သျှမ်းပြည်တောင်ပိုင်း၊ ပုံးအင်းဒေသအတွင်း ကျေးရွာပေါင်း ၁၉ ရွာ ရေနှစ်မြုပ်နေပြီး စပါး ဧကပေါင်း သောင်းကျော် ပျက်စီးသွားကြောင်း ဒေသခံများထံမှ တဆင့် သိရသည်။

ယနေ့ (ဩဂုတ်လ ၁၉) ရက်တွင် တောင်ကြီးခရိုင် တောင်ကြီး၊ဟိုပုံး နှင့် ဆီဆိုင် မြို့နယ် အတွင်းရှိ ပုံးအင်းဒေသတွင် ရေနှစ်မြုပ်ခြင်းကြောင်း စပါး ဧကပေါင်းများစွာ ရေအောက်ရောက်သွားကြောင်း ဒေသခံအမျိုးသားတစ်ဦးက သျှမ်းသံတော်ဆင့်သို့ပြောသည်။

“ ပုံးအင်းဒေသက တောင်ပတ်လည်ဝိုင်းတော့ မိုးရွာပြီးရင် တောင်ပေါ်ကကျလာတဲ့ ရေတွေကြောင့်မြုပ်ကုန်တာ၊ ရေထွက်ဖို့ က ချောင်းတစ်ခုပဲရှိတယ်၊‌ ရေသွင်းစိုက်ပျိုးချိန်ကျတော့ ရေလှောင်ထားတာမရှိလို့ ရေကမရ၊ ခုကျတော့ စပါးက ရိတ်သိမ်းခါစ နွေစပါး၊ မိုးကြို၊ မိုးစပါး ၃ ရာသီစာလုံး ရေအောက်ရောက်သွားပြီ” ဟု ၎င်းကပြောသည်။

ဩဂုတ်လ ၁၄ ရက်နေ့မှစတင်၍ မိုးသည်းထန်စွာရွာသွန်းခဲ့ပြီးနောက် ကုန်းကျိုင်း၊ အသုံးတော်၊ နားဟီး၊ ကတ်ကူ၊ နောင်မွန်၊ ပုံးအင်း၊ ဘန်းယဉ် ကျေးရွာအုပ်များအတွင်း ကျေးရွာပေါင်း ၁၉ ရွာခန့် ရေနှစ်မြုပ်နေကြောင်းသိရသည်။

“ ၁၄ ရက်နေ့ ကစရွာတယ်၊ ၁၅၊ ၁၆ မှာ ရေက တစ်ရက်ကို ၂ ပေလောက်တက်လာတယ်၊ မနှစ်ကဆို ၆ လက်မလောက်ပဲတက်တာ၊ ဒေသခံတွေကတော့ တစ်ထပ်အိမ်ကလူတွေက နှစ်ထပ်အိမ် အမြင့်တွေဆီမှာ တောင်းနေရတာပေါ့ “ ဟု သူကဆက်ပြောသည်။

ရေလွှမ်းမိုးမှုကြောင့် စပါးစိုက်သည့်တောင်သူများသည်လည်း အခက်အခဲများစွာ ကြုံတွေ့လာမည်ဖြစ်ကြောင်း တောင်သူတစ်ဦးက ပြောသည်။

“ရေကျတာနောက်ကျရင် ဒီနှစ်တော့ ရောင်းဖို့မပြောနဲ့ စားဖို့တောင်အခက်အခဲတွေ့မှာ ရေထွက်ဖို့ အရေးပေါ် တူးပေးတာတွေရှိရင်တော့ သက်သာမယ်လို့ထင်တယ်၊ တောင်သူတွေက ငွေတိုးနဲ့ ချေးပြီး အရင်းရင်းထားရတာ မြေဩဇာတွေကလည်း ဈေးကြီးတယ်၊ ဈေးကြီးတိုင်းလည်း လိုသလောက်ဝယ်လို့ မရဘူး” ဟု ၎င်းကပြောသည်။

၂၀၂၀ ခုနှစ် အတွင်း ကက္ကူကျေးရွာအရှေ့ဘက်တွင် ရေနုတ်မြောင်းတူးပေးရန် ရှမ်းပြည်နယ် အစိုးရအဖွဲ့သို့ တင်ပြထားခဲ့ပြီး တူးဖော်ရန် စီစဉ်ထားသော်လည်း စစ်အာဏာသိမ်းပြီးနောက် ဆက်လက်လုပ်ဆောင်ခြင်းမရှိကြောင်းလည်းသိရသည်။

“အရင်နှစ်တွေကလည်း ရေကြီးတယ်ဆိုပေမယ့် ခုလို မဟုတ်ဘူး ဒီလိုမျိုးကို လွန်ခဲ့တဲ့ ၁၀ နှစ်လောက်က တစ်ကြိမ်ပဲကြုံဖူးသေးတာ၊ သဘာဝဘေးကယ်ဆယ်ရေးတွေကိုလည်း အကူအညီတောင်းထားပေမယ့် ခုထိတော့ ရောက်မလာသေးဘူး ” ဟု ၎င်းကဆက်ပြောသည်။

ပုံးအင်းဒေသသည် သျှမ်းပြည်တောင်ပိုင်းတွင် နာမည်ကြီး ပုံးအင်းဆန်၊ နောင်မွန်ဆန်ဟူ၍လည်း စပါးအများဆုံး စိုက်ပျိုးသော ဒေသတစ်ခုအဖြစ် လူများသိရှိခဲ့သည်။

ပြီးခဲ့သည့် ၂၀၂၂ ခုနှစ်တွင်လည်း ပုံးအင်းဒေသတွင် ရေကြီးရေလျှံဖြစ်ပွားခြင်းကြောင့် စပါးစိုက်ခင်း ဧကပေါင်း ၂ သောင်းကျော် ပျက်စီးဆုံးရှုံးခဲ့သည်။

ထိုစဉ်က သဘာဝဘေး အန္တရာယ်ကြောင့် ရေလွှမ်းမိုးခံရပြီး ပျက်စီးရှုံးဆုံးသွားသည့် စပါးခင်းများကို စိုက်ပျိုးရေး ဦးစီးဌာနက လယ်တစ်ဧကကို မြန်မာကျပ်ငွေ ၂ သိန်းဖြင့် ထောက်ပံ့ကြေးပေးမည်ဟု ပြောခဲ့သော်လည်း ကျပ် ၁၀၀ လျှင် အတိုးနှုန်း ၉၀ ပြားနှုန်းဖြင့် တောင်သူများက ပြန်ဆပ်ခဲ့ရသည်။

အလုပ်သင် သတင်းထောက် ယူဂျင်း ရေးသားသည်။