မြန်မာနိုင်ငံအနှံ့ဖြစ်ပွားနေသည့် တိုက်ပွဲများတွင် ရှုံးနိမ့်မှုများနှင့် နယ်မြေဆုံးရှုံးမှုကို ရင်ဆိုင်နေရသည့် စစ်ကောင်စီသည် ပြည်သူ့လုံခြုံရေးနှင့် ပတ်သက်၍ လမ်းအလိုက်၊ ရပ်ကွက်အလိုက်၊ ကျေးရွာအလိုက် လုံခြုံရေးသတိဖြင့် ဆောင်ရွက်ရန်လိုကြောင်း စစ်ခေါင်းဆောင်က ပြောဆိုလိုက်သည်။

ယမန်နေ့ (သြဂုတ် ၂၅) ရက်က မန္တလေးမြို့ မြို့တော်ခန်းမ၌ မန္တလေးတိုင်း အစိုးရ အဖွဲ့ဝင်၊ တိုင်းအဆင့် ဌာနဆိုင်များနှင့် တွေ့ဆုံခဲ့ရာတွင် ထိုသို့ထည့်သွင်းပြောဆိုခဲ့ခြင်း ဖြစ်သည်။

ဒေသအလိုက် လူတစ်ဦးတစ်ယောက်ချင်းစီမှ လုံခြုံရေးအသိစိတ်ဓာတ်ရှိရှိဖြင့် ဆောင်ရွက်ကြရန်လိုကြောင်း၊ ပြည်သူ့လုံခြုံရေး People Security၊ Public Security နှင့် ပတ်သက်၍ လမ်းအလိုက်၊ ရပ်ကွက်အလိုက်၊ ကျေးရွာအလိုက် လုံခြုံရေးအသိ၊ လုံခြုံရေးသတိဖြင့် ဆောင်ရွက်ရန်လိုကြောင်း ဆိုသည်။

“စစ်သားတွေလည်း ပြုန်းတီးနေပြီဆိုတော့ ကြံရာမရတဲ့ အာဏာရှင်ခေါင်းဆောင်တွေရဲ့ ကိုယ်ကျိုးကာကွယ်ဖို့ အပစ်မဲ့ပြည်သူတွေကို အာဏာနဲ့ဖိနှိပ်တဲ့ နည်းလမ်းပါ။ သူတို့မကျရှုံးမချင်း ဒီလိုသမာနည်းတွေ ဖက်ဆစ်စစ်တပ်ရဲ့ ထုံးနှလုံးမှုသည့် ရက်စက်မှုအပေါင်း သရဖူဆောင်းတဲ့ နည်းလမ်းတွေ ဆက်အသုံးပြုသွားမယ်လို့ မြင်တယ်”ဟု သျှမ်းမြောက် ပြည်သူတစ်ဦးက ပြောသည်။

ထို့အပြင် မိမိနေထိုင်သည့်ဒေသ ရပ်ကွက်၊ ကျေးရွာများအလိုက်၊ လမ်းများအလိုက် လုံခြုံရေး စနစ်များ တည်ဆောက်၍ ဆောင်ရွက်မည်ဆိုပါက နယ်မြေဒေသလုံခြုံရေးအတွက် များစွာအကျိုးရှိ ထိရောက်စေမည်ဟု စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကပြောသည်။

လက်ရှိ မန္တလေးမြို့ အနီးတဝိုက်မြို့များတွင် တိုက်ပွဲများ ဖြစ်ပွားနေလျက်ရှိပြီး မန္တလေးမြို့အထိကို တော်လှန်ရေးအင်အားစုများက ဝင်ရောက်တိုက်ခိုက်မည်ဆိုသည့် သတင်းများကြောင့် မြို့ခံတချို့လည်း ထွက်ပြေးတိမ်းရှောင်နေရကြောင်း သိရသည်။