သျှမ်းမြောက်၊ လားရှိုးမြို့ကို ယနေ့ (ဩဂုတ်လ ၃၀ ရက်) ည ၈ နာရီ ၄၅ မိနစ်ခန့်က စစ်ကောင်စီ လေကြောင်းက ဗုံးကြဲ တိုက်ခိုက်ခဲ့ကြောင်း မြို့ခံများက ပြောသည်။
ကိုးကန့်တပ် MNDAA အုပ်ချုပ်ရေး စတင်နေသည့် လားရှိုးမြို့ကို တိုက်ပွဲ ဖြစ်ပွားခြင်းမရှိဘဲ လူနေရပ်ကွက်များပေါ် ဗုံး ၂ လုံးကြဲချ တိုက်ခိုက်ခဲ့ကြောင်း ဆိုသည်။
“ရပ်ကွက် ၁၀ ဘက်ကျတယ်လည်း ကြားတယ်။ ၆၂၆ ဂိုဒေါင်နဲ့ ရပ်ကွက်ရုံး ထိတယ်လည်း ကြားတယ်။ သေချာတော့ မသိသေးဘူး” ဟု မြို့ခံ တစ်ဦးက ပြောသည်။
ယခု ဗုံးကြဲ တိုက်ခိုက်မှုကြောင့် ထိခိုက်မှု အသေးစိတ် အခြေအနေကို ထပ်မံ စုံစမ်း မေးမြန်းနေဆဲ ဖြစ်သည်။
ဗုံးထပ်မံ ကြဲချမည်ကို စိုးရိမ်နေကြကြောင်း မြို့ခံများ ပြောဆိုသည်။
ကိုးကန့်တပ် သိမ်းပိုက်ထားသည့် လားရှိုးမြို့တွင်းသို့ ပြည်သူများ နေ့စဥ်နှင့်အမျှ ပြန်လည်ဝင်ရောက် နေထိုင်စဥ် ယခုကဲ့သို့ စစ်ကောင်စီက အရပ်သားများကို ပစ်မှတ်ထား ဗုံးကြဲ တိုက်ခိုက်ခဲ့ခြင်း ဖြစ်သည်။
Leave a Comments