စစ်ကောင်စီတပ် ဗိုလ်မှူးချုပ် တစ်ဦး၏ နေအိမ်မှ သိန်းထောင်ချီ တန်ဖိုးရှိသည့် တန်ဖိုးကြီး အရက်နှင့် ဝိုင် ပုလင်းပေါင်းများစွာကို တော်လှန်ရေးတပ်များ သိမ်းဆည်းရမိခဲ့သည်။

လူမှုကွန်ရက်တွင် ပြန့်နှံ့နေသည့် ရုပ်သံတွင် သိန်း ၈၀ ဟု တန်ဖိုးရေးသားထားသည့် အရက်ပုလင်း အပါအဝင် ဝိုင်ပုလင်းများအား တော်လှန်ရေးတပ်သားများ ဖွင့်ဖောက်စစ်ဆေးနေသည်ကို တွေ့ရသည်။

အဆိုပါ နေအိမ်သည် စခက (၁၆) တပ်မှူး ဗိုလ်မှူးချုပ်သော်ဇင် ၏ နေအိမ်ဖြစ်သည်ဟု တော်လှန်ရေးတပ်နှင့် နီးစပ်သူ တစ်ဦးက အတည်ပြုသော်လည်း အသေးစိတ် ပြောဆိုခြင်း မရှိပေ။

သိန္နီအခြေစိုက် စကခ (၁၆) တပ်မှူး ဗိုလ်မှူးချုပ်သော်ဇင် အပါအဝင် စကခနှင့် ဒကစမှူးများ ဦးဆောင်သည့် အင်အား ၄၀၀၀ ကျော် လောက်ကိုင်၌ ယခုနှစ် ဇန်နဝါရီ ၄ ရက်နေ့က ကိုးကန့်တပ် MNDAA ထံ လက်နက်ချခဲ့သည်။

သို့ဖြစ်ရာ ယခုထွက်ပေါ်လာသည့် ရုပ်သံသည် ၁၀၂၇ စစ်ဆင်ရေး ပထမပိုင်း ကာလက ရိုက်ကူးထားသည့် ရုပ်သံဟု ယူဆရသော်လည်း နေအိမ် တည်နေရာသည် သိန္နီ (သို့မဟုတ်) လောက်ကိုင် မည်သည့် နေရာ ဆိုသည်ကို ရှင်းရှင်းလင်းလင်း မသိရသေးပေ။

“စစ်ခွေးလေးတွေ မင်းတို့က ရှေ့တန်းမှာသေ ကြေပျက်စီးနေရတယ်။ မင်းတို့ အဘတွေ စစ်ခေါင်းဆောင်တွေက အကောင်းစားဝိုင်တွေ၊ တန်ဖိုးကြီးအရက်တွေနဲ့ တကယ့်ကို အခွင့်ထူးခံဖြစ်နေတာ” ဟု တော်လှန်ရေးတပ်သား တဦးက ပြောဆိုနေသည်ကို ရုပ်သံမှတ်တမ်းတွင် တွေ့ရသည်။

ဗိုလ်မှူးချုပ် သော်ဇင်သည် လောက်ကိုင် လက်နက်ချမှုဖြင့် စစ်ခုံးရုံးက ထောင်ဒဏ် နှစ် ၂၀ ချမှတ်ခံထားရသူ ဖြစ်သည်။