သျှမ်းပြည်နယ်တောင်ပိုင်း၊ညောင်ရွှေမြို့နယ် ၊စံကားဒေသ လွယ်လုံရွာနေ အသက်၆၂နှစ်အရွယ် ဉီးမောင်ဆောင်ကို ပအိုဝ်း ပြည်သူ့စစ် (PNO) က ဖမ်းဆီးပြီးနောက် စစ်ကြောရေးတွင် နှိပ်စက်ခံရပြီးသေဆုံးသွားကြောင်း စုံစမ်းသိရသည်။​

PNOက ဦးမောင်ဆောင်ကို PDFနှင့်ပက်သက်သည်ဆိုပြီး ဇူလိူင်လ၂၁ရက်တွင် ရိုက်နှက်ပြီး ဖမ်းဆီးခဲ့ရာ စစ်ကြောရေးတွင်လည်းထပ်မံနှိပ်စက်ခံရသဖြင့် ယခုနှစ်သြဂုတ်လနောက်ဆုံးပတ်တွင် သေဆုံးသွားပြီဖြစ်ကြောင်းမိသားစုကိုအကြောင်းကြာလာကြောင်း သိရသည်။

“ဖမ်းတဲ့အချိန်၇ယောက်ဖမ်းတယ် ဖမ်းပြီးတစ်ပတ်အကြာမှာ ၆​ယောက်က ပြန်လွှတ်တယ်။ဉီးဆောင်က ပြန်မလွှတ်ဘူး။ဖမ်းတဲ့အချိန်ဆိုလည်းPNOက သူတို့ဂိတ် တိုက်ခိုက်ခံရပြီး ရွာထဲဝင်လာတယ် ပြီးမှ ဘားမှမဟုတ်ဘဲ ရွာထဲ ခြံထဲ တွေ့တဲ့ရွာသားကိုဖမ်းသွားတယ်”ဟု ရွာခံတစ်ဉီးကသျှမ်းသံတောင်ဆင့်ကိုပြောသည်။

ဖမ်းသွားသောရွာသားများကို PNOက ဆိုက်ခေါင်သို့ ခေါ်သွားပြီး ​​၄ရက်အတွင်းထမင်းမကျွေး ရေမတိုက်ဘဲ ထားကြောင်း သိရသည်။

“ဆိုက်ခေါင်မှာ၄ရက်လုံး ထမင်း၃နပ်ပဲ ကျွေးတယ်။ ၄ရက်လုံး ရိုက်နှက်တယ်။စစ်ဆေးတယ်။သာမာန်ရွာသားတွေလေ သူတို့ကဘာအကြောင်းပြချက်မှမရှိဘဲ ဖမ်းသွားတာ။ ပြန်လွှတ်လာတဲ့၆ယောက်ဆို ငွေသိန်း၂၀နဲ့ ပြန်သွားရွေးရတယ်။ရွာနားက သူတို့ဂိတ်တိုက်ခိုက်ခံရတိုင်း ရွာသားကို အရမ်းယုတ်မာတယ်”ဟု ၄င်းကဆက်ပြောသည်။

ရွာသားများကို ဖမ်းဆီးသွားသည့် အချိန်လည်း ရွာသားဆိုင်ကယ်၂၈စီးကိုပါသိမ်းဆည်းသွားပြီး ၂၂စီးကိုပြန်ပေးသော်လည်း ကျန်တန်ဖိုးကြီးသည့် ၆စီးကို ယခုထိ ပြန်မပေးသေးကြောင်း သိရသည်။

ပြီးခဲ့သည့် ဇူလိူင်လ၂၇ရက်တွင် လွယ်လုံရွာအနီး PNOဂိတ်စခန်းကို တော်လှန်ရေးအဖွဲ့က လာရောက်တိုက်ခိုက်ခဲ့ပြီး PNOဘက်၅ဦး ထက်မနည်း သေဆုံးခဲ့သေးကြောင်း သိရသည်