သျှမ်းပြည် မိုင်းတုံမြို့အပါအဝင် ဒေသတချို့တွင် အတင်းအကျပ်ရပ်ရွာလုံခြုံရေး ကင်းစောင့်ရန်အတွက် စစ်ကောင်စီ၏ လက်အောက်ခံ အုပ်ချုပ်ရေးမှူးများက လူစာရင်းစတင်ကောက်ခံနေကြောင်း စုံစမ်းသိရသည်။
ယမန်နေ့ စက်တင်ဘာလ ၁ ရက်စပြီး မိုင်းတုံမြို့တွင် သက်ကြီးရွယ်အိုအပါအဝင် အသက် ၃၅ နှစ်နှင့်အထက်မှ အမျိုးသားများကို ရပ်ရွာလုံခြုံရေး ကင်းစောင့်ဖို့အတွက် ရပ်ကွက်၊ ကျေးရွာ အုပ်ချုပ်ရေးမှူးများကို အစည်းအဝေးခေါ်ပြီး ပြောဆိုခဲ့ကြောင်း မိုင်းတုံမြို့ဒေသခံတစ်ဦးက ပြောသည်။
“အခုက သက်ကြီးရွယ်အိုတွေကိုပါ ကင်းစောင့်ဖို့ခေါ်နေတယ်။ ရွာအလိုက်၊ ရပ်ကွက်အလိုက် စားရင်းတွေကောက်နေပြီ။ နားကောင်းမူးကျေးရွာ အုပ်စုထဲမှာ လူအယောက် ၉၀ စာရင်းပါတယ်လို့ ပြောတယ်။ မိုင်းတုံမြို့နယ် တစ်နယ်လုံးဆိုရင်တော့ အယောက် ၃၀၀ ကျော်ပါတယ်။ အစည်းအဝေးသွားတက်တဲ့ အုပ်ချုပ်ရေးမှူးတွေ ပြောသံအရ ကင်းစောင့်ခိုင်းမယ်၊ သေနတ်တော့ ပေးမကိုင်ဘူးလို့ပြောတယ်” ဟု မိုင်းတုံမြို့ ဒေသခံတစ်ဦးက ပြောသည်။
ထို့အပြင် အသက် ၂၅ နှစ်မကျော်သေးသော်လည်း ပြည်သူ့စစ်မှုထမ်း ဥပဒေအရ စစ်မှုထမ်းရန် ဆေးမအောင်သူများ၊ စစ်မှုထမ်းရန် ဆိုင်ငံ့ထားသူများကိုလည်း အလှည့်ကျတင်းစောင့်ရန် ဆင့်ခေါ်မည်ဟု သိရှိရသည်။
လက်ရှိတွင် ကင်းစောင့်ဖို့အတွက် လူကိုယ်တိုင် မသွားရသေးသော်လည်း သွားရဖို့ မှတ်ပုံတင်နှင့် လူနာမည်စာရင်းကို ကောက်ခံနေခြင်း ဖြစ်ကြောင်း ဒေသခံများကပြောသည်။
ပြီးခဲ့သည့် သြဂုတ် ၁၆ ရက်က “ပြည်သူ့လုံခြုံရေးနှင့် အကြမ်းဖက်နှိမ်နှင်းရေး ဗဟိုကြီးကြပ်မှုအဖွဲ့” ဟုဆိုကာ စစ်ကောင်စီ ဖွဲ့စည်းလိုက်ပြီးနောက် လမ်းအလိုက်၊ ရပ်ကွက်အလိုက်၊ ကျေးရွာအလိုက် လုံခြုံရေး တည်ဆောက်ရမည်ဟု စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပြောဆိုထားသည်။
သို့သော် ပြည်သူများကမှု စစ်ကောင်စီ ဖွဲ့စည်းလိုက်သည့် “ပြည်သူ့လုံခြုံရေးစနစ်” ကို မလိုလားကြပေ။
အင်အားလျော့ပါးနေသည့် စစ်ကောင်စီတပ်အတွက် စစ်ထွက်တိုက်ပေးရမည်ကို စိုးရိမ်နေသည်ဟု မိုင်းတုံမြို့ဒေသခံ အသက် ၃၀ ကျော် အမျိုးသားတစ်ဦးက ပြောသည်။
“အဓိကတော့ စစ်ထဲပါရမှာကို၊ စစ်ထွက်ရမှာကိုဘဲ ကြောက်နေတာ။ အခုလည်းတိုက်ပွဲက ဖြစ်နေသေးတယ်လေ။ သူတို့က လုပ်ရွာလုံခြုံရေးယူရမယ်လို့သာ ပြောတာ၊ တကယ့်တကယ် အရေးနဲ့အကြောင်း ကြုံလာရင် လာမခေါ်နိုင်ဘူးလို့ မပြောတတ်ဘူး။ အခုက သူတို့ပြောပြောနေတဲ့ ပြည်သူ့လုံခြုံးရေးဆိုတာတော့ မယုံဘူးဗျာ” ဟု ၎င်းကပြောသည်။
အလားတူ ဖေဖော်ဝါရီလအတွင်းက ပြည်သူ့စစ်မှု မထမ်းမနေရ ဥပဒေကို စစ်ကောင်စီက အသက်သွင်းပြီးနောက် အသက် ၁၈ နှစ်မှ ၂၃ နှစ်အတွင်း အမျိုးသားများကို စစ်ကောင်စီက ဆင့်ခေါ်ခဲ့ရာ အများစုသည် စစ်မှုမထမ်းလိုသောကြောင့် ပြည်ပနိုင်ငံခြားသို့ ထွက်ပြေးတိမ်းရှောင်ခဲ့ရသည်။
ဧပြီလ ၁၂ ရက်တွင်လည်း “အရန်တပ်ဖွဲ့ဝင်များအတွက် စစ်မှုထမ်းစည်းမျဉ်း ထုတ်ပြန်ခြင်း” ဟု စစ်ကောင်စီအမည်ပေးထားသည့် အစီအစဉ်တွင် အကြောင်းမျိုးမျိုးဖြင့် ပင်စင်ယူထားသည့် စစ်မှုထမ်းဟောင်းများ အနည်းဆုံး ၃ နှစ် ထပ်မံစစ်မှုထမ်းရမည်ဟု စစ်ကောင်စီက ထုတ်ပြန်ထားသည်။
Leave a Comments