သျှမ်းပြည် ကျောက်မဲမြို့တွင် စစ်ကောင်စီတပ်က အထက(၂) စာသင်ကျောင်းထဲသို့ လေကြောင်းဖြင့် ထပ်မံဗုံးကြဲ တိုက်ခိုက်ခဲ့ခြင်းကြောင့် စာသင်ဆောင်များ ထိခိုက်ပျက်စီးခဲ့ကြောင်း စုံစမ်းသိရသည်။
ယမန်နေ့ (ဩဂုတ်လ ၂၇ ရက်) ည ၁၁ နာရီကျော်တွင် ကျောက်မဲမြို့နယ်အတွင်း တိုက်ပွဲဖြစ်ပွားခြင်း မရှိဘဲ ရပ်ကွက် (၉) တိလင်ရပ်ရှိ အထက-(၂) စာသင်ကျောင်းသို့ စစ်ကောင်စီတပ်မှ ဂျက်ဖိုက်တာဖြင့် နှစ်ကြိမ် ဗုံးကြဲတိုက်ခိုက်ခဲ့ရာ ဘော်လုံးကွင်းအတွင်း ကျရောက်ပေါက်ကွဲပြီး စာသင်ဆောင်များ ထိခိုက်ပျက်စီးခဲ့ကြောင်း ကျောက်မဲဒေသခံများက ပြောသည်။
“မနေ့ည ၁၁ နာရီကျော်မှာ တိလင်ထဲကို လေယာဉ်နဲ့ နှစ်ခါ ဗုံးလာကြဲတာ။ ဂျက်ဖိုက်တာနဲ့ နှစ်ခါကြဲတာ၊ တစ်ခါကို ဗုံးနှစ်လုံးကျတယ်။ ဘော်လုံးကွင်းထဲ ကျတာဆိုတော့ လူထိခိုက်တာတော့ မသိသေးဘူး။ မြောက်ဘက်က စာသင်ဆောင်တွေလည်း ထိတယ်။ မြို့ခံတွေကတော့ ကြောက်လို့ တစ်ညလုံး မအိပ်ရဲတော့ဘူး”ဟု ကျောက်မဲမြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်က ယခုလာရောက်ဗုံးကြဲခဲ့သည့် ကျောက်မဲမြို့ အထက-(၂) စာသင်ကျောင်းသည် စည်ပင်သာယာရေးရုံးအနီး တည်ရှိသောကြောင့် ၎င်းစည်ပင်ရုံးကို လာရောက်ဗုံးကြဲခြင်းလည်း ဖြစ်နိုင်ကြောင်း ဒေသခံများက ပြောဆိုသည်။
ထို့အတူ ဩဂုတ်လ စတုတ္ထပတ်အတွင်းက ကျောက်မဲမြို့ မင်္ဂလာဈေးတွင် ကားလမ်းမပေါ် ဈေးဆိုင်ခင်းပြီး ရောင်းချနေသည့် ပျံကျဈေးသည်များကို TNLA နှင့် PDF တာဝန်ရှိသူများမှ သေနတ်ပစ်ဖောက်ကာ မောင်းထုတ်ခဲ့ကြောင်း ကျောက်မဲဒေသခံများထံမှ သိရသည်။
“ရှေ့ရက်က လမ်းပေါ်မှာ ဈေးခင်းတဲ့လူတွေကို သေနတ်ဖောက်ပြီး မောင်းထုတ်တာ၊ TNLA နဲ့ PDF က စည်ပင်ကော ရဲကော ရှိနေတဲ့ ဈေးမှာလေ။ သေနတ်သံကြားတော့ ဈေးဝယ်တွေ လန့်ပြီး ရုတ်ရုတ်သဲသဲ ဖြစ်ကြတာပေါ့”ဟု ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ကျောက်မဲမြို့အခြေစိုက် စစ်ကောင်စီလက်အောက်ခံ စကခ-(၁)၊ ခြေမြန်တပ်ရင်း ခမရ-(၅၀၁၊ ၅၀၂) တို့ကို TNLA နှင့် ကျောက်မဲခရိုင် PDF ပူးပေါင်းတပ်ဖွဲ့တို့က ဩဂုတ်လ (၆) ရက်နေ့တွင် အပြီးသတ် သိမ်းပိုက်နိုင်ခဲ့သည်။
၎င်းနောက် ကျောက်မဲမြို့ပေါ်တွင် တိုက်ပွဲများ ငြိမ်သက်နေခြင်းကြောင့် ဩဂုတ်လ တတိယပတ်မှ စတင်၍ စစ်ဘေးရှောင်အချို့ နေရပ်ပြန်နေကြပြီး ယနေ့ (ဩဂုတ်လ ၂၈ ရက်) နံနက်ပိုင်းမှ စတင်၍ ဗဟိုဈေးကြီးကို ပြန်လည်ဖွင့်လှစ်နေကြောင်း ဒေသခံများက ပြောဆိုသည်။
ပြီးခဲ့သည့် ဩဂုတ်လ ၁၇ ရက်ကလည်း ကျောက်မဲမြို့နယ်အတွင်း တိုက်ပွဲဖြစ်ပွားခြင်း မရှိဘဲ ဟူးကွက်ကျေးရွာ ဘုန်းကြီးကျောင်းသို့ စစ်ကောင်စီတပ်မှ လေကြောင်းဖြင့် (၂) ကြိမ် ဗုံးကြဲတိုက်ခိုက်ခဲ့ရာ ဇရပ်နှင့် ဆွမ်းစားကျောင်းဆောင် (၂) ဆောင် ထိခိုက်ပျက်စီး၍ ကိုရင်တစ်ပါး ဒဏ်ရာရရှိခဲ့ကြောင်း သိရသည်။
Leave a Comments