သျှမ်းပြည်တောင်ပိုင်း၊ ပင်လောင်းမြို့နယ် သပြေကုန်းကျေးရွာအုပ်စုအတွင်း ချောင်းရေကြီးမှုကြောင့် ပိတောက်အင်းချောင်းကူးတံတား ရေထဲမျောပါ ပျက်စီးသွားကြောင်း စုံစမ်းသိရသည်။
ယမန်နေ့ (ဩဂုတ် ၂၁ ရက်) ညတွင် ပင်လောင်းမြို့နယ် သပြေကုန်းကျေးရွာအုပ်စုအတွင်း ကျေးရွာ ၇ ရွာခန့် အသုံးပြုနေသော ပိတောက်အင်းချောင်းကူးတံတား ရေထဲမျှောပါ ပျက်စီးသွားကြောင်း ဒေသခံတစ်ဦးက သျှမ်းသံတော်ဆင့်ကိုပြောသည်။
“ကျေးရွာပေါင်း ၇ ရွာလောက်သုံးတယ်၊ အဓိကလမ်းလည်းဖြစ်နေတာ၊ လမ်းတွေကသုံးလို့ကိုမရတော့တာ” ဟု ၎င်းကပြောသည်။
ထိုချောင်းကူးတံတားသည် ပြီးခဲ့သောမေလကလည်း တံတားဘေး နံရံများ အောက်ခြေထောက်တိုင်များ ပြိုကျပျက်စီးခဲ့သည့်အတွက် ဒေသခံများက ပြန်လည်ပြုပြင်ထားသော်လည်း မိုးကြီးမှုကြောင့် ချောင်းရေကြီးကာ မျောပါသွားခြင်းဖြစ်ကြောင်း ပေါင်းလောင်းဒေသ မီဒီတွင်လည်း ဖော်ပြထားသည်။
“ ညဖက်မိုးရွာကြီးပြီးတော့ တံတားပါ ပါသွားတာ၊ ချောင်းကတော့ ရေကျသွားရင်တော့ ဖြတ်ကူးလို့တော့ ရပေမယ့် လက်ရှိက မိုးကြီးပြီး ရေလည်းများနေတော့ တံတားမရှိရင် ဒေသခံတွေကတော့ အခက်အခဲတွေ့မှာ” ဟု ပေါင်းလောင်း ဒေသခံတစ်ဦးကပြောသည်။
အလားတူ သျှမ်းပြည်တောင်ပိုင်း ပုံးအင်းဒေသတွင်လည်း မိုးကြီးမှုကြောင့် ကျေးရွာပေါင်း ၁၉ ရွာရေနှစ်မြုပ်နေပြီး စပါးခင်းဧက သောင်းချီရေမြုပ်နေကြောင်းလည်း သိရသည်။
လက်ရှိ မိုးရာသီကာလ အတွင်း သျှမ်းပြည်အတွင်း ရေကြီးရေလျှံမှုများလည်း နေရာအနှံ့ဖြစ်ပေါ်နေပြီး စစ်ဘေးကြောင့် စစ်ရှောင်နေရသည့် ပြည်သူအများအပြားလည်း စစ်ဘေးအပြင် ရေဘေးဒုက္ခများနှင့်လည်း ရင်ဆိုင်ကြုံတွေ့နေရကြရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments