စစ်ခေါင်းဆောင် မင်းအောင်လှိုင် ဦးဆောင်သည့် စစ်ကောင်စီတွင် ပါဝင်သော အရပ်သား ကောင်စီဝင်များ၊ ပြည်ထောင်စု ဝန်ကြီးများနှင့် ဒုဝန်ကြီးများအား ပြင်ပ နေအိမ်များတွင် နေထိုင်ခွင့် မပြုတော့သဖြင့် ဝန်ကြီး အိမ်ယာတွင်သာ အကျယ်ချုပ်ကဲ့သို့ နေထိုင်နေရသည်ဟု နေပြည်တော် သတင်းရင်းမြစ်က ယနေ့ (သြဂုတ်လ ၂၉ ရက်) တွင် ပြောသည်။

အထွေထွေ ရှုံးနိမ့်မှုများ ကြုံတွေ့နေရသဖြင့် စစ်တပ် ထိပ်ပိုင်း အသိုင်းအဝိုင်း၏ ဝေဖန်မှုများ ရင်ဆိုင်နေရသည့် စစ်ခေါင်းဆောင်က တန်ပြန် အာဏာသိမ်းမှု သတင်းများ ထွက်ပေါ်ခဲ့သည့် ယခုလ အစပိုင်း ကတည်းက သတ်မှတ်ထားသည့် အိမ်များတွင်သာ နေထိုင်ရန်နှင့် ခရီးစဉ် ကြိုတင် သတင်းပို့ ခွင့်ပြုချက်ရယူရန် ညွှန်ကြားခဲ့ခြင်း ဖြစ်ကြောင်း သတင်းရင်းမြစ်က ဆိုသည်။

“အရပ်သား စစ်ကောင်စီဝင်တွေ၊ ပြည်ထောင်စုဝန်ကြီး ဒုဝန်ကြီးတွေ သတ်မှတ်အိမ်ယာမှာပဲ နေဖို့၊ ခရီးစဥ်တွေ တပတ် ကြိုတင်ပြီး ခွင့်ပြုချက်ရယူဖို့၊ နေပြည်တော်ထဲ သွားလာရင် လုံခြုံရေးနဲ့ သွားလာဖို့၊ ကိုယ်ရေးကိုယ်တာ ကိစ္စနဲ့ နေပြည်တော်ပြင်ပ သွားလာဖို့ရှိရင်လည်းပဲ ခွင့်ပြုချက်ရယူဖို့၊ ဧည့်မှတ်တမ်း အသေးစိတ်ပြုစုထားဖို့ အဲဒါတွေ လုံခြုံရေးအတွက် ညွှန်ကြားထားတာပါ” ဟု ၎င်းက ရှင်းပြသည်။

ပြီးခဲ့သည့် ဇူလိုင်လ အတွင်းက နေပြည်တော် စစ်အာဏာ အသိုင်းအဝိုင်းအတွင်း သဘောထား ကွဲလွဲမှုများ ပေါ်ပေါက်ခဲ့ပြီးနောက် တန်ပြန်အာဏာသိမ်းမည် ဆိုသည့် သတင်းများ ကျယ်ကျယ်ပြန့်ပြန့် ထွက်ပေါ်နေစဥ် အထက်ပါ ညွှန်ကြားချက် ထွက်ပေါ်လာခြင်း ဖြစ်သည်။

နိုင်ငံတဝှမ်း စစ်ရှုံးမှုကြောင့် နေပြည်တော် စစ်ဗိုလ်ချုပ် အသိုင်းအဝိုင်းကြား စစ်ခေါင်းဆောင် မင်းအောင်လှိုင် အပေါ် မကျေနပ်မှုများ ကြီးထွားလာပြီး မညီညွတ်မှုများ ဖြစ်ပေါ်နေသဖြင့် အာဏာရှင်ဟောင်း ဦးသန်းရွှေ ဝင်ရောက် ညှိနှိုင်းထိန်းသိမ်းခဲ့ရသည် ဆိုသည့် သတင်းများလည်း ထွက်ပေါ်နေသည်။