ပြင်ဦးလွင်မြို့ဘက်မှ တဆင့် မိမိနေရပ်ဘက်သို့ ပြန်မည့် ၁၃မျဉ်းစောင်း နိုင်ငံသားစိစစ်ရေးကတ်ကိုင်ဆောင်သူများကို စစ်ကောင်စီကပေးမဝင်ဘဲ ပြန်လှည့်ခိုင်းကြောင်း စုံစမ်းသိရသည်။
လွန်ခဲ့သည့် ဇူလိုင် ၂၇ရက်တွင် ကျောက်မဲမြို့၌ စစ်ကောင်စီနှင့် တအာင်း(ပလောင်)အမျိုးသားလွတ်မြောက်ရေးတပ်မတော် (TNLA)တို့ တိုက်ပွဲဖြစ်ပွားပြီး ၁၃မျဉ်းစောင်း နိုင်ငံသားစိစစ်ရေးကတ်ကိုင်ဆောင်သူများသည် မန္တလေးမြို့ဘက်သို့ အများအပြားထွက်ပြေးတိမ်းရှောင်သွားခဲ့ကြသည်။
သြဂုတ် (၆)ရက် နံနက်ပိုင်းတွင် TNLA နှင့် ပူးပေါင်းတပ်များက ကျောက်မဲမြို့ရှိ စစ်ကောင်စီ၏ အမှတ်(၁) စစ်ဆင်ရေး ကွပ်ကွဲမှုဌာနချုပ် စကခ-၁ နှင့် ခြေမြန်တပ်ရင်း ခမရ ၅၀၁၊ ၅၀၂ ကို အလုံးစုံ သိမ်းပိုက်နိုင်ခဲ့သည်။
ထို့နောက် ကျောက်မဲစစ်ဘေးရှောင်ခဲ့သည့် ပြည်သူများက မိမိနေရပ်သို့ ပြန်လာကြရာ ပြင်ဦးလွင် ဇီးပင်ကြီး စစ်ကောင်စီဂိတ် တွင် ခရီးသွားကားများကို တင်းကြပ်စွာ စစ်ဆေးနေပြီး ၁၃မျဉ်းစောင်း နိုင်ငံသားစိစစ်ရေးကတ်ကိုင်ဆောင်သူများကို ပြင်ဦးလွင်မြို့သို့ ပေးမဖြတ်ဘဲ ပြန်လှည့်ခိုင်းကြောင်း ကိုယ်တိုင်ကြုံတွေ့သည့် စစ်ရှောင်တစ်ဦး ကသျှမ်းသံတော်ဆင့်ကိုပြောသည်။
“ကျနော်တို့ ပြင်ဦးလွင်ကို ပေးမဖြတ်လို့ ပြန်လှည့်ရတယ်။ နှစ်ခါသွားစမ်းကြည့်တာ နှစ်ခါစလုံးမရလို့ တောင်ကြီးဘက် ကနေ ပြန်လှည့်ပြီး ကျောက်မဲကို ပြန်လာရတယ်” ဟု နေရပ်ပြန် စစ်ရှောင်တစ်ဦးက ဆိုသည်။
အဆိုပါ နေရပ်ပြန်သည့် စစ်ရှောင်များသည် ကားခ ကျပ်ငွေ တစ်သိန်းခွဲပေးပြီး ပြန်ရကြောင်း၊ လက်ရှိမြို့တွင်းတွင် စစ်ရေး မရှိသော်လည်း အလုပ်အကိုင်မလုပ်ကိုင်နိုင်သေးကြောင်း၊ စားဝတ်နေရေးခက်ခဲနေသးကြောင်း နေရပ်ပြန် စစ်ရှောင် အမျိုးသမီးတစ်ဦးက သျှမ်းသံတော်ဆင့်ကိုပြောသည်။
“ အခုတော့ သေနတ်သံ လက်နက်ကြီးသံမကြားရဘူး။ ကျောက်မဲမှာက အလုပ်တော့မရှိဘူး။ ယောင်ချာချာနဲ့ အဆင်မပြေဘူး။ ကလေးကလည်း ၃ယောက်ရှိတယ်။ အိမ်ဆိုလည်း သူခိုးတွေ ဝင်မွှေသွားတယ်။ ဘာမှမကျန်ဘူး” ဟု ၎င်းအမျိုးသမီးက ပြောသည်။
စစ်ရှောင်များနေရပ်သို့ပြန်မည်ဆိုပါက အခြေအနေကို သေချာမေးမြန်းစုံစမ်းပြီးမှ ပြန်သင့်ကြောင်းနှင့် ကားသမားများကို သေချာမေးသင့်ကြောင်း ၎င်းအမျိုးသမီးက ဆက်ဆိုသည်။
လက်ရှိမှာ ကျောက်မဲမြို့တွင် တိုက်ပွဲများ စစ်ကောင်စီ၏ လေကြောင်းဗုံးကြဲမှုများ မရှိသော်လည်း ဖုန်းလိုင်းများ ဖြတ်တောက်နေပြီး ယခင်စစ်အာဏာရှင်လက်ထက်တွင် အသုံးပြုခဲ့သည့် CDMA ကဒ်များဖြင့်သာ ဆက်သွယ်ရကြောင်း ၎င်းက ပြောသည်။
ယခုလက်ရှိတွင် ကျောက်မဲ၌ တိုက်ပွဲငြိမ်သက်နေသော်လည်း သီပေါမြို့ပေါ်တွင် စစ်ကောင်စီနှင့် (TNLA) တိုက်ပွဲ ပြင်းထန်လျက်ရှိပြီး စစ်ကောင်စီဘက်မှ လေကြောင်းဖြင့် ဗုံးကြဲတိုက်ခိုက်နေပြီး TNLA ဘက်လည်း မြို့တွင်း ဘုန်းကြီးကျောင်း များတွင် အကာအကွယ်ယူကာ တိုက်ခိုက်နေကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်။
