မြန်မာနိုင်ငံဒေသအချို့တွင် အမျိုးသမီး စစ်မှုထမ်းစာရင်းများကို စတင် ကောက်ယူနေကြောင်း သတင်းများထွက်လာပြီးနောက် သျှမ်းပြည်အတွင်း လူငယ်အမျိုးသမီးများနှင့် မိဘများအကြား စိုးရိမ်ပူပန်မှုများစွာဖြစ်‌ပေါ်လာကြောင်း သိရသည်။

ဩဂုတ်လအတွင်း အမျိုးသမီးများကိုပါ စစ်မှုထမ်းစာရင်းကောက်ယူနေသည့်အတွက် CDM ဝန်ထမ်းဖြစ်သောကြောင့် ပို၍စိုးရိမ်နေရကြောင်း တောင်ကြီးမြို့တွင်နေထိုင်သည့် အသက် ၂၅ နှစ်အရွယ် CDM ကျောင်းဆရာမတစ်ဦးက သျှမ်းသံတော်ဆင့်ကို ပြောသည်။

“ ဒီ ၃ နှစ်မှာ တော်တော်လေး စုတ်ပြတ်သွားတာပါ၊ အလုပ်ကိုလည်း CDM လုပ်ထားတာ စစ်မှုထမ်းဖို့အတွက်ဆို ပိုဆိုးတာပေါ့၊ မိန်းကလေးတွေကိုပါ‌ ခေါ်နေပြီကြားတော့ တော်တော်လေး စိုးရိမ်နေရပြီ အိမ်မှာလည်း ညီမလေးတစ်ယောက်နဲ့ မိဘနဲ့ ဘယ်ကိုမှလည်း ရှောင်နိုင်တာမဟုတ်ဘူး၊ ခေါ်လာရင် ဘာလုပ်ရမလဲဆိုတာတောင် မသိတော့ဘူး” ဟု ၎င်းကပြောသည်။

ပြီးခဲ့သည့် ဇူလိုင်လ နောက်ဆုံးပတ်မှစတင်၍ ဟိုပုံးမြို့နယ်ရှိ ရပ်ကွက်များတွင်လည်း စစ်ကောင်စီမှ စစ်မှုထမ်းခေါ်ရန်အတွက် ငွေကြေးကောက်ခံမှုများလည်းရှိခဲ့ပြီး၊ ရပ်ကွက်လူကြီးများမှ အမျိုးသမီးစစ်မှုထမ်းနာမည်ပေါက်သူများကို လာရောက် သတိပေးမှု ရှိနေကြောင်းလည်း သိရသည်။

ထိုကဲ့သို့ အမျိုးသမီးများကိုပါ စစ်မှုထမ်းခေါ်ယူမည့်အကြောင်းများကြောင့် မိဘများအကြားတွင်လည်း စိုးရိမ်ပူပန်မှုများစွာဖြစ်နေပြီး ငွေကြေးအဆင်မပြေမှု၊ အလုပ်အကိုင် အဆင်မပြေမှုများကြားမှ နေ့စဉ်စိတ်သောကရောက်နေရကြောင်း ညောင်ရွှေမြို့တွင်နေထိုင်သည့် မိခင်တစ်ဦးကပြောသည်။

“မိန်းကလေးတွေကို စစ်မှုထမ်းခေါ်တယ်လို့ ကြားတည်းက ကျမတို့ က နေ့တိုင်း စိတ်ပူနေရတာ သူများတွေလို နိုင်ငံခြားပို့လိုက်ချင်ပေမယ့် ပိုက်ဆံကိစ္စကို တွေးမိလိုက်ရင် လက်လျော့လိုက်ရတယ်၊ ကျမတို့မှာ ရွေးစရာလမ်းမရှိသလိုပဲ” ဟု အဆိုပါ မိခင်ကပြောသည်။

ယမန်နေ့ (ဩဂုတ်လ ၂၁ ရက်) တွင်လည်း ရန်ကုန် အပြည်ပြည်ဆိုင်ရာလေဆိပ်တွင် အလည်အပတ် နိုင်ငံကူးလက်မှတ် (PV) ကိုင်ဆောင်ထားသူ လူငယ်များကိုလေဆိပ်ရဲများမှ ပြည်ပထွက်ခွင့်မပြုကြောင်း သတင်းများလည်း ထွက်ပေါ်လာခဲ့သည်။ ထိုသတင်းများကြောင့်စိတ်အလွန်အမင်းပူပင်နေရကြောင်း ပြည်ပသို့ ထွက်ခွာရန်ပြင်ဆင်နေသည့် သျှမ်းပြည်တောင်ပိုင်းမှ အသက် ၂၆ နှစ်အရွယ် အမျိုးသမီးတစ်ဦးကလည်းပြောသည်။

“ကျမတို့ ပြည်ပထွက်ဖို့တော့ စီစဉ်ထားတာ ဒီမှာလည်း အလုပ်တွေကအဆင်မပြေတော့တာ၊ ခုလိုလေဆိပ်မှာ ဖမ်းတာဆီးတာခံရမှာကို တော်တော်လေး စိတ်ပူတယ်။ ကျမတို့က ပြည်ပထွက်ဖို့ကို ရှိတာလေးအရင်းနှီးလုပ်ထားရတာ” ဟု သူကပြောသည်။

အင်အားပြုန်းတီးမှုများစွာဖြစ်ပေါ်နေသည့် စစ်ကောင်စီတပ်သည် စစ်မှုမထမ်းမနေရစနစ်အား အသက်သွင်းပြီးနောက် မြန်မာနိုင်ငံတွင်းရှိ လူငယ်များခြိမ်းခြောက်မှုများစွာကြုံတွေ့နေရခြင်းဖြစ်သည်။

ထိုကြောင့် လူငယ်အများစုသည် မြန်မာနိုင်ငံအား စွန့်ခွာပြီး အိမ်နီးချင်းထိုင်းနိုင်ငံနှင့် အခြားနိုင်ငံများသို့ အခက်အခဲများကြားမှ ရသည့်နည်းဖြင့် တိမ်းရှောင်နေရသလို တော်လှန်ရေးတပ်ဖွဲ့များအတွင်းသို့ ဝင်ရောက်သွားသူများလည်းရှိနေကြသည်။

၂၀၂၄ ဧပြီလ မှ စတင်ပြီး စစ်ကောင်စီမှ စစ်မှုထမ်း အပတ်စဉ် (၁) နှင့် (၂) အတွက် အမျိုးသားများအား စတင်ခေါ်ယူခဲ့ပြီး လူငယ်အမျိုးသား ၁ သောင်းနီးပါး စစ်သားအဖြစ်စုဆောင်းခံခဲ့ရသည်။

၂၀၁၉ ခုနှစ်တွင် ကောက်ယူခဲ့သည့် ကြားဖြတ် သန်းကောင်စာရင်းများအရ စစ်မှုမထမ်းမနေရ ဥပဒေနှင့် အကျုံးဝင်သူ မြန်မာနိုင်ငံသား အမျိုးသား ၆ ဒသမ ၃ သန်းနှင့် အမျိုးသမီး ၇ ဒသမ ၇ သန်း၊ စုစုပေါင်း ၁၄ သန်းရှိသည်ဟု ၂၀၂၄ခုနှစ် ဖေဖော်ဝါရီ လပိုင်းတွင် စစ်တပ်ပိုင် မြဝတီ ရုပ်မြင်သံကြားမှ တစ်ဆင့် ဗိုလ်ချုပ်ဇော်မင်းထွန်းက ပြောဆိုခဲ့သည်။

စစ်မှုထမ်းဥပဒေအရ စစ်မှုထမ်းရန် အသက်အရွယ်သတ်မှတ်ချက်အတွင်း အကျုံးဝင်သည့် အမျိုးသမီးများအား စစ်မှုထမ်းသင်တန်း အပတ်စဉ် (၅) မှ စတင်ခေါ်ယူသွားမည်ဟုလည်း ပြောကြားခဲ့သည်။

စစ်သင်တန်းကာလကို ၃ လလျာထားပြီး တစ်နှစ်လျင် ၄ ကြိမ် စစ်မှုထမ်းရန် ခေါ်ယူမည်ဟု ပြောကြားထားသည့်အတွက် တစ်နှစ်လျှင် ပြည်သူ ၂၀,၀၀၀ စစ်မှုထမ်းရန် ခေါ်ယူခံရမည် ဖြစ်သည်။

အလုပ်သင်သတင်းထောက် ယူဂျင်းရေးသားသည်။