တရုတ်နိုင်ငံ၏ လုံခြုံရေးနှင့် အကျိုးစီးပွားကို ထိခိုက်ပျက်ပြားစေမည့် မည်သည့် ကိစ္စရပ်ကိုမဆို ခွင့်ပြုမည်မဟုတ်ကြောင်းနှင့်မြန်မာနိုင်ငံရှိ တရုတ်စီမံကိန်းများနှင့် ဝန်ထမ်းများ၏ ဘေးကင်းလုံခြုံရေး အတွက် အစွမ်းကုန် ထိန်းသိမ်း ကာကွယ်ပေးမည်ဟု စစ်ခေါင်းဆောင် မင်းအောင်လှိုင် က ကတိပြု ပြောဆိုကြောင်း ရန်ကုန်မြို့ အခြေစိုက် တရုတ် သံရုံးက နေ့ (ဩဂုတ်လ ၂၁ ရက်နေ့) တွင် ထုတ်ပြန်သည်။

နေပြည်တော်၌ ယနေ့ ပြုလုပ်သည့် မြန်မာနိုင်ငံဆိုင်ရာ တရုတ်သံအမတ်သစ် ဖြစ်သူ မစ္စမာကျား (Ms. Ma Jia) ၏ သံအမတ် ခန့်အပ်လွှာ ပေးအပ်ပွဲတွင် စစ်ခေါင်းဆောင် မင်အောင်လှိုင်က အထက်ပါ အတိုင်း ကတိပြုခဲ့ခြင်း ဖြစ်သည်။

စစ်ခေါင်းဆောင်က “မြန်မာနိုင်ငံ အနေဖြင့် မြန်မာနိုင်ငံရှိ တရုတ်စီမံကိန်းနှင့်ဝန်ထမ်းများ၏ ဘေးကင်းလုံခြုံမှုကို အစွမ်းကုန်ထိန်းသိမ်း ကာကွယ်သွားမည်ဖြစ်ကြောင်း၊ မြန်မာ-တရုတ် နယ်စပ်ဒေသ တည်ငြိမ်အေးချမ်းရေးကို လက်တွေ့ကျကျ ကာကွယ်စောင့်ရှောက်သွားမည်ဖြစ်ကာ တရုတ်နိုင်ငံ လုံခြုံရေးနှင့် အကျိုးစီးပွားကို ထိခိုက်ပျက်ပြားစေမည့် မည်သည့်ကိစ္စရပ်ကိုမဆို ခွင့်ပြုမည်မဟုတ်” ဟု ပြောဆိုကြောင်း ထုတ်ပြန်ချက်တွင် ဖော်ပြသည်။

သို့သော် သျှမ်းမြောက်နှင့် စစ်ကိုင်းတိုင်း အတွင်းရှိ တရုတ် စီမံကိန်း ၁၀ ခုထက်မနည်း တော်လှန်ရေးတပ်များ ထိန်းချုပ်ထားပြီး တရုတ်-မြန်မာ နယ်စပ်ဒေသ အားလုံးနီးပါး စစ်ကောင်စီက လက်လွှတ်ထားရသည်။

ထို့အတူ တရုတ် သံအမတ်သစ်က NLD လက်ထက် သမ္မတ ရှီကျင့်ဖျင်၏ ၂၀၂၀ ပြည့်နှစ် မြန်မာနိုင်ငံ ခရီးစဉ်အတွင်း ရရှိခဲ့သော သဘောတူညီမှုရလဒ်များကို အကောင်အထည်ဖော်ကာ တရုတ်-မြန်မာ အေးအတူပူအမျှအသိုက်အဝန်း တည်ဆောက်သွားရန်၊ မြန်မာနိုင်ငံရှိ တရုတ်စီမံကိန်းနှင့် ဝန်ထမ်းများ၏ ဘေးကင်းလုံခြုံရေး လက်တွေ့ကျကျ ထိန်းသိမ်းကာကွယ်ပေး၍ ဘေးကင်းသောပတ်ဝန်းကျင် ဖန်တီးပေးရန် မျှော်လင့်ကြောင်း ပြောကြားခဲ့သည်ဟု ထုတ်ပြန်ချက်က ဆိုသည်။

စစ်ရှုံးပြီး အထွေထွေ အကျပ်ဆိုက်နေသည့် စစ်ခေါင်ဆောင် မင်းအောင်လှိုင် သည်ပြီးခဲ့သည့် သီတင်းပတ် တရုတ်နိုင်ငံခြားရေးဝန်ကြီး ဝမ်ယိ နှင့် နေပြည်တော်တွင် တွေ့ဆုံစဉ် တရုတ်အကူညီ မျှော်ကိုး၍ တရုတ်နိုင်ငံ လုံခြုံရေးနှင့် အကျိုးစီးပွားများ ကာကွယ်စောင့်ရှောက်မည်ဟု ကတိပေးမှုများ ပြုလုပ်ခဲ့သေးသည်။