သျှမ်းပြည်တောင်ပိုင်း အောင်ပန်းမြို့နယ်အတွင်း ရောက်ရှိလာသည့် လားရှိုးစစ်ဘေးရှောင် နှစ်ထောင်ကျော်အတွက် စားနပ်ရိက္ခာ အရေးပေါ် လိုအပ်နေကြောင်း စုံစမ်းသိရသည်။

လားရှိုးမြို့အတွင်း စစ်ကောင်စီတပ်နှင့် ကိုးကန့်တပ်ဖွဲ့ (MNDAA)တို့ တိုက်ပွဲများကြောင့် ဒေသခံများ ဇူလိုင်လ ပထမပတ်မှစတင်၍ ဘေးလွတ်ကင်းရာ အောင်ပန်းမြို့ သို့ စစ်ဘေးတိမ်းရှောင် လာခဲ့ကြောင်း သိရသည်။

အောင်ပန်းမြို့နယ်အတွင်းသို့ ထွက်ပြေးတိမ်းရှောင်လာသော လားရှိုး စစ်ဘေးရှောင် နှစ်ထောင်ကျော်သည် လွိုင်မော ဘုန်းကြီးကျောင်းနှင့် အောင်ပန်းဒေသခံများ၏ ခြံအတွင်း၌ တဲထိုး၍ နေထိုင်နေကြပြီး၊ အလှူရှင် မရှိသည့် အတွက် စားနပ်ရိက္ခာများ အရေးပေါ် လိုအပ်နေကြောင်း စစ်ဘေးရှောင်ကူညီသူတစ်ဦးက သျှမ်းသံ‌တော်ဆင့်ကို ပြောသည်။

“အလှူရှင်က မရှိဘူး။ တချို့မိသားစုတွေက စားစရာကို မရှိတော့ဘူး။ စီးလာတဲ့ ဆိုင်ကယ်ကို ရောင်းပြီးတော့ ရှိတာလေးနဲ့စားနေရတဲ့ လူတွေတောင်ရှိတယ်။ ဖုန်းတွေ ခဏခဏ ဆက်လာပြီး အကူညီတောင်းတယ်။ အလှူရှင်မရှိတော့ ဘာမှမတက်နိုင်ဘူး။ စားဖို့က ဘယ်လအထိ ထပ်ခံမလဲတောင် ပြောလို့ မရဘူး”ဟု စစ်ဘေးရှောင်ကူညီသူ အမျိုးသားတစ်ဦးက ပြောသည်။

လက်ရှိ မိုးရာသီအချိန်တွင် အောင်ပန်းမြို့ရောက် စစ်‌ဘေးရှောင်များအတွက် အလုပ်အကိုင် ရှားပါးနေပြီး စားဝတ်နေရေး အခက်အခဲများ ကြုံတွေ့ရသည့်အပြင် ငွေကြေးအခက်အခဲများ ကြောင့် နေရပ်မပြန်နိုင်သေးကြောင်း ၎င်းက ဆက်ပြောသည်။

လက်ရှိ အောင်ပန်းမြို့နယ်တွင် သျှမ်း-ကရင်နီ နယ်စပ်မှလာသော စစ်ဘေးရှောင်များ၊ သျှမ်းမြောက် လားရှိုးမြို့နယ်နှင့် ပင်လောင်းမြို့နယ်မှ လာသော စစ်ဘေးရှောင်များ ရောက်ရှိခိုလှုံနေပြီး ဘုန်းကြီးကျောင်း၊ ဆွေမျိုးအိမ်နှင့် အိမ်ခန်းတွင် ငှားရမ်း၍နေကြကာ စစ်ဘေးရှောင်စုစုပေါင်း လူဦးရေ ထောင်နှင့်ချီ ကျန်ရှိနေကြောင်း ၎င်းကဆက်ပြောသည်။

ဇူလိုင်လ ၂ ရက်မှ စတင်ခဲ့သည့် စစ်ကောင်စီတပ်နှင့် ညီနောင်မဟာမိတ်တပ်များ၏ လားရှိုးမြို့ပေါ် တိုက်ပွဲများကြောင့် ထွက်ပြေးနေရသည့် စစ်ဘေးရှောင်များသည် ဘေးလွတ်ကင်းရာ နမ့်လန်၊ တန့်ယန်း၊ မိုင်းရယ်၊ မိုင်းကိုင်၊ မိုင်းရှူး၊ လဲချား၊ ပင်လုံ၊ နမ့်စန်နှင့် တောင်ကြီး၊ အောင်ပန်းစသည့် မြို့များသို့ ရောက်ရှိနေကြပြီး စားနပ်ရိက္ခာ အကူအညီများ လိုအပ်နေကြောင်း စစ်ဘေးရှောင် ကူညီပေးနေသူများက ပြောသည်။