဘက်မှတဆင့် လားရှိုးမြို့ပေါ်သို့ ဝင်ရောက်တပ်စွဲခဲ့သည်။