သျှမ်းပြည်မြောက်ပိုင်း နမ့်လန်မြို့အတွင်း ကောင်းလန်းရပ်ကွက်တွင် တောင်ကျရေများ ရုတ်တရက် ကျလာသဖြင့် မြေနိမ့်ရပ်ကွက် အချို့ ရေလျှံ ၊ ရေမြှုပ် ရှိနေသည်ဟု စုံစမ်းသိရသည်။
(စက်တင်ဘာလ ၁ရက်) နေ့လည် ၁၂ နာရီတွင် တောင်ကျရေ ရုတ်တစ်ရက်စတင်တက်လာပြီး ပြည်သူများကြိုတင်ပြင်ဆင်မှု မရှိသည့်အတွက် နေအိမ်ပစ္စည်းများ ရေထဲမျှောပါသွားကြောင်း နမ့်လန်ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
‘’ မနေ့က ၁၂ နာရီမှာ ရေက ရုတ်တရက်တက်လာတော့ ပစ္စည်းတွေ ကြိုမသိမ်းလိုက်ရဘူး။ တစ်ချို့လည်း ရေထဲပါသွားတယ် ။ ဒီနေ့တော့ ရေတဝက်ကျသွားပြီ။ ကောင်းလန်းရပ်ကွက်က မြေနိမ့်ပိုင်းဖြစ်တော့ နေအိမ်တော်တော်များများပါသွားတယ် ‘’ ဟု ၎င်းက ပြောသည်။
ယခုတောင်ကျရေ ရုတ်တရက်ကျမှုသည် ယခင်နှစ်ထက် ပိုပြီးရေကြီးရေလျှံမှုများဖြစ်ပွားခဲ့ပြီး၊ ရေထပ်မံပြန်တက်လာမည်ကို စိုးရိမ်နေကြောင်း သိရသည်။
လက်ရှိ တိုက်ပွဲများ ငြိမ်သက်မှု မရှိသေးသည့်အပြင် ရေဘေးထပ်မံကြုံတွေ့ရသည်ကို ပြည်သူအတွက် အလွန်ခက်ခဲနေသည်ဟု မြို့နယ်ဒေသခံ အမျိုးသမီးတစ်ဦးက ပြောသည်။
‘’ အရင်နှစ်ကလည်း ရေကြီးတယ်။ ခုက ရေကျတယ်ဆိုပေမဲ့ ပြန်တက်လာမှာကို စိုးရိမ်ရတာပေါ့ ။ တိုက်ပွဲကမငြိမ်သေးဘူး။ ရေဘေးထပ်ကြုံနေရတော့ တကယ်ကို ဒုက္ခရောက်တယ် ‘’ ဟု ၎င်းကပြောသည်။
ထို့အပြင် ယနေ့ (စက်တင်ဘာလ ၂ ရက်) နေ့လည် ၁၀နာရီဝန်းကျင်တွင်လည်း စစ်ကောင်စီဘက် ပစ်ခတ်မှုကြောင့် မြို့အနီးရှိ ပြောင်းခြံထဲ ဗုံးတစ်လုံးကျကာ လူထိခိုက်မှုမရှိကြောင်း သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments