လျှပ်စစ်မီးပုံမှန်လာခြင်း မရှိသည့်ကြားမှ မီတာခများကို နှစ်ဆ ခန့်ပိုမိုကောက်ခံသွားမည်ဟု စစ်ကောင်စီ၏ လျှပ်စစ်နှင့်စွမ်းအင်ဝန်ကြီးဌာနက ယနေ့ (ဩဂုတ်လ ၃၀) ရက်တွင် သတင်းထုတ်ပြန်လာသည်။

လာမည့် စက်တင်ဘာလ ၁ ရက်တွင် စစ်ကောင်စီ၏ လျှပ်စစ်ဝန်ကြီးဌာနမှ လျှပ်စစ်ဓာတ်အား ပိုမိုဖြန့်ဖြူးပေးနိုင်ရန်ဟု ဆိုသောအကြောင်းပြချက်ဖြင့် မီတာခများကို ၂ ဆခန့်ပိုမိုကောက်ခံသွားမည့်အကြောင်း စစ်ကောင်စီ၏ ယနေ့ထုတ် သတင်းစာများတွင် ကြေညာသည်။

လက်ရှိမြန်မာနိုင်ငံအတွင်း ကုန်ဈေးနှုန်းကြီးမြင့်မှု၊ စက်သုံးဆီဈေးမြင့်မှုများကြောင့် ပြည်သူလူထုများ ပို၍ကြပ်နေလာနေချိန် မီတာခများပါ ထပ်မံတိုးမြင့်ကောက်ခံခြင်းသည် ရေနစ်သူကို ဝါးကူထိုးသကဲ့သို့ဖြစ်နေကြောင်း တောင်ကြီးမြို့တွင် ခေါက်ဆွဲဆိုင်ဖွင့်ထားသော အမျိုးသမီးတစ်ဦးကပြောသည်။

“ကျမတို့က ဒီအခွန်အခတွေပေးနေရတာနဲ့ ဘာမှမကျန်တော့ပါဘူး၊ မီးကလည်း မမှန် ကိုဗစ်ပြီးတည်းက စီးပွားရေးကကျနေတာ မနည်းတောင့်ခံထားရတာ ခုကုန်ဈေးနှုန်းနဲ့တွက်ကြည့်ရင် အမြတ်တောင်မပြောနဲ့ အရင်းကျန်ရင်တောင် ကံကောင်းတယ်လို့ ပြောရမှာ” ဟု ၎င်းအမျိုးသမီးက ပြောသည်။

ယခင်က ချက်ပြုတ်ရာတွင် ဂတ်စ်မီးဖိုများဖြင့်သုံးနိုင်သော်လည်း လက်ရှိအချိန်တွင် ဂတ်စ်ဈေးနှုန်းများလည်းမြင့်တက်သွားသောကြောင့် ထင်း၊ မီးသွေးဖြင့်သာသုံးနေရကြောင်း ယခုကဲ့သို့ မီတာခများပို၍တက်လာခြင်းကြောင့် ပို၍အခက်တွေ့နိုင်ကြောင်း သူမကဆက်ပြောသည်။

မီတာခများတိုးလာခြင်း စက်သုံးဆီဈေးမြင့်လာခြင်း ကုန်ကြမ်းပစ္စည်းများ ဈေးတက်လာခြင်းတို့ကြောင့် လက်ရှိလုပ်ကိုင်နေသည့် အလုပ်ကိုပါ ရပ်နားရန်စဉ်းစားနေရကြောင်း ရေခဲစက်လုပ်ငန်းလုပ်ကိုင်နေသည့် လုပ်ငန်းရှင်တစ်ဦးက ပြောသည်။

“တစ်လတစ်ခါ ချေးထားတဲ့‌ငွေကို အတိုးကြီးကြီးနဲ့ ပေးနေရသလိုပဲ ပေးရလို့ မီးမှန်နေတယ်ဆိုရင်လည်း တမျိုးပေါ့လေ၊ ခုကဈေးကလည်းတက်အုံးမယ်ဆိုတော့ ပေးသာပေးနေရတာ အလှူလိုပဲ၊ ပြန်ရလိုစိတ်မထားပဲပေးနေရမလိုဖြစ်နေပြီ” ဟု ၎င်းကပြောသည်။

လက်ရှိအချိန်တွင် ပြည်သူများသည် ကုန်ဈေးနှုန်းကြီးမြင့်ခြင်းများအပါအဝင် စစ်ကောင်စီမှ အတင်းအဓ္ဓမ ကောက်ယူနေသော အခွန်အခများကိုပါ ထည့်သွင်းပေးဆောင်နေကြရသော်လည်း အခွန်အခမှရရှိသော ငွေကြေးများကို ပြည်သူအကျိုးအတွက် ပြန်လည်အသုံးချနိုင်ခြင်းမရှိပေ။

တိုင်းရင်းသားလက်နက်ကိုင်များနှင့် စစ်အာဏာသိမ်းခြင်းကို ဆန့်ကျင်သည့်ပြည်သူများကို ချေမှုန်းရန်သာ အာရုံစိုက်နေသော‌ စစ်ကောင်စီကြောင့် မြန်မာနိုင်ငံသည် အဖက်ဖက်မှယိုယွင်းလာနေပြီး တိုင်းပြည်စီးပွားရေးမှာလည်း ကျဆင်းလာသည့်အတွက် ပြည်တွင်းစီးပွားရေး လုပ်ငန်းရှင်များသည် မသေချာတော့သည့် ပြည်တွင်းဈေးကွက်ကိုစွန့်ခွာကာ အနီးဆုံး ထိုင်းနိုင်ငံသို့ ပြောင်းရွှေ့အခြေချလာသည်ကိုလည်း တွေ့မြင်နေရသည်။

အလုပ်သင် သတင်းထောက် ယူဂျင်း ရေးသားသည်။